Read Batak Karo 2 RAJA-RAJA 17 Bible Online

2 RAJA-RAJA 17 - Batak Karo bible

2 RAJA-RAJA 17

¹Kenca sepuluh dua tahun dekahna Raja Ahas erkuasa i Juda, jadi raja ka Hosea anak Ela i Israel. Dekahna ia erkuasa i Samaria lit siwah tahun.

²Erdosa ia man TUHAN, tapi la bali kal bagi raja-raja ope denga ia.

³Raja Salmaneser i Assur nari reh merang ia; talu Hosea ibahan Salmaneser e maka tiap tahun arus igalarina pajak man Salmaneser.

⁴Tapi sekali jadi isuruh Hosea suruh-suruhen ngadap So raja Mesir, mindo penampat man bana. Janah la igalarina pe utangna si tep-tep tahun man Assur. Kenca tereteh man Salmaneser, iperentahkenna nangkap Hosea, jenari itamakenna i bas penjara.

⁵Kenca bage iperang Salmaneser negeri Israel janah ikepungna Samaria. Kenca telu tahun ikepungna,

⁶e me i bas tahun pesiwahken pemerentahen Raja Hosea, Samaria italuken raja Assur. Ibabana kalak Israel ku Assur jadi tabanen, janah deba ringan i kuta Hala, deba deher Lau Habor i bas daerah Gosan, janah deba nari i bas kuta-kuta kalak Media.

⁷Samaria ndabuh man musuh erkiteken kalak Israel enggo erdosa man TUHAN Dibatana, si mulahi ia i bas raja Mesir nari janah ibabaina ndarat i Mesir nari. Isembah kalak Israel dibata-dibata si deban,

⁸ikutkenna adat bangsa si ipelawes TUHAN asum bangsaNa ngasak kalak e, janah adat si ipetandaken raja-raja Israel ijadikenna jadi adatna.

⁹Kalak Israel ngelakoken perkara-perkara si la payo iakap TUHAN, Dibatana. Ipajekkenna ingan-ingan ersembah man kalak perbegu i bas kerina kutana, mulai i bas kuta si kitikna nari seh ku kuta si mbelinna.

¹⁰I das kerina uruk-uruk ras i teruh tep-tep kayu si merabun, ipepajekna binangun batu ras gana-gana Dewi Asera, [33†]

¹¹jenari itutungna kumenen i das batar-batar kalak perbegu e, ngikuti perbahanen kalak si enggo ipelawes TUHAN i negeri e nari. Ipekekena rawa TUHAN alu perbahanenna si jahat

¹²janah ilanggarna perentah TUHAN si ngataken maka ola nembah man gana-gana.

¹³ TUHAN nuruh suruh-suruhenNa ras nabi-nabi guna mpersingeti Israel ras Juda, “Tadingkenlah lagu langkahndu si jahat janah ikutkenlah perentahKu, i bas Undang-undang si Kubereken man nini-ninindu janah Kusehken bandu arah nabi-nabi suruh-suruhenKu.”

¹⁴Tapi la nggit ia ngikutkenca; mekeng ia bali ras nini-ninina, si la ernalem man TUHAN Dibatana.

¹⁵La kalak e nggit ngikutken pedah TUHAN. Ilanggarna perpadanen TUHAN ras nini-ninina, janah la diatena kata persinget i bas TUHAN nari. Isembahna gana-gana si sea-sea, e maka ia pe jadi kalak si sea-sea. Iusihna adat bangsa-bangsa i sekelewetna, aminna gia TUHAN enggo ngelarangsa.

¹⁶Ilanggarna kerina Undang-undang TUHAN Dibatana, janah enggo ibahanna dua lembu tuangen jadi sembah-sembahenna. Kalak e pe enggo erbahan gana-gana Dewi Asera, nembah man bintang-bintang, dingen itami-tamina dibata-dibata Baal. [34†]

¹⁷Ipersembahken kalak e anakna si dilaki ras anakna si diberu jadi persembahen tutungen man dibata-dibata kalak perbegu. Ngguru ia man guru perdewal-dewal ras man kalak si dahinna ngoge nasip. Alu tutus ras bulat ukurna ilakokenna si salah i bas pengidah TUHAN, janah ipekekena rawaNa. [35†]

¹⁸Erkiteken si e nembeh TUHAN man kalak Israel, e maka ipelawesNa i lebe-lebeNa nari; la lit si tading seakatan kerajan Juda.

¹⁹Tapi kalak kerajan Juda pe la ngikutken Undang-undang TUHAN Dibatana. Iusih-usihna adat si ibuat kalak Israel i bas bangsa si deban nari.

²⁰Dage kerina kalak Israel itulak TUHAN. Iukum dingen iendeskenNa kalak e man musuh-musuh si kejam, seh kedungenna masap ia i lebe-lebeNa nari.

²¹Kenca Israel iserapken TUHAN i bas Juda nari, iangkat kalak Israel Jerobeam anak Nebat jadi rajana. Ibahan Jerobeam maka itadingken kalak e TUHAN janah ibabaina ku bas dosa si mesangat.

²²Iikut-ikut kalak e Jerobeam janah terus ngelakoken kerina dosa-dosa si enggo ibahan Jerobeam gelgel e.

²³E maka kedungenna ibuangken TUHAN kalak e i lebe-lebeNa nari, sue ras si enggo ipersingetiNa arah nabi suruh-suruhenNa, maka bage me perbahanenNa man kalak e. Dage bangsa Israel ibaba ku pembuangen, i Assur, janah i je denga ia ringan.

²⁴Raja Assur muat kalak i bas kuta-kuta Babilon, Kuta, Iwa, Hamat, ras Separwaim nari, jenari isuruhna tading i bas kuta-kuta i daerah Samaria, guna nggantiken kalak Israel si enggo ibuang e. Ibuat kalak e kuta enda jadi sikerajangenna, e maka i je me ia ringan.

²⁵Tangtangna ringan i je la isembahna TUHAN, e maka isuruh TUHAN singa ku tengah-tengah kalak e, janah piga-piga i bas ia ijerngem singa e.

²⁶E maka ituriken kalak man raja Assur maka kalak si itamakenna ringan i kuta-kuta Samaria la meteh undang-undang dibata si mada taneh e, e maka isuruh dibata e singa munuhi kalak e.

²⁷Erkiteken si e iperentahken raja nina, “Suruh mulih sekalak imam-imam si itaban kita e; suruh mulih janah ringan i jah, gelah iajarina undang-undang dibata si mada taneh e.”

²⁸E maka sekalak imam kalak Israel si gelgel e ibuang i Samaria nari, mulih dingen ringan i Betel. I je iajarina me kalak e kuga nembah man TUHAN.

²⁹Tapi kalak si ringan i Samaria terus nge erbahan berhalana, janah itamakenna i bas ingan-ingan ersembah si ipajekken kalak Israel. Tep-tep terpuk erbahan sembah-sembahenna i bas kuta-kuta si inganina.

³⁰Kalak si asalna i Babilon nari ibahanna gana-gana Sukot Benot man sembahenna kalak Kuta, gana-gana Nergal; kalak Hamat, gana-gana Asima;

³¹kalak Awa, gana-gana Nibas ras Tartak; janah kalak Separwaim ipersembahkenna anak-anakna jadi persembahen tutungen man dibata-dibatana Adramelek ras Anamelek.

³²Tambah si e isembahna ka pe TUHAN. E maka ipilihna erbage-bage jelma i bas ia nari ndahiken dahin imam i bas ingan-ingan ersembahna.

³³Dage isembahna TUHAN, tapi isembahna ka dibata-dibatana rikutken adat negeri asalna gelgel.

³⁴Adatna si ndekah e tetap denga idalankenna seh wari enda. La ia nembah man TUHAN janah la ikutkenna perentah-perentah si iberekenNa man kesusuren Jakup, si igelariNa Israel. [36†]

³⁵TUHAN enggo erpadan ras kalak Israel janah enggo iperentahkenNa, “Ola sembah dibata-dibata si deban; ola erjimpuh man bana, ola tami-tami ia, ola bereken persembahen man bana. [37†]

³⁶Ikutkenlah Aku, TUHAN si maba kam ndarat i Mesir nari alu kuasa ras gegeh si mbelin; arus maka kam nembah mungkuk man bangKu ras nehken persembahen man bangKu. [38†]

³⁷Arus maka tetap ikutkenndu undang-undang ras perentah si Kusuratken man bandu. La banci isembahndu dibata-dibata si deban,

³⁸janah la banci ilupakenndu perpadanenKu ras kam.

³⁹Arus ikutkenndu Aku, TUHAN, Dibatandu, Kupulahi kam i bas musuh-musuhndu nari.”

⁴⁰Tapi la ia nggit megikenca, janah tetap ngikutken adatna si dekah.

⁴¹Dage isembahna nge TUHAN, tapi isembahna ka berhalana. Janah seh asa genduari pe bage denga perbahanen sinursurna.