Read Batak Karo 2 SAMUEL 22 Bible Online

2 SAMUEL 22 - Batak Karo bible

2 SAMUEL 22

¹Kenca TUHAN enggo nelamatken Daud i bas Saul ras musuh-musuhna si deban nari, iendeken Daud ende-enden enda lako muji TUHAN:

²Keleng ateku Kam o, TUHAN, Kam kap gegehku.

³Tuhan desken benteng si nteguh, inganku cibuni. Dibatangku desken gunung batu, inganku cilinggem. Desken ampang-ampang ngampangi aku; njagai aku gelah ola cilaka.

⁴Kulebuh TUHAN, ipulahiNa aku i bas musuh-musuhku nari; Pujilah TUHAN!

⁵Galumbang kematen ngkeleweti aku, lau kebenen ergalun ngombakken aku.

⁶Kematen ngkeleweti Aku, siding kematen nganga i lebengku.

⁷I bas kesusahenku kulebuh TUHAN. Erlebuh aku man Dibatangku gelah isampatiNa. I bas rumahNa si badia ibegikenNa sorangku; idengkehkenNa sorangku serko.

⁸Doni mugur-ugur ras nggirgir; palas langit mugur-ugur ras kumeter, sabap Dibata merawa!

⁹Gebuk mbincar ndarat i bas lubang igungNa nari; gara api ndilat, luar rara gara i bas babahNa nari.

¹⁰IcaingkenNa langit, sirang janah runtuh janah kegelapen i teruh naheNa.

¹¹Kabang Ia i das kerub; kelaling Ia i datas kabeng angin.

¹²ItutupiNa baNa alu kegelapen embun mekapal dem udan ngkeleweti Ia;

¹³mbincar rara si gara bagi kilap i adep-adepenNa nari.

¹⁴Kenca bage erlenggur sora TUHAN i langit nari, terbegi sora si Mada Kuasa.

¹⁵IpulahiNa anak panahNa, mbencah musuh-musuhNa; terang sinalsalNa erbahanca kiam musuh-musuhNa.

¹⁶Talang lante lawit, mbungkar palas doni, tupung TUHAN ngerawai musuhNa, erdengung pernembehNa.

¹⁷Idadaken TUHAN tanNa i das nari ku teruh, jenari icikepNa aku, irintakNa i bas lau si mbages nari.

¹⁸IpulahiNa aku i bas musuhku nari; ras i bas kerina kalak si rate nembeh man bangku, kalak si gegehen asangken aku.

¹⁹Sanga aku i bas kesusahen, ilawan musuh-musuhku aku, tapi TUHAN nelamatken aku.

²⁰IpulahiNa aku i bas cilaka nari; iselamatkenNa aku, sabap ngena ateNa aku.

²¹ TUHAN mereken si mehuli man bangku sabap kulakoken kai si benar; ipasu-pasuNa aku sabap aku la ersalah.

²²Kuikutken Undang-undang TUHAN; la kutundalken Dibatangku.

²³Kulakoken kerina Undang-undangNa; la enggo la kuikutken perentah-perentahNa.

²⁴IetehNa aku la erpandangen, nilah aku i bas kelepaken nari.

²⁵IberekenNa si mehuli man bangku sabap kulakoken si benar, ietehNa aku la ersalah.

²⁶O TUHAN, Kam setia man kalak si setia man baNdu, ikuhiNdu si mehuli man kalak mehuli. pe.

²⁷Kam badia man kalak si badia, tapi rimbang ras kalak jahat.

²⁸IselamatkenNdu kalak si peteruk bana, tapi ipeterukNdu kalak megombang.

²⁹Kam TUHAN, sinalsalku; ipelawesNdu kegelapenku.

³⁰IbereNdu bangku gegeh naluken musuhku alu penampatNdu kuripukken bentengna.

³¹Perbahanen Dibata serta, kataNa tercikep kal! Ia desken ampang-ampang man kalak si mindo pengkawali man baNa.

³² TUHAN ngenca Dibata Ia ngenca Si nampati kita.

³³Dibata mere gegeh bangku; ibahanNa dalanku la jumpa cilaka.

³⁴IpegegehiNa nahengku bali ras nahe belkih, ijagaiNa aku i datas deleng-deleng. [35†]

³⁵IajariNa aku erperang, maka banci aku ngerentang alu panah si megegeh.

³⁶O TUHAN, iselamatkenNdu janah ikawaliNdu aku, penampatNdu erbahan aku mbelin.

³⁷IjagaiNdu aku gelah la tertangkap, janah la aku pernah guling.

³⁸Kuayaki musuh-musuhku janah kutaluken ia; la kungadiken, adi langa ia kernep kerina.

³⁹Kugudam ia, gempang lanai keke; kerina ia terdang, talu i lebe-lebengku.

⁴⁰IberekenNdu bangku gegeh guna erperang e maka menang aku, talu musuh-musuhku.

⁴¹IbahanNdu musuh-musuhku kiam i bas aku nari; kukernepken kerina si ernembeh ate bangku.

⁴²Idaramina si nampati tapi sekalak pe la mulahisa, ilebuhna TUHAN, tapi la ijabapNa.

⁴³Kuperjaki ia, maka jadi abu kerina; kudedehi ia bagi kubang i bas dalan.

⁴⁴IkeliniNdu aku i bas bangsa si jahat nari, i rajakenNdu aku ngerajai bangsa-bangsa, bangsa si la kutandai jadi suruh-suruhenku.

⁴⁵Kalak pertandang nembah man bangku, patuh kune megi perentahku.

⁴⁶Enggo bene kinirawanna reh ia nggirgir i bas kuta bentengna nari.

⁴⁷ TUHAN nggeluh! Pujilah pembelangku! Momoken kinibelinen gegeh Dibata si nampati aku.

⁴⁸IberekenNa bangku kuasa naluken musuh-musuhku; bangsa-bangsa italukenNa i lebe-lebengku,

⁴⁹ipulahiNa aku i bas imbangku nari. O, TUHAN, iberekenNdu bangku kuasa naluken musuh-musuhku ikawaliNdu aku i bas kalak jahat nari.

⁵⁰E maka kupuji Kam i tengah bangsa-bangsa, kuendeken ende-enden pujin man baNdu. [36†]

⁵¹Dibata mereken kemenangen si mbelin man rajaNa; icidahkenNa kekelengenNa si tetap nandangi kalak si ipilihNa, man Daud ras man kesusurenNa seh rasa lalap.