Read Batak Karo 1 RAJA-RAJA 10 Bible Online

1 RAJA-RAJA 10 - Batak Karo bible

1 RAJA-RAJA 10

¹Ratu negeri Syeba megi berita kerna kemulian Salomo, jenari reh ia ku Jerusalem nguji-nguji ia alu penungkunen-penungkunen si mesera. [41†]

²Nterem ibabana pelayanna ras suruh-suruhenna, bage pe melala unta si maba rempah-rempah, batu permata, ras emas. Kenca ia jumpa, Salomo isungkunina alu kerina penungkunen si lit i bas ukurna.

³Ijabap Salomo kerinana, la lit sada pe si mesera akapna nerangkenca.

⁴Ibegi ratu Syeba kepentaren Salomo janah idahna istana si enggo ipajekkenna.

⁵Iidahna pangan si isikapken i bas mejana, perumahen pegawai-pegawaina, kiniraturen kalak si erdahin i bas istanana ras paken seragam si ipakena kerina, pelayan-pelayan si ngidangi ia man-man, ras persembahen-persembahen gelehen si ipersembahkenna i bas Rumah Pertoton. Kerina si e erbahanca jengang ia.

⁶Nina man Raja Salomo, “Kai si kubegi i negeringku kerna kam ras kepentarenndu tuhu nge kepe!

⁷Tapi la terteki aku e seh aku enggo reh janah ngidahsa alu matangku jine. Kepeken kai si kubegi e langa lit setengahna pe. Kepentarenndu ras kebayakenndu ndauh belinen asa si enggo ituriken kalak man bangku.

⁸Sangap me kerina ndeharandu! Janah sangap me pelayan-pelayanndu si rusur rembak ras kam, si banci megiken kepentarenndu!

⁹Terpujilah TUHAN, Dibatandu! Enggo icidahkenNa kuga ngena ateNa man bandu alu mahan kam jadi raja Israel. Perban kekelengenNa man Israel la ermasap-masap, enggo ibahanNa kam jadi rajana gelah banci ijagandu maka undang-undang ras keadilen tetap idalanken.”

¹⁰Iberekenna man Raja Salomo luah si enggo ibabana: emas lebih empat ribu kilo, rempah-rempah si seh kal buena, ras batu permata. Rempah-rempah si iberekenna ndauh buen asa si enggo pernah ialokenna, janah ndiganai pe lanai pernah bage buena ialokenna. (

¹¹Kapal-kapal Hiram, si maba emas i Opir nari pe maba kayu cendana ras batu permata.

¹²Kayu e ipake Salomo jadi bide i bas Rumah Pertoton ras i bas istana, ras erbahan kulcapi ras murdap man perende-ende. Enda denga nge kayu cendana si mehulina si pernah ibaba ku Israel, janah lanai pernah lit bage jilena.)

¹³Man ratu Syeba ibereken Raja Salomo kai si ipindona, tambah-tambah pemere biasa si debanna si iberekenna alu melumbar. Kenca bage mulih ratu Syeba ras pelayan-pelayan ras suruh-suruhenna ku negeri Syeba.

¹⁴Tiap tahun Raja Salomo ngaloken emas menam dua puluh telu ribu kilo,

¹⁵tambah-tambah pajak si igalari perbinaga, keuntungen i bas perbinagan nari ras tanggungen raja-raja Arab ras gubernur-gubernur daerah Israel tandana ia takluk man Salomo.

¹⁶Salomo erbahan dua ratus ampang-ampang galang, janah lapisina alu emas menam pitu kilo beratna.

¹⁷Tole ibahanna pe telu ratus ampang-ampang si terkitiken, janah ibahanna lapisna emas menam dua kilo beratna. Kerina ampang-ampang enda itamakenna i bas “Gedung Kerangen Libanon.”

¹⁸Isuruhna pe gelah ibahan sada kursi kinirajan si mbelin. Sada bagin ilapisi alu gading, selebihna ilapisi alu emas murni si mejilena.

¹⁹[19-20] Tangga kursi e lit enem tingkat janah i bas ujung tiap tingkat lit gambar singa, sepuluh dua kerina. Arah pudi kursi e lit gambar takal jenggi lembu, janah arah kawes ras kemuhen deherken ingan encibalken tan lit gana-gana singa. I bas kerajan apai pe la pernah lit kursi kinirajan si bage tempasna.

²¹Kerina cangkir man ingan minem Salomo ibahan i bas emas nari, janah si lit i bas “Gedung Kerangen Libanon” kerina emas murni. Pirak la lit ipake, sabap i bas jaman Salomo, pirak la iakap meherga.

²²Kapalna lit i bas lawit erlayar ras kapal-kapal Hiram. Telu tahun sekali mulih kapal e, maba emas, pirak, gading, bengkala ras kera.

²³Raja Salomo bayaken ras pentaren asa raja-raja si apai pe,

²⁴janah kerina doni enda merincuh reh megiken kepentaren si enggo ibereken Dibata man bana.

²⁵Kerina kalak si reh, maba luah man bana: barang pirak ras emas, baju jubah, senjata-senjata, rempah-rempah, kuda ras kelede. Si enda terus erdalan i bas tahun ku tahun.

²⁶Ipegegehi Salomo tenterana, alu pepulung seribu empat ratus gereta perang ras sepuluh dua ribu kuda perang. Deba ibahanna inganna i Jerusalem janah selebihna itamakenna i bas kuta-kuta si deban. [42†]

²⁷I bas masa pemerentahenna, pirak enggo soal biasa iakap kalak Jerusalem bali ras batu, janah kayu pinus si merim bali buena ras batang kayu ara biasa. [43†]

²⁸Agen-agen raja nukuri kuda i Musri ras Kilikia nari, [44†]

²⁹janah gereta perang i Mesir nari. Jenari kuda ras gereta perang e idayakenna man raja-raja Heti ras Siria; erga sada gereta perang 600 duit pirak janah erga kuda 150 duit pirak.