Read Batak Karo 2 RAJA-RAJA 1 Bible Online

2 RAJA-RAJA 1 - Batak Karo bible

2 RAJA-RAJA 1

¹Kenca kematen Ahap raja Israel, negeri Moap berontak ngelawan Israel.

²I bas sada wari ndabuh Ahasia raja Israel, i das tarum istanana nari i Samaria, janah mekelek kal akapna. Erkiteken si e isuruhna piga-piga kalak persuruhen nungkuni Baalsebub dibata-dibata kalak Pilisti si lit i Kuta Ekron, guna meteh malem denga ia tah lang.

³Tapi sekalak malekat TUHAN nuruh Elia nabi i Tisbe nari njumpai persuruhen Raja Ahasia e guna nungkuni, “Engkai maka isungkunndu atendu Baalsebub, dibata Kuta Ekron? La kin akapndu lit Dibata i Israel maka bage perbahanenndu?

⁴Turiken man Raja Ahasia maka enggo ikataken TUHAN, ‘Lanai kam keke i bas ingan medemndu nari, mate kam la banci lang!’ ” Ilakoken Nabi Elia bagi si iperentahken TUHAN man bana,

⁵jenari mulih minter persuruhen ndai ndahi raja. Nungkun raja nina, “Engkai maka kam mulihken?”

⁶Ngaloi persuruhen e nina, “Lit ndai sekalak dilaki njumpai kami; isuruhna kami mulih ras nuriken maka TUHAN enggo ngataken man bandu, ‘Engkai maka isuruhndu persuruhen nungkuni Baalsebub, dibata Kuta Ekron? La kin lit Dibata i Israel maka bage perbahanenndu? Lanai kam keke i bas ingan-medemndu nari, mate kam la banci lang!’ ”

⁷“Uga rupana dilaki e?” nina raja nungkun.

⁸“Ia make jubah kulit rubia-rubia, ibentingkenna benting kulit,” nina persuruhen e ngaloi. “Elia kap e!” nina raja. [1†]

⁹Kenca bage isuruh raja sekalak kepala tentera ras lima puluh kalak tenterana ngelegi Elia. Idapeti kepala tentera ndai Elia sangana kundul i das uruk-uruk. Nina man Elia, “O kam suruh-suruhen Dibata iperentahken raja gelah kam nusur.”

¹⁰Erjabap Elia nina, “Adi suruh-suruhen Dibata kin aku, nusur gelah api i langit nari munuh kam ras tenterandu!” Minter reh api i datas nari mbunuh kepala tentera ndai ras anak buahna. [2†]

¹¹Isuruh raja ka kepala tentera si deban ras lima puluh kalak tenterana. Lawes ia nangkeng, jenari nina man Elia, “O suruh-suruhen Dibata, iperentahken raja gelah minter kam nusur!”

¹²Erjabap ka Elia nina, “Adi suruh-suruhen Dibata kin aku nusur gelah api i langit nari munuh kam ras tenterandu!” E maka minter ka reh api Dibata i datas nari, mbunuh kepala tentera e ras anak buahna.

¹³Isuruh raja ka sekali nari sekalak kepala tentera ras lima puluh kalak tenterana. Lawes ia ku das uruk e, kenca bage minter ia erjimpuh i lebe-lebe Elia, janah alu mengis-ngis mindo ia man Elia, “O suruh-suruhen Dibata, mekuah min atendu man bangku ras man anak buahku. Kelengilah min kesah kami!

¹⁴Kepala tentera si dua e ras anak buahna enggo mate ipan api i langit nari, tapi mekuahlah min atendu man bangku!”

¹⁵Nina malekat TUHAN man Elia, “Raslah kam ku rumah ola kam mbiar.” Kenca bage lawes Elia ras kepala tentera ndai ndahi raja.

¹⁶Nina Elia man raja, “Enda me kata TUHAN, ‘Erkiteken isuruhndu persuruhen nungkun Baalsebub dibata kuta Ekron tempa-tempa la lit Dibata i Israel si man sungkunen. E maka kam lanai keke i bas inganndu medem nari; mate kam la banci lang!’ ”

¹⁷Jenari mate Ahasia, sue ras si kata TUHAN arah Nabi Elia. Erkiteken anak Ahasia la lit dilaki, seninana Joram ngantiken ia jadi raja Israel. Tupung e Jehoram anak Josapat enggo tahun peduaken jadi raja i Juda.

¹⁸Kerina perbahanen si deban si ilakoken Raja Ahasia isuratken i bas kitap Sejarah Raja-raja Israel.