Read Batak Karo 1 RAJA-RAJA 1 Bible Online

1 RAJA-RAJA 1 - Batak Karo bible

1 RAJA-RAJA 1

¹Genduari Raja Daud enggo metua kal. E maka aminna piga-piga lapis pe ibahan suruh-suruhenna cabinna, mbergeh denga akapna lalap.

²E maka nina pegawaina man bana, “O Raja ma labo akapndu dalih bicara idarami kami sekalak singuda-nguda man temanndu si pekena-kena kam. Banci ia rembak medem ras kam gelah melas akapndu.”

³E maka idarami me i belang-belang Israel sekalak singuda-nguda mejile, janah ijumpai me i Sunem sekalak singuda-nguda si cocok, Abisah gelarna, e maka ibaba ia man raja.

⁴Singuda-nguda e seh kal jilena, janah ia jadi pelayan raja ras si pekena-kenasa, tapi raja la ersada kula ras ia.

⁵ [5-6] Genduari kenca Absalom enggo mate, anak Daud i bas ndeharana Hagit, si Adonia gelarna, e me anakna sintua si nggeluh denga. Ia sekalak dilaki mejile kal rupana. Ia la pernah ipandang Daud subuk kerna kai pe, janah merhat kal ia jadi raja. Isikapkenna guna dirina gereta ras kuda, ras si ngarakken ia rusur erdalan, lima puluh kalak teremna. [1†]

⁶

⁷Arih-arih ia ras Joap (nandena Seruya) bage pe ras Imam Abiatar, janah duana kalak enda setuju nampatisa nehken sura-surana e.

⁸Tapi Imam Sadok, ras Benaya anak Joyada, Nabi Natan, Simei, Rei, ras pengawal Daud la ikapitina Adonia.

⁹I bas sada wari Adonia erbahan persembahen. Igelehna biri-biri, jenggi lembu, ras anak lembu si mbur i Batu Nipe, deher ulu lau Enrogel. Iundangna kerina seninana ras pegawai-pegawai raja si asalna i Juda nari reh ku pesta man-man persembahen e,

¹⁰tapi seninana lain nande, Salomo, ras Nabi Natan, Benaya, ras pengawal raja la iundangna.

¹¹Kenca bage idahi Natan me Batseba nande Salomo, jenari isungkunna ia, “La kin ibegindu Adonia anak Hagit enggo iangkatna man bana jadi raja? Janah Raja Daud sitik pe la meteh kerna si e! [2†]

¹²Adi keleng atendu kesahndu ras kesah anakndu Salomo, kupedahken man bandu:

¹³Minterlah kam lawes ndahi Raja Daud jenari sungkun ia, nindu, ‘O, Raja, ma enggo kam erpadan man bangku maka anakku Salomo pagi nggantiken kam jadi raja? Engkai maka Adonia enggo jadi raja?’ ”

¹⁴Jenari itambahi Natan katana nina, “Kenca bage, asum kam sangana ngerana denga ras Raja Daud, reh aku bengket janah kuesahken katandu e.”

¹⁵E maka lawes Batseba ndahi raja ku kamar inganna medem. Enggo metua kal ia, janah Abisah, singuda-nguda i Sunem nari pekena-kenasa.

¹⁶Mungkuk kal Batseba i lebe-lebe raja, jenari isungkuni raja ia, “Kai atendu?”

¹⁷Ngaloi ia, “O, Raja, kam enggo erbahan padan man bangku i bas gelar TUHAN Dibatandu maka anakku Salomo me jadi raja nggantiken kam.

¹⁸Tapi Adonia enggo jadi raja, janah kam sitik pe la itehndu kerna si e.

¹⁹Enggo igelehna mbue jenggi lembu, biri-biri, ras anak lembu mbur man persembahen, janah iundangna kerina anak-anakndu si dilaki, Imam Abiatar ras Joap puanglima tenterandu ku pesta man-man e, tapi anakndu Salomo la iundangna.

²⁰O Raja, kerina bangsa Israel genduari sangana natap man bandu. Ikatakenndu dage man bana ise kin si tuhuna si nggantiken kam jadi raja.

²¹Adi la itetapkenndu genduari, kenca kam pagi mate la banci lang anakku Salomo ras aku minter iukum desken musuh bangsa enda.”

²²Asum Batseba ngerana denga Nabi Natan enggo seh i bas istana raja.

²³Iberitaken man raja maka nabi e reh ku istana, lawes Natan ku bas, janah mungkuk kal ia i lebe-lebe raja.

²⁴Kenca bage nina, “O Raja, enggo kin imomokenndu maka Adonia me pagi si nggantiken kam jadi raja?

²⁵I bas wari si sendah enda kal, enggo ia lawes, igelehna melala jenggi lembu, biri-biri ras anak lembu si mbur man persembahen. Iundangna kerina anakndu si dilaki, Joap puanglima tenterandu, ras Imam Abiatar, janah genduari paksana ia kerina erpesta man-man ras Adonia janah ersurak nina, ‘Mejuah-juah Raja Adonia!’

²⁶Tapi aku, Raja, bage pe Imam Sadok, Benaya, ntah pe Salomo la iundangna.

²⁷Setuju kin kam kerina si enda, janah la kin atendu iturikenndu sitik pe man pegawaindu ise si nggantiken kam jadi raja?”

²⁸Nina Raja Daud, “Dilo Batseba bengket mulihken.” E maka reh ia tedis i lebe-lebe raja.

²⁹Jenari nina raja man bana, “Erpadan aku man bandu erkite-kiteken TUHAN si nggeluh, si enggo mulahi aku i bas kerina kesusahenku nari,

³⁰maka sendah kusehken me padanku si enggo nai kubahan man bandu i bas gelar TUHAN, Dibata kalak Israel, maka anakndu Salomo la banci lang nggantiken aku pagi jadi raja.”

³¹Minter Batseba mungkuk, jenari nina man raja, “Nggeluhlah Tuanku Raja asa lalap!”

³²Kenca bage isuruh Raja Daud gelah idilo Imam Sadok, Nabi Natan, ras Benaya. Kenca ia bengket kerina,

³³ikataken raja man bana, “Babalah pegawai-pegawai istanangku ras kam. Suruh anakku Salomo ngersak kaldengku, jenari arakkenlah ia ku berneh ku ulu Lau Gihon.

³⁴I je Imam Sadok ras Nabi Natan arus namaken minak ku takalna nangkuhken ia jadi raja Israel. Kenca bage embus terompet ersuraklah nindu, “Mejuah-juahlah Raja Salomo!”

³⁵Arakken ka ia mulihken ku jenda gelah kenca seh kundul ia i bas kursi kinirajanku. Ia nggantiken aku jadi raja, sabap ia enggo kupilih ngerajai Israel ras Juda.”

³⁶“Jadi me bagi katandu e,” nina Benaya ngaloi, “janah TUHAN Dibatandulah netapkenca.

³⁷Bagi TUHAN enggo nemani Tuanku Raja, ia ka lah si nemani Salomo, janah ialah si erbahanca maka kinirajanna mulian asa kinirajanndu.”

³⁸E maka Sadok, Natan, Benaya, ras pengawal-pengawal raja namaken Salomo ku datas kelede Raja Daud, jenari iarakkenna ku ulu Lau Gihon.

³⁹Ibuat Imam Sadok ingan minak saitun si enggo ibabana i bas Kemah Perjumpan ras TUHAN nari, jenari iminakina Salomo. Iembus kalak ndai terompet, janah kerina rayat ersurak nina, “Mejuah-juahlah Raja Salomo!”

⁴⁰Kenca bage iarakkenna mulih, janahna ersurak meriah ras ngembus suling, megang sorana seh maka taneh pe kumetter ibahanna.

⁴¹Asum Adonia ras kerina temuena nandangi elah man i bas pesta e, ibegina sora si megang e. Janah kenca ibegi Joap sora terompet e nungkun ia nina, “Sora kai nge si gejek i bas kuta ah?”

⁴²Ope denga ngerana, reh Jonatan, anak Imam Abiatar. “Mari kubasken,” nina Adonia. “Kam kalak mehuli tentu kam maba berita si mehuli.”

⁴³“Labo,” nina Jonatan ngaloi. “Tuanta Raja Daud enggo ngangkat Salomo jadi raja.

⁴⁴Isuruhna Sadok, Natan, Benaya, ras pengawal-pengawal raja ngarakken ia. Kalak ndai namaken ia ku das kelede raja,

⁴⁵jenari iminaki Sadok ras Natan ia i ulu Lau Gihon. Kenca bage lawes kalak ndai ku kuta, ersurak-surak alu meriah, janah genduari rayat sangana ersurak-surak. E me sora gejek si sangana ibegindu.

⁴⁶Salomo kap genduari raja.

⁴⁷Lebih asa si e, pegawai-pegawai istana enggo reh ndahi tuanku Raja Daud nehken pasu-pasuna janah nina: ‘Dibatandulah si erbahanca maka Salomo lebih terberita asa kam, janah kinirajan Salomo lebih ermulia asa kinirajanndu.’ Kenca bage Raja Daud mungkuk i bas inganna medem nembah.

⁴⁸Janah ertoto: ‘Sipujilah TUHAN, Dibata Israel, si sendah enggo erbahan sekalak i bas kesusurenku nari nggantiken aku jadi raja, janah enggo ibereNa aku nggeluh ngidahsa!’ ”

⁴⁹E maka mbiar kerina temue Adonia, keke ia kerina jenari lawes sekalak-sekalak nepet dalinna.

⁵⁰Adonia, seh kal biarna man Salomo, lawes ku Kemah Perjumpan ras TUHAN jenari ijemakna tanduk batar-batar.

⁵¹Man Raja Salomo iberitaken maka Adonia mbiar man bana janah ia sangana njemak tanduk batar-batar nina, “Ersumpah min lebe Raja Salomo maka la atena munuh aku.”

⁵²Ngaloi Salomo, “Adi ia setia, selambar buk pe i bas takalna la banci ikuit, tapi adi lang la banci lang mate ia.”

⁵³Jenari Raja Salomo nuruh Adonia pesusur ia i das batar-batar nari. Lawes Adonia ndahi raja jenari mungkuk ia lebe-lebena, janah nina raja man bana, “Banci kam mulih ku rumah.”