Read Batak Karo 2 RAJA-RAJA 16 Bible Online

2 RAJA-RAJA 16 - Batak Karo bible

2 RAJA-RAJA 16

¹Kenca sepuluh pitu tahun dekahna Pekah anak Remalia jadi raja Israel, jadi raja ka Ahas anak Jotam i Juda.

²Paksa e umurna dua puluh tahun, janah dekahna ia erkuasa i Jerusalem lit sepuluh enem tahun. Ia la ngikutken usihen si mehuli si ibahan ninina Raja Daud, tapi ilakokenna kai si la ngena ate TUHAN Dibatana.

³Iikut-ikutna perbahanen raja-raja Israel. Terlebih-lebih pe ipersembahkenna anakna si dilaki jadi persembahen tutungen man berhala-berhala, lako ngusih adat si melket i bas penduduk negeri e, si enggo ipelawes TUHAN asum kalak Israel ku je. [28†]

⁴I bas ingan-ingan kalak perbegu ersembah, i das uruk-uruk, ras i teruh batang kayu si merabun, Ahas mpersembahken persembahen gelehen ras nutung kumenen.

⁵Raja Resin i Siria nari ras Raja Pekah i Israel nari reh merang Jerusalem dingen ikepungna kuta e, tapi la tertalukenca Ahas. [29†] (

⁶Paksa e pe, ikuasai raja Edom ka mulihken Kuta Elat, dingen ipelawesna kalak Juda si ringan i je. Kuta Elat iingani kalak Edom, janah tetap denga ia ringan i je.)

⁷Kenca bage isuruh Ahas piga-piga kalak njumpai Tiglat Pileser, raja Assur e alu tenah enda, “Aku me suruh-suruhenndu si patuh. Rehlah kam, pulahi aku i bas raja Siria ras Israel nari, si sangana merang aku.”

⁸Ibuat Ahas pirak ras emas i bas Rumah Pertoton ras i bas perbendaharan istana nari jenari ikiremkenna man raja e jadi pemere.

⁹Sue ras pemindon Ahas, berkat Tiglat Pileser ras tenterana ku Damaskus: italukenna kuta e, ibunuhna Raja Resin, jenari ibabana rayatna ku Kir jadi tabanen.

¹⁰Asum Raja Ahas lawes ku Damaskus njumpai Raja Tiglat Pileser, idahna batar-batar si lit i jah. E maka ikiremkenna gambar batar-batar e man Imam Uria, seh ku bagin si kitik-kitikna pe.

¹¹E maka ipajekken Uria sada batar-batar seri ras si e, janah enggo dung ibahanna ope denga Ahas reh mulihken.

¹²Tupung ia mulih i Damaskus nari idah Ahas batar-batar e enggo dung,

¹³e maka itutungna rubia-rubia persembahen ras persembahen pangan i babo batar-batar e, dingen iamburkenna anggur persembahen ras dareh persembahen persadan i babona.

¹⁴Batar-batar tembaga si enggo iendesken man TUHAN inganna kelang-kelang batar-batar si mbaru e ras Rumah Pertoton. Erkiteken si e ipiserken Ahas batar-batar tembaga e ku Utara batar-batarna si mbaru e. [30†]

¹⁵Kenca bage iperentahkenna Uria nina, “Pakelah batar-batarku si galang enda man ingan persembahen tutungen erpagi-pagi ras persembahen pangan karaben bage pe man ingan persembahen tutungen ras persembahen pangan raja ras jelma si nterem, ras man ingan anggur persembahen jelma si nterem. Amburkenlah ku je dareh kerina asuh-asuhen si ipersembahken. Tapi batar-batar tembaga e aku saja ngenca banci makesa guna ertendung.”

¹⁶E maka ilakoken Uria bagi si iperentahken raja e.

¹⁷Ipesirang Raja Ahas gereta tembaga si ipake i bas Rumah Pertoton, iaguina baskom-baskom si lit i babona; ibuatna pe kudin tembaga i bas gurung lembu tembaga si sepuluh dua e, jenari itamakenna i babo binangun batu. [31†]

¹⁸Janah guna muat ukur Raja Assur ipindahken Ahas pe i bas Rumah Pertoton e nari ingan pajek kursi kinirajan, ras itutupna pe dalan bengket si khusus man raja guna bengket ku bas Rumah Pertoton e.

¹⁹Kerina si debanna si ilakoken Raja Ahas isuratken i bas kitap Sejarah Raja-raja Juda.

²⁰Mate Ahas, jenari ikuburken i bas kuburen raja-raja i Kuta Daud, janah anakna Hiskia nggantiken ia jadi raja. [32†]