Read Batak Karo 2 SAMUEL 9 Bible Online

2 SAMUEL 9 - Batak Karo bible

2 SAMUEL 9

¹I bas sada wari nungkun Daud, “Lit denga nge tading keluarga Saul? Adi lit kucidahken ateku keleng ateku erkiteken Jonatan.” [17†]

²Lit sekalak pelayan keluarga Saul gelarna Siba janah idilo ia ndahi Daud. “Kam Siba?” nina raja nungkunsa. “Aku Tuanku,” nina njabapsa.

³Isungkun raja ia nina, “Lit denga kang keluaga Saul tading? Adi lit ateku encidahken kesetianku ras keleng ateku, bagi si kupadanken man Dibata.” Nina Siba njabapsa, “Lit sekalak nari e me anak Jonatan si dilaki. Cempang ia.” [18†]

⁴“I ja ia?” nina raja nungkun. “I rumah Mahir anak Amiel i Lodebar,” nina Siba.

⁵E maka isuruh Raja Daud gelah ia reh.

⁶Kenca Mepiboset anak Jonatan kempu Saul enggo seh, erjimpuh ia i lebe-lebe Daud alu mehamat. Iperkuanken Daud ia, “Mepiboset.” Ngaloi ia nina, “Kai Tuanku?”

⁷“Ola mbiar,” nina Daud. “Kukelengi ateku kam erkiteken bapandu Jonatan. Kuulihken man bandu kerina taneh sikerajangen ninindu Saul, janah kam banci tetap man i istana.”

⁸Erjimpuh ka Mepiboset janah nina, “La kap aku ulin asa biang mate, Tuan! Engkai maka bage kal ulina kam man bangku?”

⁹Kenca bage idilo raja suruh-suruhen Saul, Siba gelarna, jenari nina, “Kubereken man Mepiboset, kempu tuanndu kerina sikerajangen Saul ras keluargana.

¹⁰Kam, anak-anakndu, ras suruh-suruhenndu arus nuani taneh e guna keluarga tuanndu Saul, janah pepulung ulihna man nakan keluarga tuanndu e. Tapi Mepiboset tetap kami ras man.” (Lit sepuluh lima kalak anak Siba dilaki janah suruh-suruhenna lit dua puluh kalak.)

¹¹Nina Siba njabapsa, “Kerina perentahndu tetap kudalanken raja.” Dage ras raja me si Mepiboset man, bali ras sekalak anak raja.

¹²Lit sekalak anak Mepiboset dilaki nguda denga, gelarna Miha. Kerina anggota keluarga Siba jadi suruh-suruhen Mepiboset.

¹³Dage Mepiboset si nahena duana cempang, ringan i Jerusalem tetap man i istana raja.