Read Batak Karo 1 RAJA-RAJA 12 Bible Online

1 RAJA-RAJA 12 - Batak Karo bible

1 RAJA-RAJA 12

¹Lawes Rehabeam ku Sikem, sabap enggo pulung kerina kalak Israel Utara i je guna ngerajaken ia.

²Kenca Jerobeam anak Nebat megi berita enda, mulih ia i Mesir nari. Gelgel e enggo ia lawes ku Mesir erkiteken lompat i bas Raja Salomo nari.

³Kalak Israel si ringan arah Utara nenahken ia, janah kenca si e ras-ras ia kerina lawes ndahi Rehabeam, janah nina man bana,

⁴“Mesera kal iakap kami ibahan bapandu Salomo, janah ibahanna mberat tanggungen kami. Adi ipenahangindu tanggungen si mberat enda janah adi ikurangindu dahin kami si mesera nggit kami patuh jadi rayatndu.”

⁵“Reh ka kam ku jenda telu wari nari gelah kubereken jabapku man bandu,” nina ngaloi. E maka lawes kalak e kerina.

⁶Jenari isungkuni Rehabeam kalak si tertuan asa ia si gelgel nari enggo erdahin jadi penasehat bapana Salomo. “Kai akapndu jabapku man rayat enda?” nina nungkun.

⁷Nina ngaloi, “Adi atendu erdahin guna bangsa enda alu mehuli, berekenlah jabap si mehuli man bana sue ras pemindona, e maka tentu ia pe pagi tetap erdahin man bandu alu patuh.”

⁸Tapi la iperdiatekenna pedah tua-tua e: lawes ia ndahi kalak si nguda si sebek-bek ras ia si genduari enggo jadi penasehatna.

⁹“Kai akapndu si mehulina kubahan?” nina nungkun. “Kai arus kukataken man rayat si mindo gelah tanggungenna ipenahangi?”

¹⁰Ngaloi ia kerina nina, “Enda me kai si arus ikatakenndu man bana, ‘Belinen kap kidel-kidelku asa awak bapangku!’

¹¹Kataken man bana, ‘Itamaken bapangku tanggungen si mberat man bandu, terberaten denga ka kubahan asa si e. Iligasna kam alu purih, kuligas kam alu cambuk kuda!’ ”

¹²Telu wari kenca si e Jerobeam ras kerina bangsa e reh ka ndahi Raja Rehabeam, sue ras si enggo ikatakenna man bana.

¹³La iperdiateken raja pedah tua-tua janah alu kata meser ngerana ia man bangsa e,

¹⁴sue ras si enggo inasehatken kalak si nguda. Nina, “Bapangku namaken tanggungen si mberat man bandu, terberaten denga ka kubahan asa si e. Iligasna kam alu purih, kuligas kam alu cambuk kuda!”

¹⁵Peraten TUHAN kap njadiken kai si enggo ikatakenna man Jerobeam anak Nebat arah Nabi Ahia anak kuta Silo. Enda me sabapna maka la sitik pe bangsa e iperdiateken raja.

¹⁶Kenca idah bangsa e maka la nggit raja megiken pemindona, isurakina ia nina, “Man kade kami pe lang Daud ras keluargana! Kai kin si enggo pernah ibahanna man kami? O kalak Israel, ota mulih kita! Pelepas Rehabeam ngurus dirina jine!” E maka berontak bangsa Israel. [47†]

¹⁷Daerah Juda nari ngenca tading jadi kerajan Rehabeam.

¹⁸Kenca bage Raja Rehabeam nuruh Adoniram, si ngurus kerja paksa, lawes ndahi kalak Israel, tapi ibenteri kalak ndai ia alu batu seh mate. Kenca jadi si enda, pedas-pedas Rehabeam nangkih ku das gereta perangna jenari lompat ia ku Jerusalem.

¹⁹Mulai i bas paksa e nari rayat si i bas kerajan Israel Utara enggo berontak ngelawan kesusuren Raja Daud.

²⁰Kenca enggo ibegi bangsa Israel maka Jerobeam enggo mulih i Mesir nari, iundangna ia ku bas perpulungen bangsa e, jenari ibahanna ia jadi raja Israel. Suku Juda ngenca si patuh man kesusuren Daud.

²¹Kenca seh Rehabeam i Jerusalem, ipepulungna 180.000 tentera si mbisana i bas suku Juda ras Benyamin nari. Lawes atena erperang guna majekken kuasana mulihken i bas suku-suku Israel Utara.

²²Tapi isuruh Dibata Nabi Semaya

²³nehken kata enda man Rehabeam ras man kerina kalak i bas suku Juda ras Benyamin,

²⁴“Ola iperangindu seninandu, bangsa Israel. Mulihlah kam kerina ku rumahndu. Kai si enggo jadi e, peratenKu kap.” Kerina ia ngikutken pedah TUHAN janah mulih ia kerina.

²⁵Ipeteguhi Jerobeam, raja Israel, benteng kuta Sikem i taneh deleng-deleng Eperaim janah i je me ia ringan kentisik. Kenca bage itadingkenna janah ipeteguhina ka kuta Penuel.

²⁶[26-27] Nina i bas ukurna, “Adi bagi si genduari enda kin, rayatku lawes ku Jerusalem, lako nehken persembahen i jah man TUHAN i bas Rumah Pertoton, sambar pagi ukurna, janah ikutkenna Rehabeam, raja Juda, jenari ibunuhna pagi aku.”

²⁸Kenca ia rukur kerna si e, ibahanna dua lembu emas, jenari nina man rayatna, “Enggo cukup ndekah kam lawes ku Jerusalem ersembah. O bangsa Israel, enda kap dibatandu si maba kam ndarat i Mesir nari!” [48†]

²⁹Itamakenna lembu emas e sada i Betel sada nari i Dan.

³⁰E maka erdosa me bangsa e; lawes ia nembah i Betel ras i Dan.

³¹Tole ipajekken Jerobeam ka ingan-ingan ersembah i datas uruk-uruk, janah iangkatna imam-imam i bas suku Lewi nari.

³²Jenari itetapken Jerobeam ka sada wari raya agama i bas wari si pesepuluh limaken, bulan si pewaluhken, bali ras wari raya i Juda. I das batar-batar i Betel ibahanna persembahen man lembu emas si enggo ibahanna, janah itamakenna i Betel imam-imam guna ertugas i bas ingan-ingan ersembah si enggo ipajekkenna. [49†]

³³Janah i bas wari si pesepuluh limaken, bulan si pewaluhken, i bas wari si enggo itentukenna, lawes ia ku Betel ibahanna persembahen i das batar-batar guna ngerayaken wari raya si enggo itetapken guna bangsa Israel.