Read Batak Karo 2 SAMUEL 15 Bible Online

2 SAMUEL 15 - Batak Karo bible

2 SAMUEL 15

¹Kenca bage isikapken Absalom sada gereta ras kuda man bana, rikut ras lima puluh pengawal.

²Tiap wari lampas ia medak, jenari lawes ia tedis i tepi dalan deher pintun gerbang kuta. Adi lit kalak reh ku je si atena ngaduken perkarana man raja minter ilebuh Absalom isungkunna i ja nari ia. E maka kenca ikataken kalak ndai i bas suku si apai nari ia,

³nina Absalom, “Nen kam ipihak si bujur, tapi labo lit wakil i bas raja nari si megiken persoalenndu.”

⁴Janah itambahi Absalom nina, “Bicara aku min jadi hakim tentu ise si lit perjengilenna ntah tuntutenna, banci reh man bangku janah kubereken keadilen man bana.”

⁵Sanga ideheri kalak ndai Absalom, atena erjimpuh i lebe-lebena minter ijemakna, idakepna jenari iemana.

⁶Si enda ilakoken Absalom man tep-tep kalak Israel si reh ndahi raja ndatken keadilen. E maka enggo dat Absalom ukur kalak ndai kerina.

⁷Kenca empat tahun nina Absalom man Raja Daud, “O Bapa lawes ateku ku Hebron nehken padan si kupadanken man TUHAN.

⁸Sanga aku tading i Gesur i Siria erpadan aku man TUHAN, adi itaruhkenNa aku mulih ku Jerusalem kusembah Ia i Hebron.”

⁹“Berkatlah alu mejuah-juah,” nina raja. E maka lawes Absalom ku Hebron.

¹⁰Tapi isuruhna utusen ku kerina suku Israel ngataken, “Sanga ibegindu sora terompet, ersuraklah kam nindu, ‘Absalom enggo jadi raja i Hebron!’ ”

¹¹Lit 200 kalak ikut idilo Absalom berkat ras ia i Jerusalem nari. Si 200 kalak e la meteh kai pe kerna komploten e, e maka ikut ia la lit sitik pe curiga.

¹²Sanga Absalom mpersembahken persembahen, itenahkenna ka Ahitopel i kuta Gilo nari. Ahitopel penasehat Raja Daud. Komploten si ngelawan raja reh gegehna, janah pengikut Absalom tambah teremna.

¹³Sekalak utusen ngelapor man Daud, “Genduari ukur bangsa Israel enggo ngkapiti Absalom.”

¹⁴Erkiteken si e nina Daud kempak kerina pegawaina i Jerusalem: mengongsilah kita! Bage nari nge ngenca maka banci kita pulah i bas Absalom nari. Lanai ndekah reh me ia. Pedasken gelah ola kita itundukna janah italukenna, dingen kerina penduduk kuta enda ibunuhna.

¹⁵“Payo Raja,” nina pegawai e njabapsa. “Kami sikap ndahiken kai si ikatakenndu.”

¹⁶Jenari lawes raja ikut pe kerina keluargana, pegawai-pegawaina, seakatan sepuluh kalak gundikna tading lako njaga istana.

¹⁷Asum raja ras kerina anak buahna berkat nadingken kuta e ngadi ia i rumah si perpudina.

¹⁸Kerina pegawai raja tedis i deherna asum pengawal peribadi raja mentas arah lebena. 600 kalak tentera i Gat nari pe mentas.

¹⁹E maka nina raja man Itai peminpinna, “Engkai maka kam ikut lawes ras kami? To mulihken tadinglah ras raja si mbaru. Kam kalak pertandang, pengungsi si la ringan i bas negerindu.

²⁰Langa kam ndekah tading i jenda, dage ngkai maka kubahan kam ikut lajang-lajang ras aku? La kueteh ku ja tujunku lawes. To mulihkenlah janah baba kerina temanndu sebangsa ras kam. Mbera mehuli perbahan TUHAN man bandu janah setia Ia man bandu.”

²¹Tapi ngaloi Itai, “O Raja, ersumpah aku man bandu i bas gelar TUHAN maka lalap ateku ras kam ku japa pe kam lawes, aminna pe arus aku ngasamken kesahku.”

²²“Merandal! Ota dage!” nina Daud. Jenari berkat Itai ras kerina anak buahna ras keluargana.

²³Asum pengikut Daud lawes ngandung kerina rayat e alu megang sorana. Ikepari raja Lau Kidron, ras anak buahna erdalan ku taneh si mesawang.

²⁴Imam Sadok pe ikut, bage pe kalak Lewi si maba Peti Perpadanen si badia. Iamparkenna Peti Perpadanen e janah la nai iangkatna seh kerina rayat nadingken kuta e. Imam Abiatar pe i je.

²⁵Jenari ngerana raja man Sadok, “Ulihken Peti Perpadanen ena ku kuta. Adi ngena denga ate TUHAN man bangku iberena denga nge aku pagi mulih ngenensa janah ngidah ingan tading Peti Perpadanen e.

²⁶Tapi adi la ateNa ngena kempak aku lakokenNa lah kai akapNa mehuli.”

²⁷Jenari tole nina raja man Sadok, “Bagenda, kam ras anakndu Ahimas bage pe Abiatar ras anakna Jonatan mulih ku kuta alu mejuah-juah.

²⁸Sanga bage, aku nimai i dalan ngepar lau belin i taneh si mesawang, seh ngayak kualoken berita i bas kam nari.”

²⁹E maka ibuat Sadok ras Abiatar Peti Perpadanen e, ibabana mulih ku Jerusalem janah ringan ia i jah.

³⁰Inangkih Daud Deleng Saitun la ia ersepatu, janahna tangis; takalna itutupna tanda rate ceda. Kerina si ngikutken ia pe itutupina takalna janah ngandung.

³¹Asum ikataken man Daud maka Ahitopel pe enggo ikut berontak ras Absalom, ertoto Daud nina, “TUHAN siasiakenlah ajar Ahitopel!”

³²I datas tampuk uruk e lit ingan ersembah. Kenca Daud seh i je reh teman si ipercayai Daud, Usai kalak Arki, njumpai Daud alu uis merigat janah abu i bas takalna.

³³Nina Daud, “Labo kam nampati aku adi iikutkenndu aku,

³⁴tapi banci jadi isampatindu aku adi mulih kam ku kuta, jenari turiken man Absalom maka genduari kam suruh-suruhenna si setia bagi enggo kam jadi pelayan bapana. Jenari lakokenlah asa ngasupndu kai saja ngelawan ajar si ibereken Ahitopel.

³⁵Imam Sadok ras Abiatar lit i jah; turiken man bana kai saja si ibegindu i istana raja.

³⁶Anakna Ahimas ras Jonatan, pe ras ia i jah janah banci suruhndu duana ndahi aku maba berita si ipepulungndu.”

³⁷E maka Usai teman Daud e mulihken ku kuta si mbaru ingani Absalom.