Read Batak Karo 2 RAJA-RAJA 2 Bible Online

2 RAJA-RAJA 2 - Batak Karo bible

2 RAJA-RAJA 2

¹Seh paksana Elia iangkat TUHAN ku Surga i bas angin kaba-kaba si megegeh. Sanga si e Elia ras Elisa i perdalanen i Gilgal nari.

²I tengah dalan nina Elia man Elisa, “I jenda kam lebe sabap aku isuruh TUHAN ku Betel.” Tapi ngaloi Elisa, “Ersumpah aku erkiteken kepatuhenku man TUHAN si nggeluh ras man bandu, la ateku nadingken kam.” Erkiteken si e ras ia terus ku Betel.

³Sada terpuk nabi-nabi i Betel reh njumpai Elisa, jenari isungkuni nabi-nabi e ia nina, “Itehndu kang maka ibuat TUHAN ateNa tuandu sendah i bas kam nari?” “Kueteh,” nina Elisa njabapsa. “Tapi la padah sicakapken kerna si e.”

⁴Jenari nina Elia man Elisa, “I jenda kam lebe, sabap isuruh TUHAN aku lawes ku Jeriho.” Tapi ngaloi Elisa nina, “Ersumpah aku erkiteken kepatuhenku man TUHAN si nggeluh ras man bandu maka ndigan pe la aku nggit nadingken kam.” Erkiteken si e iteruskenna duana perdalanenna ku Jeriho.

⁵Sada terpuk nabi-nabi i Jeriho reh njumpai Elisa jenari isungkunna ia nina, “Itehndu kang maka ibuat TUHAN ateNa tuanndu sendah i bas kam nari?” “Kueteh,” nina Elisa njabapsa. “Tapi la pedah sicakapken kerna si e.”

⁶Kenca bage nina Elia man Elisa, “I jenda kam lebe, sabap isuruh TUHAN aku lawes ku Lau Jordan.” Tapi erjabap Elisa nina, “Ersumpah aku erkiteken kepatuhenku man TUHAN si nggeluh ras man bandu, la ateku nadingken kam.” Erkiteken si e ras ia lawes,

⁷janah lima puluh kalak nabi ngikutken ia ku Lau Jordan. Ngadi Elia ras Elisa i tepi lau e, janah nabi si lima puluh kalak e tedis la ndauhsa i jenari.

⁸Kenca bage itangtangi Elia jubahna, igulungna, ipekpekna lau e alu jubahna e minter erbelah. E maka ngepar ia ras Elisa i babo taneh kerah.

⁹Kenca seh i lepar nina Elia man Elisa, “Turiken man bangku kai atendu kubahan man bandu ope aku iangkat i bas kam nari.” “Bereken bangku sada bagin kuasandu gelah banci aku nggantiken kam,” nina Elisa njabapsa. [3†]

¹⁰“Mesera kal nehkenca pemindonndu e,” nina Elia ngaloi. “Tapi banci ialokenndu e, adi idahndu kari aku sanga aku ibuat i bas kam nari. Adi la idahndu aku, la banci ialokenndu.”

¹¹Ercakap-cakap ia duana janahna erdalan. Rempet reh sada gereta perang ernala bagi api irintak kuda si ernala-nala bagi api, mentas arah kelang-kelang Elia ras Elisa. I je me Elia iangkat ku Surga alu angin kaba-kaba si megegeh.

¹²Asum Elisa ngidahsa nderkuh ia ngelebuh Elia nina, “O bapangku, bapangku! Pengawal Israel si mbisa!” Jenari lanai enggo idahna Elia. Erkiteken ceda atena icaingken Elisa bajuna. [4†]

¹³Kenca bage ibuatna jubah Elia, si naktak ndai i bas ia nari mulih ia, jenari tedis ia i tepi Lau Jordan.

¹⁴Ipekpek Elisa lau e alu jubah Elia ndai janah nina, “I ja kin TUHAN, Dibata Elia?” Kenca bage ipekpekna ka, e maka erbelah lau e, jenari erdalan ia ngepar.

¹⁵Nabi-nabi si lima puluh kalak si reh i Jeriho nari ngidah ia, e maka nina, “Kuasa Elia genduari lit i bas Elisa!” E maka ijumpai nabi-nabi e ia, erjimpuh ia kerina i lebe-lebe Elisa,

¹⁶nina, “Lit kami lima puluh kalak i jenda, kerina kalak si megegeh. Berelah kami lawes ndarami tuanndu. Banci jadi enggo ibabaken kesah TUHAN, jenari itadingkenna i babo deleng-deleng tah pe berneh.” “Labo padah,” nina Elisa njabapsa.

¹⁷Tapi erkiteken lalap iseksekina, dungna iberena kalak ndai lawes. Lawes me si lima puluh kalak e. Telu wari dekahna serser idaramina Elia i japa pe, tapi la ia jumpa.

¹⁸Kenca bage mulihken ia ndahi Elisa, si sangana tima-tima i Jeriho, e maka nina man kalak e, “Ma enggo kukataken man bandu la padah lawes?”

¹⁹Piga-piga kalak dilaki i Jeriho nari lawes njumpai Elisa, nina, “Bagi itehndu Tuan, kuta enda tuhu-tuhu mejile, tapi launa la mehuli, erbahanca nterem diberu-diberu keguguren.”

²⁰E maka isuruh Elisa nina, “Buat bangku sada mangkuk si mbaru denga, tamaken sira ku bas.” Ibaba kalak ndai mangkuk e man Elisa,

²¹jenari lawes Elisa ku ulu lau e, iamburkenna sira e ku lau, janah nina, “Enda me si ikataken TUHAN, ‘Enggo bersih Kubahan lau enda, e maka lanai lit ibahanna kematen ntah pe keguguren.’ ”

²²Erkiteken si e lau ndai enggo bersih mulai i bas paksa e nari, payo bagi si ikataken Elisa.

²³Kenca bage lawes Elisa i Jeriho nari ku Betel. Sanga i tengah dalan ndarat me piga-piga kalak anak dilaki i bas sada kuta nari ngoto-ngotoi Elisa. “To lawesken, sulah!” nina man Elisa alu sora si megang.

²⁴Itulihken Elisa, ijerlengna danak-danak ndai, jenari isumpahina alu gelar TUHAN. Kenca bage ndarat me dua beruang beru-beru i bas kerangen nari, e maka icaing-caingna danak-danak ndai empat puluh dua kalak.

²⁵Jenari iterusken Elisa ka perdalanenna ku Deleng Karmel; kedungenna mulih ka ia ku Samaria.