Read Batak Karo 1 RAJA-RAJA 21 Bible Online

1 RAJA-RAJA 21 - Batak Karo bible

1 RAJA-RAJA 21

¹Deherken istana Raja Ahap i Jesreel lit sada peken anggur, Nabot empuna.

²I bas sada wari nina Ahap man Nabot, “Man bangkulah peken anggurndu e Nabot, sabap ndeher kal ras istanangku. Ateku nuani gule-gulen i je. Kubereken man bandu peken anggur si terulin jadi gantina. Ntah pe, adi bage atendu kugalari man bandu asa erga si patut.”

³Tapi ngaloi Nabot nina, “Erkiteken gelar TUHAN, pantang kal kubereken e man bandu, sabap taneh e pusaka nini-niningku kap.”

⁴Megi kata Nabot e, ndele dingen nembeh kal ate Ahap. Mulihken ia ku rumah, iamparkenna bana i bas ingan medem, isedingkenna ayona ku dingding, janah la ia nggit man.

⁵Jenari reh ndeharana Isebel ndahi ia nina, “Engkai maka ndele kal atendu? Engkai maka kam la nggit man?”

⁶Ngaloi ia nina, “Erkiteken cakap Nabot man bangku. Kutukur ateku peken anggurna, tah pe adi bage atena, kusambari alu si deban, tapi la ia nggit.”

⁷“Ma kam kin raja Israel?” nina Isebel erjabap. “Kekeken, ola atendu ndele, mankenlah. Aku muatca peken anggur Nabot e man bandu!”

⁸Kenca bage ibahan Isebel piga-piga surat, itekenna i bas gelar Ahap, isetempelna alu cap raja, jenari ikiremkenna man peminpin-peminpin ras man kalak si iergaken kalak i Jesreel.

⁹Bagenda me kata surat ndai, “Momokenlah sada wari puasa man rayat, janah suruh ia pulung kerina. I bas perpulungen e pekundul Nabot i bas ingan si mehaga.

¹⁰Suruh pe dua kalak jahat kundul petala-tala ras Nabot guna ngaduken ia maka enggo isumpahina Dibata ras raja. Kenca bage baba ia ku darat kuta, benteri alu batu seh mate.”

¹¹Perentah Isebel ndai minter ilakoken peminpin-peminpin ras kalak si iergaken kalak Jesreel.

¹²Imomoken kalak ndai sada wari puasa man rayat, isuruhna pulung, jenari i bas perpulungen e ipekundulna Nabot i bas ingan si mehaga.

¹³Dua kalak jahat kundul petala-tala ras Nabot, jenari ibahanna pengadun palsu kerna ia nina, “Nabot enggo numpahi Dibata ras raja.” E maka ibaba kalak ndai Nabot ku darat kuta, ibenterina alu batu seh mate.

¹⁴Kenca bage ikiremken kalak ndai berita man Isebel nina, “Nabot enggo mate ibenteri alu batu.”

¹⁵Kenca ialoken Isebel berita e, minter ikatakenna man Ahap, “Kekeken! To buat man bandu peken anggur Nabot si la nggit ndayakenca bandu e, sabap Nabot enggo mate.”

¹⁶E maka keke minter Ahap, lawes ia ku peken anggur e, ibahanna jadi sikerajangenna.

¹⁷Kenca bage nina TUHAN man Elia, nabi i Tisbe nari,

¹⁸“To jumpai Ahap, raja Israel i Samaria nari, idapetindu ia i bas peken anggur Nabot muat peken e jadi sikerajangenna.

¹⁹Turiken man bana maka Aku, TUHAN ngataken man bana, ‘Kenca ibunuhndu jelmana, irampasndu ka kin atendu ertana?’ Kataken man bana katangKu enda, ‘I ja mbarenda biang ndilati dareh Nabot, i bas ingan e pe darehndu idilatina!’ ”

²⁰Kenca Ahap ngidah Elia nina Ahap, “Enggo itundukndu aku, o musuhku?” “Enggo,” nina Elia erjabap. “Perban enggo idayakenndu bandu guna ngelakoken si jahat i lebe-lebe TUHAN,

²¹bagenda nina TUHAN man bandu, ‘Kudabuhken mara kelesa man bandu. Kumasapken kam, janah Kukeriken kerina dilaki i bas keluargandu nguda ntah metua.

²²PerbahanenKu man keluargandu bali ras perbahanenKu nandangi keluarga Raja Jerobeam anak Nabot ras keluarga Raja Baasa anak Ahia, erkiteken enggo ipekekendu rawangKu alu mabai Israel erdosa.’

²³Janah kerna Isebel, bagenda nina TUHAN, ‘Ipangani biang pagi maitna i bas Kuta Jesreel.’ [74†]

²⁴Keluargandu si mate i kuta, ipangani biang, janah si mate i mbalmbal ipangani perik-perik.” (

²⁵La pernah lit seri kalak bagi Ahap tutusna ngelakoken si jahat i bas adep-adepen TUHAN. Kerina kejahaten e ilakokenna bekas penjemba-jemba ndeharana Isebel.

²⁶Ibahanna dosa si man kemelanken tuhu-tuhu arah ersembah man berhala-berhala bali ras perbahanen kalak Amori si enggo ipelawes TUHAN asum kalak Israel nciati tanehna.)

²⁷Kenca dung Elia ngerana, icaingken Ahap uisna, itangtangina, jenari ipakena uis guni tandana erkadiola, janah erpuasa ia. Tupung medem pe ruis guni ia, janah adi erdalan serbut ayona.

²⁸Nina TUHAN man nabi Elia,

²⁹“Enggo nge idahndu kuga Ahap peteruk bana i lebe-lebengKu? Erkiteken si e, la Kudabuhken mara kelesa man bana kidekah ia nggeluh denga. I bas paksa pemerentahen anakna me pagi maka kudabuhken mara kelesa e.”