Read Batak Karo 2 SAMUEL 23 Bible Online

2 SAMUEL 23 - Batak Karo bible

2 SAMUEL 23

¹Daud anak Isai. Dibata erbahanca ia jadi si mbelin. Dibata nu Jakup milih ia jadi raja. Janah ia nuratken ende-enden man Israel. Enda me kata-kata Daud si perpudina:

²Kesah TUHAN ngerana arah aku; pedahNa i bas babahku.

³Dibata nu Israel enggo ngerana, penampat Israel ngerana bangku: “Raja si merentah alu adil, si merentah i bas kepatuhen nandangi Dibata

⁴bali ras sinalsal matawari si la lit embunna, matawari si erbahan dukut erndilap kenca udan.”

⁵Janah bage me Dibata masu-masu kesusurenku, sabap enggo ibahanNa sada perpadanen si tetap man bangku, sada perpadanen si la banci iobah sada padan si la sambar-sambar. E me kerina kesikelku e me kemenangenku janah Dibata kap merekenca.

⁶Kalak si ngelawan Dibata bali ras duri si ibenterken; ise pe la pang ncikepsa alu tanna.

⁷Pala ipakena perkakas besi ntah lembing; meseng me kerina kalak si ngelawan Dibata.

⁸Enda me gelar-gelar tentera Daud si terberita: si pemena e me Josep Basebet i Takemon nari. Ia peminpin “Si Telu”, ia erperang alu lembingna ngelawan 800 kalak janah ibunuhna kerina i bas sada peperangen.

⁹Kalak si terberita peduaken i bas si telu e e me: Eleasar anak si Dodo i bas terpuk Ahoh nari. I bas sada wari ia ras Daud ngelawan bangsa Pilisti si enggo pulung guna erperang. Bangsa Israel mundur,

¹⁰tapi ia tetap ertahan, ilawanna kalak Pilisti, seh maka tanna enggo penggingen e maka lanai terpulahisa pedangna. Mbelin kal kemenangen TUHAN i bas wari e. Kenca perang e enggo dung mulihken bangsa Israel ndahi Eleasar, jenari itangtangina baju kalak si enggo mate e.

¹¹Kalak si peteluken i bas si telu si terberita e, e me Sammah anak si Age i Harar nari. Bangsa Pilisti enggo pulung i Lehi i bas sada juma si isin kacang gara. Kalak Israel kiam iayak-ayak bangsa Pilisti

¹²tapi Sammah tetap ertahan i bas juma e, jenari ibunuhina bangsa Pilisti. Mbelin kal kemenangen TUHAN, i bas wari e.

¹³I bas sada wari i bas permulan paksa rani, Daud sangana i bas gua Adulam. E maka reh telu kalak i bas “Si Telu puluh” ndahi ia. Sanga si e sada rombongen bangsa Pilisti erkemah i Baluren Repaim.

¹⁴Paksa si e Daud sangana i das sada uruk-uruk si erbenteng, janah sada terpuk bangsa Pilisti enggo ngkuasai Betlehem.

¹⁵Tedeh ate Daud kutana, e maka nina, “Merincuh kal min aku sekalak maba lau inemen i bas sumur i pintun gerbang Betlehem nari!”

¹⁶Teluna tentera si terberita e iterobosna perkemahen bangsa Pilisti, ijarukna lau i bas sumur e nari jenari ibabana mulih man Daud. Tapi la nggit Daud minem lau e; tapi iamburkenna lau e jadi sada persembahen man TUHAN,

¹⁷e maka nina, “TUHAN, ndigan pe la aku nggit nginemsa lau e! E seri kap ras minem dareh kalak enda si ngasamken kesahna!” E maka la ia nggit nginem lau e. Bagem rawana teluna tentera si terberita e.

¹⁸Senina Joap, si Abisai (nande kalak enda Seruya gelarna) ia me peminpin “Si Telu puluh si terberita”. Ia erperang alu lembingna ngelawan 300 kalak janah ibunuhna kerina e maka ia jadi terberita i bas “Si Telu puluh”.

¹⁹Ia me si terberitana i bas “Si Telu puluh” e maka ia me jadi peminpin, tapi lebih terberita denga ka “Si Telu” asangken ia.

²⁰Benaya anak Joyada i Kabsel nari, e me tentera si deban si terberita; ia sekalak si mbisa tuhu-tuhu. Ia enggo munuh dua tentera Moap si mbisa. I bas sada paksa, lawes ia ku bas sada lubang tupung salju sangana nusur jenari ibunuhna sada singa i je.

²¹Sekalak bangsa Mesir si mbestang pe ibunuhna. Bangsa Mesir e ncikep sada lembing. Benaya ngelawan bangsa Mesir alu cikenna, isintapkenna lembing e i bas tan kalak Mesir e nari jenari ibunuhna kalak Mesir alu lembing e ka.

²²E me kinimbisan si ilakoken Benaya. Ia pe sekalak i bas “Si Telu puluh”.

²³Ia me si terberitana i bas “Si Telu puluh” tapi terberitan denga “Si Telu” asang ia. Itamaken Daud ia ertugas jadi pengawal peribadina.

²⁴ [24-39] Enda me kerina anggota-anggota “Si Telu puluh”: Asahen senina Joap Elhanan anak Dodo i Betlehem nari Sammah ras Elika i Harod nari Heles i Pelet nari Ira anak Ikes i Tekoa nari Abieser i Anatot nari Mebunai i Husa nari Salmon i Aho nari Maharai i Netopa nari Helep anak Baana i Netopa nari Itai anak Ribai i Gibea i bas daerah Benyamin nari Benaya i Piraton nari Hiddai i bas baluren deher Gaas nari Abialbon i Araba nari Asmawet i Bahurim nari Eliaba i Salbon nari Anak-anak Jasen si dilaki Jonatan Sammah i Harar nari Ahiam anak Sarar i Harar nari Elipelet anak Ahasbai i Maaka nari Eliam anak Ahitopel i Gilo nari Hesro i Karmel nari Paarai i Arab nari Igal anak Natan i Soba nari Bani i Gat nari Selek i Amon nari Naharai i Beerot nari, si maba senjata Joap Ira ras Gareb i Jatir nari Uri(...)