Read Batak Karo 1 RAJA-RAJA 8 Bible Online

1 RAJA-RAJA 8 - Batak Karo bible

1 RAJA-RAJA 8

¹Kenca bage isuruh Raja Salomo kerina peminpin suku ras terpuk kalak Israel reh ndahi ia i Jerusalem gelah Peti Perpadanen TUHAN ibaba i Sion, Kuta Daud nari, ku Rumah Pertoton e. [25†]

²Kerina ia pulung tupung Wari Raya Kemah i bas bulan Etanim. [26†]

³Kenca enggo pulung kerina pertua-pertua e, iangkat imam-imam me Peti Perpadanen e,

⁴jenari ibaba ku Rumah Pertoton. Kemah Perjumpan ras TUHAN pe ibaba kalak Lewi ras imam-imam ku Rumah Pertoton, rikut ras kerina alat-alatna.

⁵Raja Salomo ras kerina bangsa Israel pulung i lebe-lebe Peti Perpadanen janah ipersembahkenna mbue biri-biri ras lembu, la terbeligai perban buena.

⁶Kenca bage ibaba imam-imam Peti Perpadanen e ku Rumah Pertoton jenari itamakenna i bas Ingan si Badiana kal, i teruh mahluk-mahluk si erkabeng.

⁷Kabengna si ikirbangkenna nutupi Peti e ras lanja-lanjana.

⁸Ujung lanja-lanjana e banci ise pe ngidahsa adi ia tedis rembang i lebe-lebe Ingan si Badiana kal, tapi adi i bas ingan si deban nari la teridah. (Lanja-lanja e sendah pe i je denga.)

⁹Kai pe la lit i bas Peti Perpadanen e seakatan papan batu si dua lambar si itamaken Musa ku bas i Deleng Sinai, asum TUHAN erbahan perpadanen ras bangsa Israel sanga ia ndarat i Mesir nari. [27†]

¹⁰Bage itadingken imam-imam Rumah Pertoton e, rempet reh embun ndemisa, [28†]

¹¹ersinalsal alu terang si mesilo tanda kerehen TUHAN, janah lanai ngasup imam-imam e mulihken ku bas ndahiken dahinna.

¹²Kenca bage ertoto Salomo nina, “O TUHAN, enggo itamakenNdu matawari i langit, tapi enggo ipilihNdu inganNdu i bas embun ras i bas ingan si gelap. [29†]

¹³Genduari enggo kupajekken sada rumah man baNdu, jadi inganNdu seh rasa lalap.”

¹⁴Sanga bangsa e tedis i je erkusur Raja Salomo ngalakenca, jenari ipindona pemasu-masu Dibata man bangsa e.

¹⁵Nina, “Terpujilah TUHAN, Dibata Israel! Enggo isehkenNa padan si enggo ibahanNa man bapangku Daud, asum ikatakenNa,

¹⁶‘Mulai Aku maba bangsangKu ndarat i Mesir nari, langa lit sada kuta pe Kupilih i belang-belang taneh Israel man ingan majekken Rumah Pertoton i ja Aku isembah. Tapi enggo Kupilih kam, Daud, guna ngerajai bangsangKu.’ ” [30†]

¹⁷Nina Salomo tole, “Bapangku Daud ersura-sura majekken Rumah Pertoton man TUHAN, Dibata Israel, [31†]

¹⁸tapi nina TUHAN, ‘Mehuli nge kuakap min sura-surandu man bangKu,

¹⁹tapi labo kam si majekkenca. Tapi anakndu, anak ipupusndu jine nge si majekken Rumah PertotonKu.’ [32†]

²⁰Janah genduari enggo isehken TUHAN padanNa. Enggo kugantiken bapangku jadi raja Israel, janah enggo kupajekken Rumah Pertoton guna ingan ersembah man TUHAN, Dibata Israel.

²¹Tole enggo kusikapken sada ingan i bas Rumah Pertoton e guna Peti Perpadanen isina papan batu perpadanen si ibahan TUHAN ras nini-nininta sanga itaruhkenNa ndarat i Mesir nari.”

²²Kenca bage, i lebe-lebe bangsa e kerina lawes Salomo tedis ku lebe-lebe batar-batar. I je iangkatna tanna

²³ertoto ia, “TUHAN, Dibata Israel, la lit dibata si bagi Kam subuk i langit i das, ntah pe i doni i teruh! IsehkenNdu padanNdu man bangsaNdu janah icidahkenNdu kekelengenNdu asum ia nggeluh ngikutken kataNdu alu bulat ukurna.

²⁴Enggo isehkenNdu padan si ibahanNdu man bapangku Daud, sendah tiap perkatan enggo isehkenNdu.

²⁵Janah genduari, TUHAN, Dibata Israel, ertoto aku gelah isehkenNdu ka pe padan si deban si ibahanNdu man bapangku asum ikatakenNdu man bana maka tetap lit sekalak i bas kesusurenna nari erkuasa jadi raja Israel, adi alu tutus ikutkenna kataNdu bagi si ibahan bapangku. [33†]

²⁶E maka genduari, O Dibata Israel, berelah maka jadi kerina si enggo ipadankenNdu man bapangku Daud, suruh-suruhenNdu.

²⁷Tapi O Dibata, tuhu banci kin Kam ringan i doni enda? Kerina langit pe kitiksa man inganNdu, e maka kuga nge ndia maka banci siat kam ringan i bas Rumah Pertoton si kupajekken enda? [34†]

²⁸TUHAN, Dibatangku, aku kap suruh-suruhenNdu. Begikenlah pertotonku, janah berelah pemindon si ku sehken man bandu sendah.

²⁹Nehenlah Rumah Pertoton enda suari ras berngi ingan si enggo ipilihNdu man ingan ersembah. Begikenlah aku asum ngala ku Rumah Pertoton enda janah ertoto. [35†]

³⁰Begikenlah pertotonku ras pertoton bangsaNdu sanga ia ngala ku ingan enda janah ertoto. I bas rumahNdu i Surga begiken min kami janah alemilah kami.

³¹Adi lit kalak si ituduh erbahan kesalahen man kalak si deban jenari ibaba ku batar-batarndu i bas Rumah Pertoton enda guna ngangkat sumpah maka ia la ersalah.

³²O TUHAN, begikenlah i Surga nari janah bahanlah bagi bujur man suruh-suruhenNdu kerina. Ukumlah kalak si ersalah sue ras kesalahenna janah benarkenlah kalak si bujur.

³³Adi bangsaNdu Israel italuken musuh-musuhna erkite-kiteken erdosa man baNdu, janah adi kenca si e erkusur ia mulihken man baNdu jenari reh ia ku Rumah Pertoton enda, alu merendeh mindo pengalemi dosa i bas Kam nari,

³⁴begikenlah ia i Surga nari. Alemilah salah bangsaNdu, janah taruhkenlah mulihken ku taneh si enggo iberekenNdu man nini-ninina.

³⁵Adi udan lanai ibereNdu ndabuh ku teruh erkite-kiteken bangsaNdu erdosa man baNdu, janah adi kenca si e jera ia jenari ngala kempak Rumah Pertoton enda, alu merendeh ertoto man baNdu,

³⁶begikenlah i Surga nari. Alemilah dosa-dosa raja ras dosa-dosa bangsa Israel. Ajarlah ia kerina erbahan kai si benar. Jenari O TUHAN, pesusurlah udan ku tanehNdu enda, taneh si enggo iberekenNdu man bangsaNdu jadi sikerajangenna.

³⁷Adi lit kelihen i taneh enda, ntah adi reh penakit ngkenai nterem jelma, ntah ulih juma icedaken angin si melas ntah labang si mbue, ntah adi bangsaNdu iserang musuh-musuhna, ntah adi lit penakit kai gia i tengah-tengahna,

³⁸begikenlah pertotonna. Adi apai gia i bas bangsandu nari erkite-kiteken tergejap i bas ia ate ceda, iangkatna tanna kempak Rumah Pertoton enda ertoto,

³⁹begikenlah pertotonna. Begikenlah ia i bas rumahNdu i Surga, alemilah ia, jenari sampatilah. Kam ngenca metehsa perukuren si lit i bas pusuh manusia. Bahan Kamlah man tiap jelma bagi patutna,

⁴⁰gelah bangsaNdu banci ngikutken Kam i bas gedang-gedang geluhna i bas taneh si enggo iberekenNdu man nini-nini kami.

⁴¹ [41-42] Adi lit bangsa si deban ringan i bas taneh si ndauh megi berita kerna kemulianNdu ras perbahanen-perbahanenNdu, jenari reh nembah man baNdu janah ertoto i bas Rumah Pertoton enda,

⁴²

⁴³begikenlah pertotonna i Surga, i ja Kam ringan. Begikenlah ia janah bahanlah man bana bagi si ipindona man baNdu, gelah kerina bangsa i doni enda nandai Kam janah ngikutken Kam, bagi si ibahan bangsaNdu Israel. I je ietehna maka Rumah Pertoton si enggo kupajekken enda me ingan ersembah man baNdu.

⁴⁴Adi iperentahkenNdu bangsaNdu lawes erperang ngelawan musuh-musuhna jenari ertoto ia man baNdu, janah ngala ia kempak kuta si enggo ipilihNdu enda ras kempak Rumah Pertoton si enggo kupajekken man baNdu enda,

⁴⁵begikenlah ia i Surga, janah berekenlah man bana kemenangen.

⁴⁶Adi erdosa bangsaNdu man baNdu sabap la kap lit manusia si la erdosa, janah erkite-kiteken rawaNdu ipelepasNdu ia italuken musuh-musuhna jenari tertaban ia, ibaba musuhna ia ku taneh si deban, aminna ndauh gia taneh e,

⁴⁷begikenlah pertoton bangsaNdu. Adi i bas taneh e jera ia jenari ertoto man baNdu, janah ngaku ia maka enggo kepe ia erdosa ras erbahan si jahat kidekah enda, begikenlah pertotonna, O, TUHAN.

⁴⁸Adi i bas taneh e tuhu dingen alu ate tutus robah ia, jenari ertoto ia man baNdu asum ia ngala kempak taneh enda si enggo iberekenNdu man nini-nini kami, ku kuta si enggo ipilihNdu enda, ras Rumah Pertoton si enggo ku pajekken man baNdu enda,

⁴⁹adi bage begikenlah pertotonna kerina. IrumahNdu i Surga begikenlah ia janah mekuah min ateNdu man bana kerina.

⁵⁰Alemilah kerina dosana ras pemberontakenna man baNdu, janah bahanlah maka mehuli perbahanen musuh-musuhna man bana.

⁵¹BangsaNdu jine kap ia, si enggo ibabaNdu ndarat i Mesir nari, ginuhur si melas e.

⁵²O TUHAN si Erkuasa, tatapNdu min rusur alu ate keleng bangsaNdu Israel ras rajana, janah begikenlah pertotonna adi ia erlebuh man baNdu mindo penampat.

⁵³I bas kerina bangsa-bangsa nari ipilihNdu ia jadi bangsa sikerajangenNdu, bagi si enggo ikatakenNdu man bana arah suruh-suruhenNdu Musa asum ibabaNdu nini-nini kami ndarat i Mesir nari.”

⁵⁴Kenca Salomo dung ertoto man TUHAN, tedis ia i lebe-lebe batar-batar, i je ndube nari ia erjimpuh dingen ngangkat tanna ku das.

⁵⁵Alu sora megang ipindona pemasu-masun Dibata man kerina bangsa e si pulung i je. Nina,

⁵⁶“Pujin man TUHAN si enggo mereken dame man bangsaNa sue ras si enggo ipadankenNa. Enggo isehkenNa kerina padan si mehuli si enggo ibahanNa arah suruh-suruhenNa si Musa. [36†]

⁵⁷TUHAN Dibata ras kita gelah, bagi nai ia ras nini-nininta; rasa lalap kita itemaniNa, la kita itadingkenNa;

⁵⁸Ialah si erbahanca maka kita erkemalangen man baNa, gelah tetap si geluhken geluhta sue ras sura-suraNa, dingen nehken kerina Undang-undang ras pedah si enggo iberekenNa man nini-nininta.

⁵⁹Iinget TUHAN Dibatantalah pertoton enda ras kerina pemindonku man baNa. Mekuahlah ateNa rusur man bangsa Israel ras man rajana, sue ras keperlunna kerina tep-tep wari.

⁶⁰Janah erkite-kiteken si e kerina bangsa i doni meteh maka TUHAN ngenca Dibata, la lit si deban.

⁶¹O kam bangsaNa, tetaplah bulat ukurndu man TUHAN, Dibatanta, dingen ngikutken kerina Undang-undang ras pedahNa, bagi ibahanndu sendah.”

⁶²Kenca bage Raja Salomo ras kerina bangsa e si i je erbahan Persembahen gelehen man TUHAN.

⁶³Ipersembahkenna 22.000 lembu ras 120.000 biri-biri jadi persembahen pengalemi dosa. Bage me raja ras kerina bangsa e mengket ras mpersembahken Rumah Pertoton e.

⁶⁴I bas wari e pe ipebadiaken raja bagin si i tengah-tengah kesain, si i lebe-lebe Rumah Pertoton e, janah kenca e ipersembahkenna i je persembahen-persembahen gelehen si itutung bulat-bulat, persembahen buah gandum ras tabeh-tabeh rubia-rubia guna persembahen pengalemi dosa. Enda ibahanna erkite-kiteken batar-batar tembaga e kitiksa man ingan kerina persembahen e.

⁶⁵I bas Rumah Pertoton e, Salomo ras kerina bangsa Israel ngerayaken Wari Raya Kemah pitu wari dekahna. Nterem kal jelma si reh i bas ingan si ndauh nari, seh ku dalan Hamat i Utara ras ku perbalengen Mesir i Selatan.

⁶⁶I bas wari si pewaluhken isuruh Salomo bangsa e mulih. Kerina kalak mujiken raja janah mulih alu ukur meriah erkite-kiteken kerina si mehuli si enggo ibereken TUHAN man suruh-suruhenNa Daud ras man Israel, bangsaNa.