Read Batak Karo 1 RAJA-RAJA 4 Bible Online

1 RAJA-RAJA 4 - Batak Karo bible

1 RAJA-RAJA 4

¹Salomo raja kerina Israel,

²enda me pegawaina si erpangkat meganjang: Imam si mbelin: Asaria anak Sadok.

³Sekretaris kerajan: Elihorep ras Ahiya, duana anak Sisa. Juru tulis ras nimpan surat-surat: Josapat anak Ahilut.

⁴Puanglima tentera: Benaya anak Joyada. Imam-imam: Sadok ras Abiatar.

⁵Kepala gubernur-gubernur daerah: Asaria anak Natan Penasehat raja: Imam Sabut anak Natan.

⁶Kepala pelayan istana: Ahisar Si ngurus kerja paksa: Adoniram anak Apda.

⁷Salomo ngangkat sepuluh dua kalak gubernur daerah i negeri Israel. Gubernur-gubernur enda arus ngelitken pangan i bas daerahna nari guna raja ras kerina isi istana, i ja setiap kalak ertanggung jawab guna sada bulan i bas sada tahun.

⁸Si tersurat arah teruh enda me gelar-gelar gubernur si sepuluh dua kalak ras daerah tugasna: Ben-Hur: taneh deleng-deleng Eperaim.

⁹Ben-Deker: Kota-kota Makas, Salbim, Bet-Semes, Elon, ras Bet-Hanan.

¹⁰Ben-Heset: Kota-kota Arubot ras Sako ras kerina daerah Heper.

¹¹Ben-Abinadap, si ngempoi anak Raja Salomo, Tapat: kerina daerah Dor.

¹²Baana anak Ahilut: Kota-kota Taanak, Megido, ras kerina daerah deher Bet-Sean, deher kuta Saretan, arah Selatan kuta Jesreel, seh ku kuta Abel Mehola ras kuta Jokneam.

¹³Ben-Geber: Kuta Ramat i Gileat, ras kuta-kuta i Gileat si jadi sikerajangen terpuk Jair, sekalak kesusuren Manase, ras daerah Argop i Basan, enem puluh kuta kerinana, si ibentengi alu tembok ras jarikjak tembaga i bas pintu gerbangna.

¹⁴Ahinadap anak Ido: daerah Mahanaim.

¹⁵Ahimas, si ngempoi Basmat, sekalak i bas anak-anak Raja Salomo: daerah Naptali.

¹⁶Baana anak Husai: Daerah Aser ras Kuta Bealot.

¹⁷Josapat anak Para: daerah Isakar.

¹⁸Simei anak Ela: daerah Benyamin.

¹⁹Geber anak Uri: daerah Gileat, si enggo nai iperentah Sihon, raja kalak Amori ras Og raja Basan. I babo si sepuluh dua kalak enda lit sekalak gubernur guna kerina negeri e.

²⁰Penduduk Juda ras Israel teremna bagi kersik i tepi lawit; cukup panganna ras inemenna, janah meriah akapna.

²¹Kerajan Salomo kerina bangsa i Lau Eprat nari seh ku taneh Pilisti ras ku perbalengen Mesir. Kerina bangsa e nggalar pajak man bana, dingen tetap i teruh kuasana kidekah ia nggeluh. [11†]

²²Perbekalen si iperluken Salomo tiap wari lima ribu liter tepung si mejilena ras sepuluh ribu tepung biasa;

²³sepuluh lembu mbur, dua puluh lembu si ipermakani i mbalmbal, ras seratus biri-biri; tambah si e lit denga ka belkih, balua, napuh, ras bangsa manuk si ipiara.

²⁴Salomo erkuasa i belang-belang taneh si arah Barat Lau Eprat, mulai i Tipsah nari i tepi Lau Eprat seh ku kuta Gasa. Kerina raja-raja si arah Barat Eprat lit i teruh kuasa Salomo, janah la ia rubat ras kerajan-kerajan isekelewetna.

²⁵Kidekah ia nggeluh, kerina rayat i belang-belang Juda ras Israel nggeluh aman, tep-tep keluarga lit batang anggurna ras batang arana.

²⁶Karang kuda Salomo lit empat puluh ribu, ipergunaken man ingan kuda si narik gereta perangna ras sepuluh dua ribu kuda-ersaken tentera. [12†]

²⁷Gubernur-gubernurna si sepuluh dua kalak e, sekalak-sekalak i bas sada bulan si enggo itetapken man bana, ngelitken pangan si iperluken Raja Salomo ras man kerina kalak si man i bas istana. Kerina gubernur-gubernur e tetap ngelitken kai si iperluken.

²⁸Bage pe gandum ras batang gandum guna kuda si narik gereta perang ras asuh-asuhen si deban, isikapken gubernur e sekalak-sekalak, i ja iperluken.

²⁹Dibata mereken kepentaren mesangat ras perukuren si mbages man Salomo, ras pemeteh si la tersipati ganjangna.

³⁰Kepentaren Salomo ngelebihi kerina kalak pentar i Timur nari ntah pe kalak pentar i Mesir nari.

³¹Ia me si pentarna i bas kerina manusia: pentaren asa Etan kalak Esrah, asa Heman, Kalkol ras Darda, anak-anak Mahol, janah terberita gelarna ku kerina negeri i sekelewetna. [13†]

³²Isuratkenna telu ribu kuan-kuanen ras lebih seribu ende-enden. [14†]

³³Ngasup ia ercakap kerna kayu-kayu ras sinuan-sinuan, mulai i bas batang pinus si merim si turah i Deleng Libanon nari seh ku dukut isop si turah i bas lingling. Ngasup ia ercakap kerna rubia-rubia, perik-perik, kerna rubia-rubia si njoler, ras nurung.

³⁴Raja i belang-belang doni megi kerna kepentarenna, janah isuruh raja-raja e kalak megiken Salomo.