Read Batak Karo 1 RAJA-RAJA 14 Bible Online

1 RAJA-RAJA 14 - Batak Karo bible

1 RAJA-RAJA 14

¹Tupung si e penakiten Abia anak Raja Jerobeam.

²Nina Jerobeam man ndeharana, “To sambari pakenndu gelah ola kam itandai kalak, jenari laweslah ku Silo, ingan Nabi Ahia tading, kalak si ngatakenca nai man bangku maka aku jadi raja Israel.

³Baba man bana sepuluh ngkibul roti, cimpa ras sada guci tengguli. Sungkuni ia kuga pagi jadina kerna anakta enda, janah tentu iturikenna man bandu.”

⁴E maka lawes ia ku rumah Ahia i Silo. Perban tuana, Ahia enggo pentang.

⁵Ope si e enggo ikataken TUHAN man Ahia maka ndehara Jerobeam sangana i bas perdalanen reh guna nungkun kerna anakna, si sangana sakit. Janah ituriken TUHAN man Ahia kai si man katanken. Kenca ndehara Jerobeam enggo seh, ipekulah-kulahna ia kalak si deban.

⁶Tapi asum ia i bas pintun denga enggo ibegi Ahia kerehenna, nina minter, “Mari kurumahken. Kutandai nge maka kam ndehara Jerobeam. Engkai maka ipekulah-kulahndu bandu tempa tempa kam kalak si deban? Lit i bas aku berita si la mehuli man bandu.

⁷Laweslah jenari turiken man Jerobeam kai si ikataken TUHAN, Dibata Israel man bana, ‘Kupilih kam jadi raja i tengah-tengah bangsa e nari, janah Kubahan kam erkuasa i bas bangsangKu Israel.

⁸Tapi la bagi suruh-suruhenku Daud, alu bulat ukur ngikutken Aku, make pedahKu, janah si ngena ateKu ngenca ibahanna.

⁹Dosa-dosandu ndauh belinen asa dosa-dosa kalak si erkuasa arah lebendu. Enggo itulakndu Aku janah enggo ipekekendu rawangKu alu erbahan gana-gana ras gana-gana besi si man sembah-sembahen.

¹⁰Erkiteken si e kuruntuhken kinirajanndu ras kesusurenndu janah kerina kesusurenndu si dilaki Kubunuh, nguda ntah metua. Kuambekken keluargandu la banci lang; isapui bagi sinapui kotoren biang. [51†]

¹¹Ise keluargandu si mate i bas kuta la banci lang ipangani biang, janah ise si mate i bas mbalmbal ipangani perik-perik. Aku kap TUHAN si enggo ngerana.’ ”

¹²Janah tole nina Ahia man ndehara Jerobeam, “Genduari mulihlah kam. Kenca kam kari seh i kuta, mate minter anakndu.

¹³Kerina bangsa Israel nangisisa ras nguburken ia. Ia ngenca i bas keluarga Jerobeam si ikuburken alu mehuli, sabap ia ngenca si ngena ate TUHAN, Dibata Israel.

¹⁴Itamaken TUHAN ateNa sekalak raja i bas Israel si ngkeriken kinirajan Jerobeam ras kesusurenna.

¹⁵Israel la banci lang iukum TUHAN, maka nggirgir ia bagi rengo si itendeng lau. Iruahna bangsa Israel i bas taneh si mehuli enda nari si enggo nai iberekenNa man nini-ninina, janah ikerapkenNa ku lepar Lau Eprat, sabap enggo ipekekena rawa TUHAN alu erbahan gana-gana Dewi Asera.

¹⁶TUHAN la banci lang nadingken Israel sabap Jerobeam enggo erdosa janah ibabaina bangsa Israel erdosa.”

¹⁷Mulih ndehara Jerobeam ku Tirsa. Kenca ia bengket ku bas rumahna, i je mate minter anakna ndai.

¹⁸Itangisi kalak Israel ia jenari ikuburkenna, bagi si enggo ikataken TUHAN arah suruh-suruhenNa, Nabi Ahia.

¹⁹Turi-turin si deban kerna perbahanen Raja Jerobeam, kuga ia erperang, kuga ia ndalanken pemerentahenna, kerina isuratken i bas kitap Sejarah Raja-raja Israel.

²⁰Dekahna Jerobeam jadi raja lit dua puluh tahun. E maka mate ia, jenari ikuburken, janah anakna Nadap nggantiken ia jadi raja.

²¹Asum Rehabeam anak Salomo, jadi raja Juda umurna empat puluh tahun, janah sepuluh pitu tahun dekahna ia erkuasa i Jerusalem, kuta si enggo itetapken TUHAN i bas kerina daerah Israel jadi ingan ersembah man baNa. Nande Rehabeam Naama sekalak diberu bangsa Amon.

²²Kalak Juda erdosa man TUHAN janah buen perbahanenna si erbahanca keke pernembeh ate TUHAN asa kerina si enggo ibahan nini-ninina nai.

²³Ibahanna ingan-ingan ersembah man dibata-dibata si palsu, ipajekkenna tiang-tiang batu ras gana-gana Asera si man sembahen i datas uruk-uruk ras i teruh batang kayu si mbelin. [52†]

²⁴Jahaten ka asa si e lit dilaki ras diberu si pendahinna erlua-lua i bas ingan-ingan ersembah kalak perbegu e. Kalak Juda ngelakoken kerina perbahanen si man kemelanken, si nai ilakoken bangsa si enggo ipelawes TUHAN i bas taneh e nari asum Israel reh ku daerah e. [53†]

²⁵I bas tahun pelimaken kerajan Rehabeam, kuta Jerusalem iserang Raja Sisak i Mesir nari. [54†]

²⁶Irampasna kerina barang-barang si meherga si lit i bas Rumah Pertoton ras i bas istana, ikut pe ampang-ampang emas si ibahan Salomo. [55†]

²⁷Guna nggantikenca, Raja Rehabeam erbahan ampang-ampang tembaga janah iendeskenna e kerina man pegawai-pegawai si ertanggung jawab njagai pintu gerbang istana.

²⁸Adi lawes raja ku Rumah Pertoton ipake pengawal-pengawal ampang-ampang ndai janah kenca e iulihkenna ku kamar penjagan.

²⁹Turi-turin si deban kerna kai si ibahan Raja Rehabeam isuratken i bas kitap Sejarah Raja-raja Juda.

³⁰Kidekah si enda Rehabeam ras Jerobeam tetap si perang-perangen.

³¹Jenari mate Rehabeam janah ikuburken i bas kuburen raja-raja i Kuta Daud. (Nandena e me Naama i Amon nari.) Anakna Abia nggantiken ia jadi raja.