Read Batak Karo 2 SAMUEL 8 Bible Online

2 SAMUEL 8 - Batak Karo bible

2 SAMUEL 8

¹Lanai ndekahsa kenca si e iserang Raja Daud ka bangsa Pilisti, italukenna bangsa e e maka lanai lit kuasa bangsa Pilisti i negeri e.

²Kenca bage italuken Daud bangsa Moap. Ipeterdang Daud kerina tahanen e i babo taneh, jenari ibunuhna dua tiap telu kalak. Bangsa Moap enggo jadi jajahenna janah igalar bangsa Moap pajak man Daud.

³Kenca bage iserang Daud raja negeri Sobah, e me Hadadeser anak Rehop. Tupung e ate Hadadeser majekken kuasana mulihi i daerah ulu Lau Eprat.

⁴Itaban Daud 1.700 tenterana si erkuda ras 20.000 tenterana si erdalan nahe. Ibuatna kudana guna ngerintak seratus gereta, lebihna ipengkarkenna kerina.

⁵Sanga bangsa Siria i Damaskus nari ngirim tentera nampati Raja Hadadeser, ilawan Daud janah ibunuhna 22.000 kalak.

⁶Kenca bage ipajekken Daud perkemahen tenterana i daerah bangsa Siria e, janah bangsa e enggo jadi jajahenna janah igalari kalak e pajak man Daud. TUHAN erbahanca maka Daud menang ku japa pe ia erperang.

⁷Itaban Daud ampang-ampang emas si ibaba pegawai Hadadeser janah ibabana ku Jerusalem.

⁸Ibuatna pe melala tembaga i Betah ras i Berotai nari, e me kuta si iperentah Hadadeser.

⁹Raja Toi i Hamat nari megi maka Daud naluken kerina tentera Hadadeser.

¹⁰E maka isuruh Raja Toi anakna Joram ngataken mejuah-juah man Raja Daud ras ngataken selamat kerna kemenangenna ngelawan Hadadeser, sabap ndekah me Raja Toi ermusuhen ras Hadadeser. Ibaba Joram pemere si ibahan i bas emas, pirak, ras tembaga nari man Daud.

¹¹Kerina e iendesken Raja Daud guna ipake i bas kebaktin, radu ras pirak, dingen emas si ibuatna i bas bangsa-bangsa si enggo italukenna,

¹²e me bangsa Edom, Moap, Amon, Pilisti ras Amalek ras sada bagin i bas barang rampasen i bas Hadadeser nari.

¹³Gelar Daud reh terberitana sanga ia mulih kenca munuh 18.000 kalak bangsa Edom i Baluren Sira. [16†]

¹⁴Ipajekkenna perkemahen tenterana i belang-belang Edom, janah bangsa Edom enggo jadi jajahenna. TUHAN si erbahanca maka Daud menang ku japa pe ia erperang.

¹⁵Daud merentah kerina Israel, janah tetap ijagana maka nandangi kerina rayatna tetap idalanken si adil ras bujur.

¹⁶Joap gelar nandena e me Seruya, ia me jadi puanglima tentera; Josapat anak Ahilud jadi bendahara kerajan.

¹⁷Sadok anak Ahitup ras Ahimelek anak Abiatar jadi imam; Seraya jadi sekretaris istana;

¹⁸Benaiah anak Joyada jadi kepala pengawal pribadi Daud. Janah anak-anak Daud si dilaki jadi imam.