Read Batak Karo 2 RAJA-RAJA 18 Bible Online

2 RAJA-RAJA 18 - Batak Karo bible

2 RAJA-RAJA 18

¹Kenca telu tahun Hosea anak Ela jadi raja Israel, Hiskia anak Ahas jadi raja i negeri Juda.

²Tupung e umurna dua puluh lima tahun, janah dekahna ia erkuasa i Jerusalem lit dua puluh siwah tahun. Nandena Abia, anak Sakaria.

³Raja Hiskia ngelakoken si ngena ate TUHAN, bali ras nini Raja Daud nai.

⁴Ikernepkenna ingan-ingan ersembah kalak perbegu, iripukkenna tugu-tuguna, ras itabahna gana-gana Asera. Nipe tembaga si ibahan Musa nai pe, si igelari Nehustan, e pe iripukkenna, erkiteken seh ku bas paksa e bangsa Israel tetap denga nutung kumenen guna pehagasa. [39†]

⁵Hiskia ernalem man TUHAN, Dibata bangsa Israel. La enggo pernah lit raja Juda bali ras Hiskia, subuk ope denga paksa e, ntah pe kenca si e.

⁶Ia patuh man TUHAN, la pernah isimbakna, tapi alu metenget iikutkenna kerina Undang-undang si enggo ibereken TUHAN man Musa.

⁷E maka TUHAN nemani ia, janah erkiteken si e sangap ia i bas kai si idahina. Berontak ia ngelawan raja Assur dingen la ia nggit talu man bana.

⁸Italukenna kalak Pilisti, iperangna kuta-kutana, mulai kuta si kitikna nari seh ku kuta-kuta si mbelinna, subuk kuta Gasa ras daerah sekelewetna.

⁹I bas tahun peempatken pemerentahen Raja Hiskia i bas tahun si pepituken pemerentahen Raja Hosea i Israel, Raja Salmaneser i Assur nari merang Israel, e maka ikepungna Samaria.

¹⁰Kenca kuta e ikepung telu tahun dekahna, irebutna me kuta e; si enda jadi i bas tahun peenemken pemerentahen Raja Hiskia, ntah pe tahun pesiwahken pemerentahen Raja Hosea.

¹¹Ibaba raja Assur kalak Israel jadi tabanen ku Assur jenari deba isuruhna ringan i kuta Hala, deba deherken Lau Habor i bas daerah Gosan, janah deba ka i bas kuta-kuta Media.

¹²Samaria irebut musuh erkiteken bangsa Israel la ngikutken TUHAN Dibatana, tapi ilanggari kalak e perpadanen si enggo ibahan TUHAN ras ia, dingen la iikutkenna kerina Undang-undang si ibereken Musa, suruh-suruhen TUHAN e. La ia nggit megikenca dingen ngikutkenca.

¹³I bas tahun pesepuluh empatken pemerentahen Raja Hiskia, reh me Sanherip, raja Assur merang kuta-kuta Juda si erbenteng, janah italukenna kerina.

¹⁴E maka itenahken Hiskia berita man Sanherip, si sangana i Kuta Lakis nina, “Aku enggo salah; ngarap aku maka olanai min aku iserangndu. Kugalari gia kai si ipindondu.” Sue ras si e ikataken raja Assur man Hiskia maka arus ikiremkenna man bana sepuluh ribu kilo pirak ras seribu kilo emas.

¹⁵E maka ikiremken Hiskia kerina pirak si lit i bas Rumah Pertoton ras i bas perbendaharan istana;

¹⁶tambah si e itangtangina pe emas si lit i bas pintun Rumah Pertoton ras emas si gelgel e ia jine ngelapiskenca ku binangun-binangun pintun Rumah Pertoton e, jenari ikiremkenna kerina man Sanherip.

¹⁷Kenca bage isuruh raja Assur tentera si nterem i Lakis nari merang Hiskia i Jerusalem; tentera e ipinpin telu kalak puanglima si meganjangna. Kenca kalak e seh i Jerusalem ibuatna inganna i pasar ingan erdahin tukang tenun, deherken terowongen si perpalerken lau i bas kolam si arah gugung nari.

¹⁸Jenari idilona Raja Hiskia, e maka ndarat me telu kalak pegawai Raja Hiskia njumpai kalak e, e me: Eliakim anak Hilkia, kepala istana; Sepna, sekretaris negara; ras Joa anak Asap, bendahara negara.

¹⁹Sekalak i bas pegawai Assur nari nehken penungkunen Raja Assur man utusen Raja Hiskia si telu kalak e nina, “Engkai maka bage kal tekna Raja Hiskia?

²⁰Akapndu kin kata-kata banci nggantiken kebeluhen erperang ras kinimbisan? Ise kin iakapndu si banci nampati kam berontak ngelawan Assur?

²¹Mesir? Adi e kin, bali e ras make sanggar jadi ciken -- penggel me cikenndu e, jenari icucukna tanndu. Bage me tempasna raja Mesir adi kalak ernalem man bana.”

²²Tole nina pegawai Assur, “Ntahsa nindu man bangku maka kam ernalem man TUHAN Dibatandu? Ma kin ingan-ingan ersembah man TUHAN ras batar-batarNa nge si icedaken Hiskia asum ikatakenna man kalak Juda ras kalak Jerusalem maka i Jerusalem saja ngenca banci kalak ersembah?

²³E maka genduari, i bas gelar raja kupetawarken man bandu: banci kubereken dua ribu kuda adi ngasup kam nikapken dilaki si ngersak asa e teremna.

²⁴Labo kam ngasup ngimbangi pegawai Assur si meteruhna pe. Iarapkenndu denga kin atendu Mesir ngkirimken gereta perang ras kalak si ngersak kuda?

²⁵Akapndu kin la arah penampat TUHAN aku merang ras ngkernepken negerindu enda? TUHAN jine kap si nuruh aku nerangsa ras ngkernepkenca.”

²⁶Kenca bage ikataken Eliakim, Sepna, ras Joa man pegawai e, “O Bapa, i bas cakap Aramlah kam ngerana man kami. Ngerti nge kami cakap e. Ola kam ngerana i bas cakap Heber, sabap kerina kalak sanga megi-megi i datas tembok nari.”

²⁷Ngaloi pegawai e, “Akapndu kin man bandu ras man raja saja ngenca aku isuruh raja ngataken si enda kerina? Lang! Tapi aku pe ngerana man kalak si genduari sangana kundul i datas tembok ah, si la banci lang nandangi mangani kotorenna ras minem lau si iamburkenna, bali ras kam jine pe nandangi bage ka.”

²⁸Kenca bage tedis pegawai e, e maka erlebuh ia alu sora megang i bas cakap Heber nina, “Begiken kai si ikataken raja Assur man bandu!

²⁹Ipersingetina kam kerina maka ola kam nggit itipu Hiskia. Hiskia labo ngasup nelamatken kam.

³⁰Janah ola kam nggit iendik-endikna ernalem man TUHAN. Ola iakapndu nggit TUHAN nelamatken kam, janah ngambati tentera Assur gelah ola naluken kuta enda.

³¹Ola begiken Raja Hiskia. Raja Assur merentahken kam gelah ndarat i bas kuta enda nari, gelah ikuasaina. Adi bage, kam ipelepas man buah anggur ras buah ara bekasndu nuan, ras minem lau malem i bas sumurndu nari,

³²seh kam ipindahken Raja ku negeri si menam bali kal ras negerindu enda. I je lit peken anggur mereken lau anggur, ras gandum guna erbahan roti. I je melala batang saitun, minak saitun, ras tengguli. Adi idalankenndu perentahna la kam mate, tapi nggeluh. Ola bere itokohi Hiskia kam alu mabai kam rukur maka ipulahi TUHAN me kam.

³³Lit kin dibata-dibata bangsa si deban mulahi negerina i bas kuasa Raja Assur nari?

³⁴I ja genduari dibata-dibata si deban e? I ja dibata-dibata Hamat ras Arpad? I ja dibata-dibata negeri Separwaim, Hena, ras Iwa? Lit kin si nelamatken Samaria?

³⁵Pernah kin dibata-dibata negeri-negeri enda ndai kerina nelamatken negerina i bas raja kami nari? Dage ngkai maka iakapndu banci iselamatken TUHAN Kuta Jerusalem?”

³⁶Sip kalak ndai kerina, sabap enggo iperentahken raja maka ola sekalak pe ngaloisa.

³⁷Kenca bage Eliakim, Sepna, ras Joa ncaingken uisna perban ceda atena, jenari lawes ia ngelaporkenca man raja kai si enggo ikataken pegawai Assur e.