Read Batak Karo 2 RAJA-RAJA 20 Bible Online

2 RAJA-RAJA 20 - Batak Karo bible

2 RAJA-RAJA 20

¹Kira-kira i bas paksa e sakit me Raja Hiskia janah menam mate. Nabi Jesaya anak Amos lawes ndahi ia nina man raja, “TUHAN ngataken man bandu maka ikatakenndu pedahndu si perpudina man kerina isi jabundu, sabap lanai kam malem. Ersikaplah kam guna kematenndu.”

²Ikusur Hiskia ayona ku dingding, jenari ertoto ia,

³“Ingetlah, TUHAN; alu tutus ras erkemalangen enggo kulayani Kam, janah tetap kuusahaken ndalanken kai ateNdu ngena.” Kenca bage tangis Hiskia, megogo kal atena.

⁴Lawes Jesaya nadingken raja, tapi ope denga ibentasina kesain istana si i tengah, isuruh TUHAN ia

⁵mulihken ndahi Hiskia, pemerentah bangsa TUHAN, janah nina TUHAN man raja, “Aku, TUHAN, Dibata nini-ninindu Daud enggo megi pertotondu janah ngidah iluhndu mambur. Kupepalem kam, janah kedun ku Rumah Pertoton kam.

⁶Kutambahi umurndu sepuluh lima tahun. Kupulahi kam ras kuta Jerusalem i bas raja Assur nari. Aku mpertahanken kuta enda, guna kehamatenKu ras erkiteken perpadanen si Kubahan ras suruh-suruhenKu Daud.”

⁷Kenca bage isuruh Jesaya gelah idampelken buah ara si medakdak ku bareh raja, gelah malem iakapna.

⁸Nungkun Raja Hiskia nina, “Kai tandana maka ipepalem TUHAN aku janah kedun ngasup aku lawes ku Rumah Pertoton?”

⁹Nina Jesaya ngaloi, “Ibereken TUHAN man bandu tanda guna mbuktiken maka isehkenNa nge padanNa. Apai ipilihndu: awih-awih si lit i bas tangga ah erdalan ku lebe sepuluh njingkang ntah surut sepuluh njingkang?”

¹⁰Erjabap Hiskia nina, “Menukah kap erbahan awih-awih e erdalan ku lebe sepuluh njingkang! E maka bahanlah surut sepuluh njingkang.”

¹¹Ertoto Jesaya man TUHAN, e maka ibahan TUHAN awih-awih e surut sepuluh njingkang i bas tangga si ibahan Raja Ahas.

¹²Kira-kira i bas paksa e ka, raja Babilon, Merodak Baladan, anak Baladan megi berita maka Raja Hiskia sakit mbaru enda. E maka ikirimkenna sada surat ras pemere man Hiskia.

¹³Ialo-alo Hiskia pertenahen ndai, jenari icidahkenna man kalak ndai kebayakenna -- pirakna ras emasna, rempah-rempahna ras minak wangina, ras kerina perkakas tenterana. Kai si lit i bas gudang-gudangna bage pe i bas kerina kinirajanna la lit la icidahken Hiskia man kalak ndai.

¹⁴Kenca bage ijumpai nabi Jesaya me Raja Hiskia, isungkunina nina, “I ja nari kalak enda janah kai nina man bandu?” Erjabap Hiskia, “Kalak enda reh i bas negeri si ndauh nari, e me Babilon.”

¹⁵“Kai si enggo idahna i bas istanandu?” “Kerina enggo idahna. Kai si lit i bas gudang enggo kucidahken man bana.”

¹⁶Jenari nina Jesaya man raja, “TUHAN si Mada Kuasa ngatakenca maka

¹⁷paksana reh me i ja kerina barang-barang si lit i bas istanandu, kerina si enggo ipepulung nini-ninindu seh ku bas paksa enda, ibaba ku Babilon. La lit sada pe si tading. [41†]

¹⁸Piga-piga kalak anak dilaki si ipupusna pe ikut ibaba jenari ikebiri guna ijadiken suruh-suruhen i bas istana raja Babilon.” [42†]

¹⁹Perkatan enda iertiken Hiskia maka kidekah ia nggeluh denga kerajanna tetap nge aman dingen dame. E maka ngaloi ia nina, “Berita si ipesehndu man bangku i bas TUHAN nari e mehuli kap.”

²⁰Kerina perbahanen Raja Hiskia si deban, kinimbisanna bage pe turi-turinna kerna kuga ia erbahan kolam ras ngkali parik arah teruh taneh man dalan lau ku bas kuta e, kerina isuratken i bas kitap Sejarah Raja-raja Juda.

²¹Hiskia mate, jenari anakna Manase nggancihi ia jadi raja.