Read Batak Karo 1 RAJA-RAJA 7 Bible Online

1 RAJA-RAJA 7 - Batak Karo bible

1 RAJA-RAJA 7

¹Ipajekken Salomo ka pe sada istana man bana, janah si enda sepuluh telu tahun dekahna maka dung.

²[2-3] Gedung “Kerangen Libanon” gedangna empat puluh empat meter, belangna dua puluh dua meter, janah ganjangna 13,5 meter. Binangunna i bas kayu pinus si merim nari, lit telu baris, sepuluh lima tiap baris, ras beloti kayu pinus si merim ipakuken ku je. Langit-langitna i bas kayu pinus si merim nari, terus ku kamar-kamarna, itatang binangun ndai.

⁴I bas dingdingna si arah kawes ras kemuhen lit telu baris jendela.

⁵Pintunna ras jendela-jendelana kerina segi empat, janah jendela-jendela si telu baris i bas sada dingding, petingtang ras jendela-jendela si telu baris dingding si sada nari.

⁶“Ruang tiang-tiang” gedangna dua puluh dua meter janah 13,5 meter belangna. Arah lebe lit serambina si ertarum, melala tiangna.

⁷“Ruang Kursi Kinirajan”, igelari ka pe “Gedung Pengadilen”, ingan Salomo mutusken perkara-perkara, ilapisi alu papan kayu pinus si merim mulai i bas lantena nari terus ku rusukna.

⁸Gedung ingan Salomo tading, i bas kesain si deban arah pudi “Gedung Pengadilen” e, bali ibahan ras gedung-gedung si deban. Rumah si bage ka tempasna ipajekkenna ka man kemberahenna, putri raja negeri Mesir e. [20†]

⁹Kerina gedung-gedung enda, subuk kesain si mbelang e, ibahan i bas batu si mejile nari, mulai i bas palasna nari terus ku ujung paspasenna i das. Kerina batu e enggo dung isikapken lebe i bas ingan muatca janah ipotong rikutken ukurenna, jenari arah darat ras arah bas ipelinangi alu gaji.

¹⁰Palasna ibahan i bas batu si galang nari si enggo isikapken i bas ingan muatca, deba telu setengah meter gedangna, deba empat meter.

¹¹I babo batu palas e itamaken batu si deban, si ipotong rikutken ukurenna, ras beloti-beloti kayu pinus si merim.

¹²Kesain istana, kesain Rumah Pertoton e dingdingna batu, i ja i bas tiap telu lapis batu, itama beloti kayu pinus si merim.

¹³Isuruh Raja Salomo kalak ngelegi Hiram, tukang si ringan i kuta Tirus, si beluh kal erbahan barang-barang tembaga.

¹⁴Bapana i Tirus nari, tapi enggo mate. Ia pe seh kal beluhna erbahan barang-barang tembaga. Nandena i bas suku Naptali nari. Hiram tukang si beluh dingen erpengalamen. Ialokenna undangen Raja Salomo guna itugasken erbahan kerina barang-barang tembaga si man bahanen.

¹⁵Ituang Hiram dua tiang tembaga, tiap tiang ganjangna waluh meter janah kelilingna 5,3 meter, jenari itamakenna i bas dalan bengket ku bas Rumah Pertoton e.

¹⁶Jenari ibahanna ka pe dua takal tiang silit ukirenna i bas tembaga nari, tiap takal tiang ganjangna 2,2 meter, guna itamaken i babo tiang-tiang tembaga ndai.

¹⁷Ujung tiap tiang ihiasi alu rante si ipiuh,

¹⁸ras dua baris buah galiman tembaga.

¹⁹Kepala tiang tembaga ndai bentukna bagi bunga bakung, ganjangna 1,8 meter,

²⁰janah itamaken i bas ujung tiang e, i babo ukiren rante-rante ndai. Lit dua ratus ukiren galiman i bas dua baris i sekelewet tiap takal tiang.

²¹Tiang tembaga si dua e itamaken Hiram i lebe-lebe dalan bengket kubas Rumah Pertoton: tiang si arah Selatan igelari Jahin, janah tiang si arah Utara igelari Boas.

²²Kepala tiang tembaga si bagi bunga bakung e lit i babo tiang-tiang e. Bage me dahin erbahan tiang-tiang tembaga e idungi.

²³Hiram erbahan tong mecengke i bas tembaga nari, bagesna 2,2 meter, garis tengahna 4,4 meter janah kelilingna 13,2 meter.

²⁴I sekelewet biber tong e arah darat lit dua baris labu tembaga, si ituang ersada ras tong e.

²⁵Tong e icibalken i babo gurung sepuluh dua jenggi lembu tembaga si ngala ku darat, janah tiap telu lembu ersada pengalana.

²⁶Dingding tong e 75 millimeter kapalna. Biber tong e bali ras biber piala, janah lempir ku darat bagi bunga bakung. Isi tong e lit kira-kira empat puluh ribu liter.

²⁷Sepuluh gereta tembaga pe ibahan Hiram; gedangna 1,8 meter sada, belangna 1,8 meter janah ganjangna 1,3 meter.

²⁸Kerina gereta e ibahan i bas papan-papan si segi empat si ipasang i bas bingke-bingke beloti,

²⁹janah i bas papan-papan e lit gambar-gambar singa, jenggi lembu, ras mahluk si erkabeng; i babo bingkena e, datasen ras teruhen singa-singa ras jenggi lembu e, lit gambar-gambar timbul bagi bunga si terlak.

³⁰Tiap gereta lit empat roda tembagana janah asna pe tembaga. I bas sukina empatna lit tembaga penatang sada baskom; penatangna e ihiasi alu gambar-gambar timbul bagi bunga si terlak.

³¹I bas ujungna lit sada bingke si mecengke guna baskom e, njurnjur ku das empat puluh lima sentimeter i babo tepi gereta e nari janah sepuluh waluh sentimeter i jenari ku bas. I sekelewetna lit gambar-gambar ukiren.

³²Roda-roda ndai ganjangna enem puluh enem sentimeter; kerina i teruh papan ndai, janah asna ersada ras gereta e.

³³Bentuk roda-roda e bagi roda gereta perang; asna, bingkena, jari-jarina, ras kepala kambingna kerina tembaga.

³⁴I bas sukina si arah teruh empatna, lit empat tiang penatang gereta e, si ersada ras gereta e.

³⁵I babo tiap gereta e lit bagi gendit, belangna dua puluh dua sentimeter; tiang-tiang penatangna ras papan-papan ndai kerina ersada ras gereta e.

³⁶Tiang-tiang penatangna ras papan-papanna ihiasi alu gambar-gambar mahluk si erkabeng, singa ras batang kurma, asa siatna, alu gambar-gambar bunga i sekelewetna.

³⁷Bagenda me dage gereta ndai ibahan; kerina seri, belinna seri, janah bentukna pe seri.

³⁸Tole pe ibahan Hiram ka sepuluh baskom, sada guna tiap gereta. Tiap baskom garis tengahna 1,8 meter, janah isina kira-kira 800 liter. [21†]

³⁹Lima i bas gereta e itamakenna arah Selatan Rumah Pertoton e, janah si lima nari arah Utara; tong tembaga ndai itamakenna i bas sukina si arah Tenggara.

⁴⁰ [40-45] Tambah si e ibahan Hiram ka kudin, sendok-sendok si galang, ras mangkuk. Idungina kerina dahinna man Raja Salomo guna Rumah Pertoton TUHAN. Enda me kerina si ibahanna: Dua tiang galang. Dua takal tiang bentukna bagi mangkuk i babo tiang-tiang e. Hiasen bentukna bagi rante ipiuh i bas tep-tep takal tiang. Empat ratus buah galiman tembaga, i bas dua baris, seratus tiap baris i sekelewet tiap takal tiang. Sepuluh gereta. Sepuluh baskom. Tong. Sepuluh dua jenggi lembu tembaga si natang tong e. Kudin, sendok-sendok si galang, mangkuk-mangkuk. Kerina peralaten Rumah Pertoton enda, si ibahan Hiram man Raja Salomo ibahan i bas tembaga nari ipelas seh melinang.

⁴¹

⁴²

⁴³

⁴⁴

⁴⁵

⁴⁶Kerinana isuruh raja ibahan i bas ingan penuangen barang-barang besi kelang-kelang Sukot ras Saretan, i Baluren Lau Jordan.

⁴⁷Barang-barang enda sada pe la isuruh Salomo gelah itimbang, erkite-kiteken mbuesa man timbangen, e maka labo iteh beratna.

⁴⁸Barang-barang emas guna peralaten Rumah Pertoton e pe isuruh Salomo gelah ibahan: batar-batar, meja roti si man persembahenken man Dibata, [22†]

⁴⁹sepuluh nahe lampu si pajek i lebe-lebe Ingan si Badiana kal, lima arah Selatan janah lima arah Utara; bunga-bunga, lampu-lampu, ras jepit-jepit; [23†]

⁵⁰cangkir-cangkir, penjepit sumbu lampu mangkuk-mangkuk, piring-piring ingan rempah-rempah si man tutungen, ras talam ingan ngangkat arang si sangana merara; bage pe engsel-engsel pintu Ingan si Badiana kal ras engsel-engsel pintu Rumah Pertoton si arah darat. Kerina peralaten enda ibahan i bas emas nari.

⁵¹Kenca idungi Raja Salomo kerina dahin i bas Rumah Pertoton e, itamakenna ku bas kamar erta-erta kerina barang-barang si enggo iserapken bapana Daud man TUHAN -- pirak, emas, ras barang-barang si deban. [24†]