Read Batak Karo 1 RAJA-RAJA 6 Bible Online

1 RAJA-RAJA 6 - Batak Karo bible

1 RAJA-RAJA 6

¹Empat ratus waluh puluh tahun kenca bangsa Israel nadingken Mesir, i bas tahun si peempatken asum Salomo erkuasa i Israel, i bas bulan si peduaken, bulan Sip, Salomo mulai erbahan Rumah Pertoton.

²Arah bas gedangna dua puluh pitu meter, belangna siwah meter, janah ganjangna sepuluh telu setengah meter.

³Serambi dalan bengket empat setengah meter bertengna janah gedangna siwah meter, bali ras belang Rumah Pertoton e.

⁴Dingding Rumah Pertoton e melala lubang anginna; lubang e kitiken arah darat asa arah bas.

⁵Arah darat dingdingna, arah kawes-kemuhen ras arah pudi Rumah Pertoton e, ibahan kamar-kamar si ertingkat telu. Tiap tingkat ganjangna dua seperlima meter.

⁶Tiap kamar i bas tingkat si arah teruhna belangna dua seperlima meter. Tingkat si peduaken belangna 2,7 meter, janah tingkat si arah datasna belangna 3,1 meter. Dingding Rumah Pertoton e i bas tiap lante nipesen asa dingding si lit i bas lante si arah teruhna; e maka kamar e banci leket ku dingding, aminna la gia ibahan beloti penahanna.

⁷Batu si ipake guna majekken Rumah Pertoton e enggo dung isikapken i bas ingan muat batu-batu e, e maka lanai lit terbegi gejek sora martel, kapak, ntah pe sora perkakas besi si debanna asum Rumah Pertoton e ipajekken.

⁸Dalan bengket ku bas kamar tingkat si arah teruhna e me arah samping Selatan Rumah Pertoton e, janah ku tingkat si peduaken ras si peteluken lit tanggana.

⁹Bage me idungi Raja Salomo Rumah Pertoton e. Ipasangna langit-langitna alu beloti ras papanna si ibahan i bas kayu pinus si merim nari.

¹⁰Kamar si ertingkat telu si ibahan arah darat dingding Rumah Pertoton e, tiap tingkat ganjangna 2,2 meter, ipersada ku dingding e alu beloti kayu pinus si merim.

¹¹Nina TUHAN man Salomo,

¹²“Adi ikutkenndu Undang-undangKu ras pedahKu, Kusehken man bandu kai si enggo Kupadanken man bapandu Daud.

¹³Ringan Aku i tengah-tengah bangsangKu Israel janah ndigan pe la Kutadingken bangsangKu.”

¹⁴Bage me enggo dung ipajekken Salomo Rumah Pertoton e.

¹⁵Arah bas dingding Rumah Pertoton e ilapisi alu papan kayu pinus si merim mulai i bas lante nari seh ku langit-langit janah lantena kayu pinus biasa.

¹⁶Sada kamar si arah bas, igelari Ingan si Badiana kal, ibahan arah ujung Rumah Pertoton e. Gedangna siwah meter janah ibelat alu papan kayu pinus si merim i lante nari terus ku langit-langit. [17†]

¹⁷Kamar si lit i lebe-lebe Ingan si Badiana kal gedangna sepuluh waluh meter.

¹⁸Lapisen papan kayu pinus si merim e ihiasi alu ukiren-ukiren gambar labu ras bunga si terlak: kerina bagin si arah bas itutupi alu pinus si merim, e maka batu dingding e la teridah.

¹⁹Arah ujung Rumah Pertoton e ibahan sada bilik, i je me Peti Perpadanen TUHAN arus itamaken.

²⁰Kamar si enda gedangna siwah meter, belangna siwah meter, janah ganjangna siwah meter, kerina ilapisi alu emas murni. Batar-batar ilapisi alu papan kayu pinus si merim.

²¹Arah bas Rumah Pertoton e ilapisi alu emas, janah rante emas itamaken arah lebe-lebe dalan bengket kubas kamar si arah ujung ndai janah kamar e pe ilapisi alu emas.

²²Kerina bagin si arah bas Rumah Pertoton e ilapisi alu emas, bage pe batar-batar si lit i bas Ingan si Badiana kal. [18†]

²³Dua gana-gana mahluk si erkabeng si ibahan i bas kayu saitun nari, si itamaken i bas Ingan si Badiana kal, ganjangna 4,4 meter. [19†]

²⁴[24-26] Duana seri belinna ras bentukna. Kabengna dua, tep-tep kabeng gedangna 2,2 meter. Dauhna i ujung sada kabeng nari ku ujung kabeng si sada nari 4,4 meter.

²⁷Ia itamaken petingtang i bas Ingan si Badiana kal, dua i bas kabengna si ikirbangkenna e sikenan i tengah-tengah bilik e, janah kabeng si dua nari ngkenai dingding.

²⁸Patung mahluk si erkabeng si dua e ilapisi alu emas.

²⁹Dingding-dingding kamar si mbelin ras kamar si arah ujung kerina ihiasi alu ukiren gambar-gambar mahluk si erkabeng, batang kurma, ras bunga-bunga si terlak.

³⁰Lantena pe ilapisi alu emas.

³¹Sada pintun buka dua si ibahan i bas kayu saitun nari ipasang i bas dalan bengket kubas Ingan si Badiana kal; pintunna arah das lengkung-telap.

³²Pintun-pintun e ihiasi alu ukiren gambar-gambar mahluk si erkabeng, gambar batang kurma, ras gambar bunga-bunga si terlak. Pintun-pintun, gambar mahluk si erkabeng ras gambar batang kurma e ilapisi alu emas.

³³Guna dalan bengket ku bas kamar si mbelin ibahan sada rangka pintun i bas kayu saitun nari, bentukna segi empat.

³⁴Pintunna lit dua, duana pintu lipat si ibahan i bas kayu pinus biasa nari.

³⁵Janah ihiasi alu ukiren gambar-gambar mahluk si erkabeng, batang kurma ras bunga-bunga si terlak, si ilapisi rata alu emas.

³⁶I lebe-lebe Rumah Pertoton e ibahan sada kesain si idingdingi alu batu, i ja i bas tiap telu lapis batu itamaken sada lapis beloti kayu pinus si merim.

³⁷Palas Rumah Pertoton e icibalken i bas bulan si peduaken, bulan Sip, i bas tahun si peempatken pemerentahen Raja Salomo.

³⁸I bas bulan si pewaluhken, bulan Bul, i bas tahun si pesepuluh sadaken pemerentahen Raja Salomo Rumah Pertoton enggo dung kerina ibahan sue kal ras si enggo irencanaken. Pitu tahun dekahna Salomo majekken Rumah Pertoton e.