Read Batak Karo 2 RAJA-RAJA 23 Bible Online

2 RAJA-RAJA 23 - Batak Karo bible

2 RAJA-RAJA 23

¹Ipepulung Josia kerina peminpin Juda ku Jerusalem,

²jenari ras-ras ia ku Rumah Pertoton itemani imam-imam, nabi-nabi ras jelma si nterem, subuk bayak, bage pe musil. I lebe-lebena kerina iogeken raja alu megang kitap perpadanen e si terdat i bas Rumah Pertoton e.

³Kenca bage tedis raja deher binangun Kinirajan, e maka ibahanna perpadanen ras TUHAN maka erkemalangen ia man baNa, make undang-undang ras kerina tuntuten si lit i bas perpadanen e, sue ras si tersurat i bas kitap e. Janah kerina jelma si nterem erpadan maka patuh ia man perpadanen e.

⁴Kenca bage iperentahken Josia imam si Mbelin Hilkia, imam-imam si nampati ia, ras pengawal si ertugas i bas dalan bengket Rumah Pertoton pedarat i bas Rumah Pertoton e nari kerina barang-barang si ipake guna ersembah man Baal, Dewi Asera, ras bintang-bintang. Kerina barang-barang e iciluk raja i darat kuta Jerusalem deherken Baluren Kidron. Kenca bage isuruhna ibaba ku Betel. [48†]

⁵Ipengadina kerina imam-imam si enggo itangkuhken raja-raja Juda guna mpersembahken persembahen i babo batar-batar berhala si lit i kuta-kuta Juda ras ingan-ingan deherken Jerusalem, e me kerina imam-imam si mpersembahken persembahen man Baal, matawari, bulan, bintang-bintang si ndeher, bage pe bintang-bintang si ndauh.

⁶Ipedaratna i bas Rumah Pertoton nari gambar Dewi Asera. Ibabana ku Baluren Kidron i darat kuta, icilukna, igilingna jadi abu, jenari icaburkenna ku kuburen jelma si nterem.

⁷Irontaskenna asrama ingan tading kalak si pendahinna erlua-lua i bas Rumah Pertoton. Kalak si pendahinna erlua-lua i bas Rumah Pertoton: E me dilaki ras diberu si ngelakoken dahin erlua-lua selaku penembahen man dewa-dewa kesusuren. (I bas ingan e diberu-diberu nenun jubah si ipake guna ersembah man Asera.)

⁸Ibabana ku Jerusalem imam-imam si lit i bas kuta-kuta Juda. Kerina batar-batar ingan persembahen si lit i belang-belang negeri e, imelketina. Iruntuhkenna pe batar-batar hantu kambing si lit deherken kerabangen si ipajekken Josua, gubernur kuta e, e me arah kawes kerabangen si mbelin adi kalak bengket ku bas kuta e.

⁹Kerina imam-imam e la ibere ndahiken dahin imam i bas Rumah Pertoton, tapi banci man roti si la itama ragi si isikapken man teman-teman imam si deban.

¹⁰Topet, e me ingan ersembah man berhala-berhala i Baluren Hinnom, pe imelketi Raja Josia. Si e ibahanna gelah olanai ise pe mpersembahken anakna dilaki ntah anakna diberu jadi persembahen tutungen man Dewa Moloh i je. [49†]

¹¹Iaguina pe gana-gana kuda si enggo itangkuhken raja-raja Juda guna nghamati matawari, janah gereta kuda si ipake guna si e icilukna. (Si enda kerina inganna i bas kesain Rumah Persembahen deherken pintu gerbang, janah la ndauh i bas kamar Natan Melek nari. Ia sekalak pegawai tinggi.)

¹²Batar-batar persembahen si ipajekken raja-raja Juda i datas tarum istana, i babo kamar Raja Ahas, rikut ras batar-batar si ipajekken Raja Manase i bas duana kesain Rumah Pertoton e, iruntuhken Raja Josia. Iperperkenna batar-batar e seh getem, jenari iambekkenna ku Baluren Kidron. [50†]

¹³Imelketi Josia pe batar-batar si ipajekken Raja Salomo arah Timur Kuta Jerusalem, arah Selatan Uruk Seton. Batar-batar e ipajekken Raja Salomo nai man ingan persembahen man berhala-berhala si ciga ate, e me Dewi Astarte sembah-sembahen kalak Sidon, Kemos dibata-dibata bangsa Moap, ras Moloh dibata-dibata kalak Amon. [51†]

¹⁴Tiang-tiang batu e ipenggel-penggel Raja Josia, janah gana-gana si ipajekken guna nghamati Dewi Asera itabahna, jenari taneh inganna pajek ndai itamburi Raja Josia alu tulan-tulan manusia.

¹⁵Ingan ersembah i Betel pe iruntuhken Josia. Si majekken ingan ersembah, e Raja Jerobeam nai, anak Nebat, si mabai Israel erdosa. Batar-batarna ibulakken Josia, batu-batuna iperperkenna, jenari itutungna jadi abu. Gana-gana Dewi Asera pe icilukna. [52†]

¹⁶Sanga ipernehen Josia sekelewetna idahna piga-piga kuburen i das uruk-uruk e. E maka isuruhna gelah kerina tulan-tulan si lit i bas kuburen e ipedarat jenari iciluk i das batar-batar guna ngeliamisa. Arah e enggo ilakokenna sue ras kai si enggo inubuatken sekalak nabi ndekah ope denga si e, tupung kerja-kerja, sanga Raja Jerobeam tedis deherken batar-batar e. Sanga Raja Josia ngenen-ngenen, idahna kuburen nabi si melasken nubuat enda. [53†]

¹⁷“Kuburen ise ah?” nina nungkun. Ngaloi kalak Betel nina, “Ah me kuburen nabi si reh i Juda nari, si ernubuat kerna kai si enggo ilakokenndu sendah nandangi batar-batar enda.” [54†]

¹⁸“Tadingken e,” nina Josia. “La banci ise pe ngkuit tulan-tulanna.” E maka tulan-tulan nabi e la iganggu, bage pe tulan-tulan nabi si nai reh i Samaria nari.

¹⁹Kerina ingan-ingan ersembah man berhala i bas tep-tep kuta i Israel, si ipajekken raja-raja Israel, si erbahanca keke rawa TUHAN, iruntuhken Raja Josia. Uga perbahanna i Betel, bage ka perbahanenna man kerina batar-batar e.

²⁰Ibunuhna kerina imam berhala e i babo batar-batar inganna erdahin. Itutungna tulan-tulan manusia i babo tiap batar-batar. Kenca bage mulihken ia ku Jerusalem.

²¹Kenca bage Raja Josia merentahken bangsa e gelah ngerayaken wari Paskah guna TUHAN Dibatana, sue ras si tersurat i bas kitap perpadanen.

²²La enggo pernah bage belinna Wari Raya Paskah si ibahan raja-raja Israel tah pe Juda, mulai kin i bas paksa hakim-hakim nari.

²³Tapi kedungenna, kenca Josia jadi raja sepuluh waluh tahun dekahna, wari Paskah e irayaken i Jerusalem.

²⁴Guna ngikutken kai si tersurat i bas kitap si idat Imam si Mbelin Hilkia i bas Rumah Pertoton e, kerina kalak si beluh ndilo begu-begu ras ngoge nasip ipelawes Raja Josia. Kerina sembah-sembahen keluarga, berhala-berhala, ras sembah-sembahen perbegu si debanna si lit i Jerusalem ras i belang-belang Juda isasapkenna.

²⁵La enggo pernah lit sekalak raja pe bagi Raja Josia tutusna, nembah TUHAN asa atena, asa ukurna ras asa gegehna ngikutken kerina Undang-undang Musa. Kenca ia pe lanai enggo pernah lit raja si bagi ia e patuhna.

²⁶Tapi pernembeh TUHAN nandangi Juda enggo gara erkiteken perbahanen Raja Manase, lalap denga kap la nimpet-nimpet.

²⁷Nina TUHAN, “Kai si enggo Kulakoken man Israel, Kulakoken ka man Juda. Kubuangken me kalak Juda i lebe-lebengKu nari, janah Jerusalem, kuta pilihenKu e pe Kutulak, rikut ras Rumah Pertoton ingan si enggo Kutetapken man ingan ersembah man bangKu.”

²⁸Kerina si debanna si ilakoken Raja Josia isuratken i bas kitap Sejarah Raja-raja Juda.

²⁹Tupung Josia raja denga, Raja Neko, i Mesir nari minpin tenterana ku Lau Eprat guna nampati raja Assur. Icubaken Raja Josia ngambati tentera Mesir e i Megido, tapi mate ia i bas peperangen e.

³⁰Itamaken pegawai-pegawaina maitna ku das gereta perang, jenari ibabana mulih ku Jerusalem, janah i je me ia ikuburken i bas kuburen raja-raja. Kalak Juda milih Joahas anak Josia, jenari itangkuhkenna jadi raja.

³¹Asum Joahas jadi raja Juda umurna dua puluh telu tahun. Irajaina kerajan Juda i Jerusalem nari telu bulan dekahna. Gelar nandena Hamutal, anak Jeremia i Kuta Lipna nari.

³²Erdosa ia man TUHAN, bali ras perbahanen nini-ninina nai.

³³Ia ngadi jadi raja tupung Raja Neko i Mesir nari naban ia i Ripla, i negeri Hamat. Raja Neko maksa kerajan Juda nggalar 3.400 kilo pirak ras telu puluh empat kilo emas jadi persembahen.

³⁴Raja Neko ngangkat Eliakim anak Josia jadi raja Juda nggantiken Josia, jenari isambarina gelarna jadi Joyakim. Joahas ibaba Raja Neko ku Mesir, janah i jah ia mate. [55†]

³⁵Raja Joyakim muat pajak i bas rayat nari sue ras kebayaken sekalak-sekalak, guna ngelitken duit si iperluken lako nggalari persembahen si ipindo raja Mesir.

³⁶Asum Joyakim jadi raja Juda, umurna dua puluh lima tahun. Irajaina kerajan Juda i Jerusalem nari sepuluh sada tahun dekahna. Gelar nandena Sabaidah, anak Pedaya i kuta Ruma nari. [56†]

³⁷Erdosa Joyakim man TUHAN, bali ras perbahanen nini-ninina.