Read Batak Karo 2 RAJA-RAJA 22 Bible Online

2 RAJA-RAJA 22 - Batak Karo bible

2 RAJA-RAJA 22

¹Asum Josia jadi raja Juda, umurna waluh tahun. Irajaina kerajan Juda i Jerusalem nari telu puluh sada tahun dekahna. Gelar nandena Jedida, anak Adaijah, i Kuta Boskat nari. [46†]

²Josia ngelakoken kai si ngena ate TUHAN; iikutkenna usihen si mehuli si ibahan ninina Raja Daud, dingen sitik pe ia la nimpang i bas kerina Undang-undang Dibata nari.

³I bas tahun pesepuluh waluhken pemerentahenna Raja Josia nuruh sekretaris istana, e me Sapan anak Asalia, kempu Mesullam, ku Rumah Pertoton. Man bana iperentahken raja nina,

⁴“To dahi Imam si Mbelin Hilkia janah pindo man bana laporen, asa kai buena duit si ipepulung imam si ertugas i bas pintun Rumah Pertoton, i bas jelma si nterem nari.

⁵Suruh ia mereken duit e man kalak si ertanggung jawab pekena-kena Rumah Pertoton. Kalak e arus nggalari upah

⁶tukang kayu, tukang bangunen, ras tukang pasang batu, bage pe arus itukurna papan ras batu si ipake guna pehuli Rumah Pertoton e.

⁷Kalak si ertanggung jawab ndahiken dahin e kalak bujur tuhu-tuhu, e maka la perlu ipindo perkiran kerna pemaken duit e.” [47†]

⁸Isehken Sapan perentah raja man Hilkia, jenari ikataken Hilkia man bana maka enggo idatna kitap Undang-undang i bas Rumah Pertoton. Ibereken Hilkia man bana kitap e, e maka ioge Sapan.

⁹Kenca bage mulihken ia ndahi raja. Ngelapor ia man raja nina, “Duit si lit i bas Rumah Pertoton e enggo ibuat suruh-suruhenndu, janah enggo iberekenna man si ertanggung jawab pehuli Rumah Pertoton e.”

¹⁰Janah kenca e nina, “Enda lit sada kitap e ibereken Hilkia man bangku.” E maka iogena alu sora megang man raja.

¹¹Kenca ibegi raja isi kitap e icaingkenna uisna perban biarna.

¹²Minter iberekenna perentahna man imam Hilkia, man Ahikam anak Sapan, man Akbor anak Mikayah, man Sapan, sekretaris istana, ras man Asaya, ajudan raja. Nina raja man kalak enda kerina,

¹³“To sungkuni TUHAN kai pedahNa man bangku ras man kerina kalak Juda kerna pengajaren si lit i bas kitap enda. Nembeh TUHAN man banta erkiteken nini-nininta la ngelakoken kai si arus ilakoken rikutken si tersurat i bas kitap enda.”

¹⁴Lawes Hilkia Ahikam, Sapan ras Asaya nungkuni sekalak nabi diberu, Hulda gelarna, si ringan i bas bagin si mbaru Kuta Jerusalem. (Gelar perbulangenna Salkum, anak Tikwa, kempu Harhas. Salkum ertanggung jawab ngurus kerina jubah si ipake i bas Rumah Pertoton.) Ituriken kalak enda man bana kai si enggo jadi.

¹⁵E maka isuruhna mulihken ndahi raja nehken

¹⁶pedah TUHAN bagenda, “Ateku ngukum Jerusalem ras kerina pendudukna, sue ras si tersurat i bas kitap si enggo ioge raja.

¹⁷Enggo itadingkenna Aku, ipersembahkenna persembahen man dibata-dibata si deban, janah erkiteken si e ipekekena rawangKu alu kerina si enggo ilakokenna. Enggo gara ateKu man Jerusalem, janah gara ateKu e la ernimpet-nimpet.

¹⁸Janah kerna raja, Aku, TUHAN Dibata Israel ngataken: Enggo ibegikenndu si tersurat i bas kitap e;

¹⁹robah dingen ipeterukndu bandu i lebe-lebengKu, icaingkenndu uisndu dingen tangis asum ibegindu ancamen ukumen si Kubahan man Jerusalem ras pendudukna. Kubahan maka ciga ate kalak ngidah kuta e, janah gelarna ipake numpahi kalak si deban. Tapi enggo Kubegi pertotonndu,

²⁰janah ukumen si nandangi Kusehken man Kuta Jerusalem la reh kidekah kam nggeluh denga. Kubahan maka kam mate i bas dame.” Mulih kalak ndai ndahi Raja Josia maba berita e man bana.