Read Batak Karo 1 RAJA-RAJA 11 Bible Online

1 RAJA-RAJA 11 - Batak Karo bible

1 RAJA-RAJA 11

¹Salomo erngena ate man nterem diberu-diberu bangsa-bangsa si deban. Seakatan puteri raja Mesir, iempoina ka diberu-diberu bangsa Heti ras diberu-diberu i Moap nari, Amon, Edom, ras Sidon. [45†]

²Iempoina kerina aminna gia enggo ipedahken TUHAN man bangsa Israel la banci erjabu ras bangsa-bangsa enda, sabap perbahanna pagi maka tertarik ukur bangsa Israel man dibata-dibata si deban. [46†]

³Lit pitu ratus puteri raja si iempoi Salomo janah lit ka pe telu ratus kalak gundikna. Si enda kerina erbahanca nilah Salomo i bas Dibata nari.

⁴Janah kenca ia enggo metua ibabai kalak ndai ia nembah man dibata-dibata bangsa si deban. La ia tetap erkemalangen ngikutken TUHAN Dibatana, bagi kepatuhen bapana Daud nai.

⁵Isembahna Dewi Astarte, sembah-sembahen kalak Sidon, ras Moloh, dibata-dibata bangsa Amon.

⁶Enggo erdosa ia man TUHAN janah la ibahanna bujur man baNa bagi si ibahan Daud bapana.

⁷I das deleng arah Timur Jerusalem ipajekkenna ingan ersembah man Kemos, dibata-dibata bangsa Moap ras ingan ersembah man Moloh, dibata Amon.

⁸Ipajekkenna ka pe ingan-ingan ersembah i ja kerina ndehara-ndeharana bangsa si deban banci nutung rempah-rempah si merim ras nehken persembahen man dibata-dibatana.

⁹[9-10] Aminna gia TUHAN, Dibata Israel, enggo encidahken bana man Salomo dua kali janah enggo ipedahkenNa man bana ola nembah man dibata-dibata si deban, la iikutken Salomo kata TUHAN, tapi nilah ia i bas TUHAN nari. E maka nembeh ate TUHAN man Salomo,

¹¹janah nina man Salomo, “Erkite-kiteken alu sengaja enggo ilanggarndu padandu ras Aku janah la ipakendu pedahKu, la banci lang Kubuat kerajan e i bas kam nari jenari Kubereken man sekalak i bas pegawai-pegawaindu nari.

¹²Amin bage gia, erkite-kiteken bapandu Daud, la Kulakoken enda sanga kam nggeluh denga, tapi asum pemerentahen anakndu.

¹³Janah la pagi Kubuat kerina kerajan e i bas ia nari, tapi kutadingken sada suku erkite-kiteken suruh-suruhenKu Daud janah erkite-kiteken Jerusalem kuta si enggo Kubahan jadi sikerajangenKu.”

¹⁴E maka ipekeke TUHAN ukur Hadat, sekalak kesusuren raja Edom, lako ngelawan Salomo.

¹⁵[15-16] Ndauh ope si e, kenca Daud enggo naluken Edom, Joap, puanglima tenterana enggo lawes ku je nguburken kalak mate. Ia ras tenterana tading i je enem bulan, janah kidekah e ibunuhna kerina dilaki i Edom,

¹⁷seakatan Hadat ras piga-piga kalak Edom si jadi suruh-suruhen bapana, si sempat lompat ku Mesir. (Asum si e Hadat anak-anak denga.)

¹⁸Itadingkenna Midian lawes ia ku Paran, i ja piga-piga kalak si deban reh ku ia jadi temanna. Jenari lawes ia ku Mesir, ijumpaina raja, iberekenna man Hadat taneh ras rumah bage pe nakanna.

¹⁹Ngena ate raja man Hadat, e maka iserehkenna man Hadat senina ndeharana Ratu Tahpenes.

²⁰Ipupusna sekalak anak dilaki, Genubat gelarna, jenari ibaba ratu anak e ku istana, janah i je ia ipebelin-belin ras anak-anak raja.

²¹Kenca seh berita man Hadat i Mesir maka Daud enggo mate bage pe Joap puanglima tentera lanai lit, ikataken Hadat man raja nina, “Berelah aku mulih ku negeringku.”

²²“Engkai?” nina raja nungkun. “Kurang kin iakapndu pemerengku bandu maka mulih atendu?” “Bere min aku mulih,” nina Hadat ngaloi man raja. Jenari mulih ia ku negerina. Hadat raja Edom musuh si jahat si erbahan ngilas ate bangsa Israel.

²³Reson anak Eliada pe ibahan Dibata ka maka ilawanna Salomo. Nai, Reson enggo lompat i bas tuanna nari, Hadadeser raja Soba,

²⁴jenari ia jadi peminpin gerombolen penjahat-penjahat. (Si enda jadi kenca Daud enggo naluken Hadadeser janah temanna kalak Siria, enggo ibunuhi Daud.) Reson ras teman-temanna lawes ku Damaskus jenari tading ia i je, i ja ia iangkat teman-temanna jadi raja Siria.

²⁵Ia musuh Israel kidekah geluh Salomo.

²⁶Kalak si deban si erkusur ngelawan Raja Salomo e me sekalak pegawaina, Jerobeam anak Nebat, i Sereda nari i Eperaim. Nandena enggo mbalu, Serua gelarna.

²⁷Enda me turi-turin pemberontakenna. Salomo sangana nambusi taneh i bas bagin si arah kenjulu Jerusalem janah ipekenana tembok kuta.

²⁸Jerobeam nguda denga megegeh dingen beluh, janah asum iperdiateken Salomo maka tutus atena erdahin iangkatna jadi si ngaturken kerina kerja paksa i daerah suku Manase ras Eperaim.

²⁹I bas sada wari, asum Jerobeam i bas perdalanen i Jerusalem nari, nabi Ahia i Silo nari, njumpai ia i tengah dalan i darat kuta.

³⁰Itangtangi Ahia baju jubah si mbaru ipakena, icaing-caingna jadi sepuluh dua bagin.

³¹Jenari nina man Jerobeam, “Buat man bandu sepuluh bagin, sabap TUHAN, Dibata Israel, ngataken man bandu: ‘Nandangi Kubuat me kerajan e i bas Salomo nari, jenari Kubereken man bandu sepuluh suku.

³²Sada suku tading i bas Salomo, erkite-kiteken suruh-suruhenKu Daud ras erkite-kiteken Jerusalem, kuta si Kupilih jadi sikerajangenKu belang-belang taneh Israel.

³³Si enda Kubahan, erkite-kiteken Salomo enggo nulak Aku janah enggo nembah man dibata-dibata si deban: Astarte, dewi bangsa Sidon; Kemos, dibata-dibata bangsa Moap; Moloh, dibata-dibata bangsa Amon. Salomo lanai ngikutken Aku, enggo ia erbahan salah, janah lanai ipakena Undang-undang ras pedahKu bagi si ibahan bapana Daud.

³⁴Tapi la kerina kerajan e Kubuat i bas Salomo nari, janah Kupelepas ia erkuasa kidekah ia nggeluh. Enda Kubahan erkite-kiteken suruh-suruhenKu Daud, kalak si Kupilih dingen si ngikutken Undang-undang ras pedahKu.

³⁵Kerajan e Kubuat pagi i bas anak Salomo nari, janah Kubereken sepuluh suku man bandu,

³⁶tapi Kupelepas sada suku tading i bas anak Salomo gelah lit i bas Aku sekalak i bas kesusuren suruh-suruhenKu Daud erkuasa i Jerusalem, kuta si enggo kupilih man ingan ersembah man bangKu.

³⁷Kubahan kam pagi jadi raja Israel, Jerobeam, maka irajaindu kerina daerah asa sura-sura pusuhndu.

³⁸Adi alu bulat ukurndu iikutkenndu Aku, nggeluh rikutken Undang-undangKu, janah ngelakoken si ngena ateKu alu erbahan kai si Kupedahken, bagi si ibahan suruh-suruhenKu Daud, e maka aku tetap ras kam. Kubahan kam pagi jadi raja Israel, janah kutetapken maka kesusurenndu la banci la jadi raja ka kenca kam, bali ras si enggo Kubahan man suruh-suruhenKu Daud.

³⁹Erkite-kiteken dosa Salomo, Kuukum kesusuren Daud, tapi la rasa lalap.’ ”

⁴⁰Janah erkite-kiteken si e ibunuh Salomo atena Jerobeam, tapi lompat ia ndahi Raja Sisak i Mesir janah i je ia ringan seh Salomo mate.

⁴¹Turi-turin si deban kerna perbahanen Salomo, kerna pendahinna ras kerna kepentarenna, kerina isuratken i bas kitap Sejarah Salomo.

⁴²Ia jadi raja kerina Israel i Jerusalem empat puluh tahun dekahna.

⁴³Mate ia janah ikuburken i Kuta Daud jenari anakna Rehabeam nggantiken ia jadi raja.