Read Batak Karo 2 RAJA-RAJA 13 Bible Online

2 RAJA-RAJA 13 - Batak Karo bible

2 RAJA-RAJA 13

¹Kenca dua puluh telu tahun dekahna Joas anak Ahasia jadi raja i Juda, Jehoahas anak Jehu jadi raja i Israel. Dekahna ia jadi raja i Samaria lit sepuluh pitu tahun.

²Bali ras Raja Jerobeam si jadi raja ope denga ia, Jehoahas pe erdosa man TUHAN janah ibabaina pe Israel erdosa; la pernah ingadikenna lagu langkahna si jahat.

³Erkiteken si e nembeh TUHAN man Israel, e maka iberena Raja Hasael i Siria nari ras anakna Benhadat terus naluken Israel.

⁴Kenca bage ertoto Jehoahas man TUHAN. Ngidah kuga sangatna pendedeh raja Siria nandangi kalak Israel, ibegiken TUHAN pertoton Jehoahas.

⁵Isuruh TUHAN sekalak peminpin man bangsa Israel mbebasken ia i bas bangsa Siria nari, e maka mulihken ka bangsa Israel nggeluh alu dame bagi si gelgelna.

⁶Tapi langa ingadiken kalak e erbahan dosa bagi Raja Jerobeam si mabai kalak Israel erdosa, tapi lalap idalankenna. E maka gana-gana Dewi Asera tetap tading i Samaria.

⁷Tentera Jehoahas lanai lit si tading, seakatan lima puluh kalak si erkuda, sepuluh gereta perang, ras sepuluh ribu tentera si erdalan nahe, erkiteken tentera si debanna enggo ikernepken raja Siria, idedehina bagi abu.

⁸Kerina si debanna si ilakoken Jehoahas ras perbahanenna si nuduhken kinimbisanna isuratken i bas kitap Sejarah Raja-raja Israel.

⁹Ia mate ras ikuburken i Samaria, jenari anakna Jehoas nggantiken ia jadi raja.

¹⁰Kenca telu puluh pitu tahun dekahna Joas jadi raja Juda, jadi raja me Jehoas anak Jehoahas i Israel. Dekahna ia erkuasa i Samaria lit sepuluh enem tahun.

¹¹Ia pe erdosa man TUHAN, erkiteken iusihna lagu-langkah Raja Jerobeam si jahat, si mabai Israel erdosa.

¹²Kerina si debanna si ilakoken Jehoas subuk kinimbisanna i bas perang ngelawan Raja Amasia i Juda nari isuratken i bas kitap Sejarah Raja-raja Israel.

¹³Jehoas mate ras ikuburken i bas kuburen raja-raja i Samaria, jenari anakna Jerobeam II nggantiken ia jadi raja.

¹⁴Sakit Nabi Elisa penakitna enda me maba kematenna. Asum ia sakit e, reh Raja Jehoas i Israel nari ndahi ia. Janahna tangis nina Jehoas man Elisa, “O, bapa, bapangku! Kam kap gelgel nari si kawal Israel si mbisa!” [23†]

¹⁵“Buat panah ras piga-piga anak panahna,” nina Elisa merentahken ia. E maka ibuat Jehoas.

¹⁶Isuruh Elisa ia gelah sikap ia manahken panahna. Bage ka ibahan raja. E maka itamaken Elisa duana tanna ku tan raja.

¹⁷Kenca bage, sue ras perentah nabi e, italangi raja jendela si ngala kempak Siria. “Panahkenlah anak panah e!” nina Elisa. Kenca ipanahken raja anak panah e, minter nina nabi e man raja, “Kam kap anak panah TUHAN, janah kam ipake TUHAN guna naluken Siria. Ilawanndu me kalak Siria e i Apek seh italukenndu kerina.”

¹⁸Kenca bage isuruh Elisa ka raja muat anak panah si deban ndai. “Pekpeklah taneh alu e!” nina Elisa man raja. Ipekpek raja taneh alu anak panah e telu kali, kenca bage ingadikenna.

¹⁹Ngidah si e merawa Elisa, janah nina man raja, “Arusna kin ipekpekndu lima ntah enem kali, janah alu bage keri kal min ndai italukenndu kalak Siria e; tapi genduari telu kali ngenca ia italukenndu.”

²⁰Kenca e mate me Elisa jenari ikuburken. Tiap tahun biasa reh gerombolen kalak Moap ngerampasi negeri Israel.

²¹Sekali jadi, asum lit acara penguburen, teridah ka sada gerombolen e. E maka ibenterken kalak mait e ku bas kuburen Elisa jenari kiam ia kerina. Kenca mait ndai kena ku tulan-tulan Elisa, kalak si mate ndai nggeluh mulihi, e maka tedis ia.

²²Kidekah pemerentahen Jehoahas, kalak Israel tuhu-tuhu itindih Raja Hasael i Siria nari.

²³Tapi mesayang dingen mekuah ate TUHAN man bangsa e. La ibereNa kalak e ikernepken, tapi isampatiNa, erkiteken perpadanen si ibahanNa ras Abraham, Isak, ras Jakup. La pernah ilupakenNa bangsaNa.

²⁴Tupung kematen Raja Hasael i Siria nari, anakna Benhadat nggantiken ia jadi raja.

²⁵Kenca bage Raja Jehoas naluken Benhadat telu kali janah idatna mulihi kuta-kuta si enggo ibuat Benhadat asum pemerentahen Jehoahas bapa Jehoas.