Read Batak Karo 2 RAJA-RAJA 12 Bible Online

2 RAJA-RAJA 12 - Batak Karo bible

2 RAJA-RAJA 12

¹Kenca pitu tahun dekahna Jehu jadi raja i Israel, Joas jadi raja i Juda. Dekahna ia erkuasa i Jerusalem lit empat puluh tahun. Nandena Sibiah i Kuta Berseba nari.

²Kidekah geluhna idalankenna si ngena ate TUHAN, erkiteken imam Joyada ngajari ia.

³Aminna bage gia, ingan-ingan ersembah kalak perbegu la icedaken. E maka terus nge kalak erbahan persembahen gelehen ras nutung kumenen i je.

⁴Joas ndilo imam-imam janah iperentahkenna man kalak e guna nimpan duit si igalarken kalak asum ia erbahan persembahen i bas Rumah Pertoton, e me kap adangen si igalari kalak guna persembahen si wajib ras duit pemere arah ukur meriah. [20†]

⁵Tep-tep imam ertanggung jawab kerna duit si ipersembahken kalak si reh man bana asum ia ertugas, janah duit e ipake guna pehuli Rumah Pertoton, asa perluna.

⁶Tapi enggo pe pedua puluh telu tahunken Joas jadi raja langa ka bo ipekena imam-imam Rumah Pertoton e.

⁷E maka isuruhna Joyada ras imam-imam si deban ngadap man bana, jenari isungkunna kalak e nina, “Engkai maka la ipehulindu Rumah Pertoton? Mulai genduari nari lanai kam si nimpan duit si ialokenndu; arus iendeskenndu, gelah Rumah Pertoton e banci ipehuli.”

⁸Payo iakap imam-imam kerna si e, bage pe setuju kalak e maka la ia pekena Rumah Pertoton e.

⁹Kenca bage ibuat Joyada sada peti, ibahanna lubangna i bas tutupna, e maka itamakenna peti e deherken batar-batar, arah kemuhen adi kalak bengket ku Rumah Pertoton e. Imam-imam si ertugas i lebe-lebe pintun namaken kerina duit si ibereken kalak si ersembah ku bas peti e.

¹⁰Adi enggo melala duit i bas peti e, reh pegawai raja ras Imam si Mbelin, ibeligaina duit e, jenari ipunjutna i bas gajut-gajut.

¹¹Kenca isuratkenna buena duit e, e maka iendesken man mandur si ngurus dahin i bas Rumah Pertoton e. Duit e ipergunaken guna nggalari upah tukang kayu, tukang bangunen,

¹²tukang tembok, ras tukang ukir batu, guna nukur papan ras batu si ipake i bas dahin e, ras nggalari perbelanjan si iperluken.

¹³Tapi duit e la lit sitik pe ipake guna erbahan cangkir pirak, mangkuk, terompet, ntah perkakas si ipake guna ngurus lampu, ntah pe barang-barang si deban si ibahan i bas pirak ntah emas nari.

¹⁴Duit e kerina ipake guna nggalari upah tukang ras nukur barang-barang si ipake guna pekena Rumah Pertoton e.

¹⁵Kalak si ertugas ngurus dahin e tuhu-tuhu bujur i bas kai-kai pe, e maka labo perlu mindo perkiran man bana. [21†]

¹⁶Duit si ibereken guna persembahen tebusen ras persembahen kerna dosa la isimpan i bas peti e; si e jadi sikerajangen imam-imam. [22†]

¹⁷Tupung si e Raja Hasael i Siria nari merang Kuta Gat janah italukenna kuta e. Kenca bage iputuskenna ka guna merang Jerusalem.

¹⁸Erkiteken si e ibuat Joas, raja Juda, kerina persembahen si enggo ipersembahken raja-raja si enggo leben asa ia, e me Josapat, Jehoram, ras Ahasia, janah itambahina ka pe alu persembahenna jine, bage pe kerina emas si lit i bas perbendaharan Rumah Pertoton ras istana, jenari ikiremkenna man Raja Hasael. E maka la surung iperang Hasael kuta Jerusalem.

¹⁹Kerina si debanna si ilakoken Raja Joas isuratken i bas kitap Sejarah Raja-raja Juda.

²⁰ [20-21] Pegawai Raja Joas erpekat ngelawan ia. Dua i bas pegawaina e, e me kap Josakar anak Simeat ras Josapat anak Somer munuh ia i bas sada rumah si ipajekken i babo taneh tambusen arah Timur kuta Jerusalem i bas dalan si ngincuah ku kuta Silla. Joas ikuburken i bas kuburen raja-raja i bas Kuta Daud, jenari anakna Amasia nggantiken ia jadi raja.