Read Batak Karo 2 RAJA-RAJA 24 Bible Online

2 RAJA-RAJA 24 - Batak Karo bible

2 RAJA-RAJA 24

¹Sanga Joyakim jadi raja negeri Juda iperang Raja Nebukadnesar i Babilon nari, janah telu tahun dekahna Joyakim ipaksa mungkuk i teruh perentahna. Kenca bage berontak ia. [57†]

²Isuruh TUHAN gerombolan ersenjata kalak Babilon, Siria, Moap, ras kalak Amon ngelawan Joyakim guna ngkernepken negeri Juda, sue ras si enggo ikataken TUHAN gelgel nari arah suruh-suruhenNa, nabi-nabi.

³Si enda jadi arah perentah TUHAN, lako muangken kalak Juda i lebe-lebeNa nari erkiteken kerina dosa si enggo ilakoken Raja Manase,

⁴terlebih-lebih pe erkiteken ibunuhina nterem kalak si la ersalah. TUHAN la nggit ngalemi salah Manase.

⁵Kerina si debanna si ilakoken Joyakim isuratken i bas kitap Sejarah Raja-raja Juda.

⁶Mate Joyakim, e maka anakna Joyakin nggantiken ia jadi raja.

⁷Raja Mesir ras tenterana lanai pernah ndarat erperang erkiteken raja Babilon genduari enggo ngkuasai kerina daerah si gelgel e jadi sikerajangen Mesir, mulai i Lau Eprat nari terus ku perbalengen Mesir arah Utara.

⁸Asum Joyakin jadi raja Juda, umurna sepuluh waluh tahun. Irajaina kerajan Juda i Jerusalem nari telu bulan dekahna. Gelar nandena Nehusta, anak Elnatan i Jerusalem nari.

⁹Erdosa Joyakin man TUHAN, bali ras kai si enggo ilakoken bapana.

¹⁰Tupung pemerentahenna reh tentera Nebukadnesar i Babilon nari merang Jerusalem ikepungna kuta e.

¹¹Sanga tenterana ngkepung kuta e, Nebukadnesar reh ku Jerusalem.

¹²E maka nerahken bana Raja Joyakin man kalak Babilon radu ras nandena, anak-anakna, pengulu tenterana, ras pegawai-pegawai istanana. Tupung e Nebukadnesar enggo waluh tahun jadi raja. [58†]

¹³Kerina perkakas emas si ibahan Raja Salomo guna Rumah Pertoton, icedai Nebukadnesar. Kerina barang-barang si meherga i bas Rumah Pertoton ras i bas istana iangkutna ku Babil. Kerina enda jadi sue ras kai si enggo leben ikataken TUHAN.

¹⁴Kalak Jerusalem ibabana tertaban, kerina kesusuren raja, ras kerina peminpin-peminpinna, teremna lit sepuluh ribu kalak. Tukang-tukang si beluh pe ikut ibabana subuk pande-pande besi. Kalak si musilna nari ngenca itadingkenna i Juda.

¹⁵Nebukadnesar maba Joyakin ku Babil selaku tabanen, rikut ras nande Joyakin, kerina ndeharana, pegawai-pegawaina, ras peminpin-peminpin kalak Juda. [59†]

¹⁶Kerina kalak penting ibuang Nebukadnesar ku Babilon, teremna lit pitu ribu kalak, bage pe seribu kalak tukang si beluh, subuk tukang-tukang besi, janah kerina paguh-paguh dagingna, ngasup ndalanken tugas jadi tentera.

¹⁷Nebukadnesar ngangkat bapa nguda Joyakin Mattania, jadi raja Juda, jenari isambarina gelar Mattania jadi Sedekia. [60†]

¹⁸Asum Sedekia jadi raja Juda, umurna dua puluh sada tahun. Irajaina kerajan Juda i Jerusalem nari sepuluh sada tahun dekahna. Gelar nandena Hamutal, anak Jeremia i Kuta Lipna nari. [61†]

¹⁹Raja Sedekia erdosa man TUHAN, bali kal ras perbahanen Raja Joyakim.

²⁰Merawa kal TUHAN nandangi kalak Jerusalem ras Juda seh maka ibuangNa ia i lebe-lebeNa nari. [62†]