Read Batak Karo 2 SAMUEL 4 Bible Online

2 SAMUEL 4 - Batak Karo bible

2 SAMUEL 4

¹Megi berita maka Abner enggo ibunuh i Hebron, mbiar kal Isboset, anak Saul. Kerina bangsa Israel pe lesek atena.

²Pegawai Isboset lit dua kalak jadi kepala gerombolen, Baanah ras Rehab duana anak Rimon suku Benyamin i Beerot nari. (Beerot e me bagin taneh suku Benyamin.

³Kalak Beerot enggo lompat ku Gittaim, janah i je me ia ringan mulai paksa e.)

⁴Sinursur Saul si deban e me Mepiboset anak Jonatan, enggo lima tahun umurna sanga Saul ras Jonatan ibunuh. Sanga reh berita kerna kematenna i Jesreel nari, ibuat ras ikiamken si rembahisa si Mepiboset. Tapi erkiteken rayak-ayak ia kiam, ndabuh si Mepiboset e maka ia cempang. [7†]

⁵Berkat Rehab ras Baana ku rumah Isboset, janah seh i je pantek ciger sanga wari las kal. Isboset sangana tunduh idapetina.

⁶Rembang pembantu rumah tangga Isboset sangana miari gandum i deher pintun madat matana e maka tertunduh ia. Bengket Rehab ras Baana ku rumah Isboset alu la ieteh kalak.

⁷Kenca seh i bas bengket ia ku kamar ingan medem Isboset. Sangana kal badeh pertunduhna i je, e maka ibunuhna. Kenca bage ikeret Rehab ras Baana takal Isboset, ikantingna. I bas sada berngi e erdalan ia arah Baluren Lau Jordan.

⁸Kenca seh i Hebron iendeskenna takal Isboset e man Daud janah nina man raja, “Enda takal Isboset anak musuhndu Saul, si mbarenda atena munuh kam. I bas wari enda enggo ibere TUHAN kam erbahan pembalasen man Saul ras man kesusurenna.”

⁹Nina Daud njabap kalak enda duana, “Ersumpah aku i bas gelar TUHAN si nggeluh, si enggo mulahi aku i bas kerina mara nari.

¹⁰Mbarenda sanga aku i Siklak reh kalak meritaken man bangku kerna kematen Saul. Iakapna berita si mehuli nge si ibabana e. Kutangkap ia, jenari kuperentahken gelah ibunuh. Em pemere si kubereken man bana erkiteken ‘beritana si mehuli e’. [8†]

¹¹Tentu beraten denga ka ukumen nandangi kalak jahat si munuh kalak benar si sangana tunduh i bas rumahna jine! Genduari kubalas man bandu kematenna e, e maka kusasapken kam i babo taneh enda nari!”

¹²Kenca bage iperentahken Daud tenterana munuh Rehab ras Baanah. Kenca ibunuh ikeret kalak ndai tan ras nahena, iolah-olahna deher kolam i Hebron. Tapi takal Isboset ibuatna jenari ikuburkenna i kuburen Abner i Hebron.