Read Batak Karo 2 RAJA-RAJA 25 Bible Online

2 RAJA-RAJA 25 - Batak Karo bible

2 RAJA-RAJA 25

¹Sedekia berontak ngelawan Nebukadnesar, raja Babilon. E maka i bas wari pesepuluhken, bulan pesepuluhken, tahun pesiwahken pemerentahen Raja Sedekia, reh Nebukadnesar ras tenterana i Babilon nari merang Jerusalem. Ipajekkenna kemahna i darat kuta, ibahanna benteng kelewet guna ngkepungsa, [63†]

²janah kuta terus-terusen ikepung seh tahun pesepuluh sadaken pemerentahen Sedekia.

³I bas wari pesiwahken, bulan peempatken i bas tahun e, asum kelihen enggo mesangat seh maka lanai lit kai pe si man pangan,

⁴tembok kuta e ipecahken. Aminna gia kuta e ikepung kalak Babilon, kerina tentera Sedekia pulah i bas berngi e. Kalak e lawes arah peken raja, mentasi pintu gerbang si mpersadaken tembok si dua e, jenari lompat kempak Baluren Lau Jordan. [64†]

⁵Tapi iayaki tentera Babilon Raja Sedekia, itundukna ia i kendit deherken Jeriho, jenari kerina tenterana nadingken ia.

⁶Sedekia ibaba man Raja Nebukadnesar, si sangana i kuta Ripla, janah i je me Nebukadnesar ndabuhken ukumen man bana.

⁷I lebe-lebe mata Sedekia, anak-anakna ibunuh. Kenca bage iperentahken Nebukadnesar ncungkil mata Sedekia, jenari ngeranteken ia, e maka ibaba ku Babil. [65†]

⁸I bas wari pepituken, bulan pelimaken, tahun pesepuluh siwahken pemerentahen Nebukadnesar, raja Babilon, sekalak penasehat raja ras puanglima tenterana Nebusaradan, bengket ku Jerusalem.

⁹Icilukna Rumah Pertoton, istana, ras kerina rumah i pengulu Jerusalem, [66†]

¹⁰janah tenterana ngerontasken tembok kuta.

¹¹Kenca bage ibaba Nebusaradan ku Babilon kalak si tading denga i bas kuta e, tukang-tukang si beluh si tading denga, ras kalak si tading denga, ras kalak si gelgel e mihak kalak Babilon.

¹²Tapi kalak si musilna kal, si la lit kadena pe, itadingkenna deba i Juda, janah isuruhna erdahin i kebun-kebun anggur ras i juma-juma.

¹³Kalak Babilon menggelken tiang tembaga ras gereta-gereta tembaga si lit i bas Rumah Pertoton, rikut ras baskom tembaga si galang, jenari ibabana tembaga ndai ku Babil. [67†]

¹⁴Tambah si e ibuatna pe sekop ras ingan abu si ipake mbersihken batar-batar, perkakas-perkakas guna ngurus lampu, mangkuk-mangkuk si ipake guna nareken dareh persembahen, mangkuk-mangkuk ingan nutung kumenen, ras kerina barang-barang tembaga si debanna si ipake tupung kebaktin i bas Rumah Pertoton. [68†]

¹⁵Kerina barang-barang si ibahan i bas emas ntah pirak nari pe ibuatna, subuk mangkuk kitik ras talam si ipake guna maba arang si merara denga.

¹⁶Barang-barang tembaga si ibahan Raja Salomo guna Rumah Pertoton e, e me dua tiang, gereta-gereta, ras mangkuk galang, la terkira beratna.

¹⁷Tiang si dua e seri tempasna: ganjangna waluh meter sada tiang, i babona lit takal tiang si ibahan i bas tembaga nari, ganjangna 1,3 meter. I sekelewetna tiap takal tiang-tiang e lit sada jarikjak tembaga si ihiasi alu galiman tembaga.

¹⁸Tambah si e, ibaba puanglima Nebusaradan pe tertaban Imam si Mbelin Seraya, Sepanya wakil Imam si Mbelin, ras telu kalak nari pengurus Rumah Pertoton.

¹⁹I bas kuta Jerusalem nari ibabana bekas puanglima tentera lima kalak i bas penasehat pribadi raja si tading denga i bas kuta e, wakil puanglima tentera, si ertugas jadi sekretaris tentera, ras enam puluh kalak pengulu si debanna.

²⁰Kerina ibaba Nebusaradan ngadap raja Babilon, si sangana i kuta Ripla

²¹i bas daerah Hamat. I je isuruh raja gelah kalak ndai ipekpeki, jenari ibunuh. Dage bage me kalak Juda iangkut i bas negerina nari, janah ibuang ku negeri Babilon.

²²Raja Nebukadnesar i Babilon nari ngangkat Gedalya anak Ahikam, kempu Sapan jadi Gubernur Juda. Ia itugasken ngaturken kerina kalak si langa ibaba ku Babilon. [69†]

²³Kenca kepala-kepala tentera Juda ras anak buahna si langa nerahken bana, megi kerna si enda, ijumpaina Gedalya i Mispa. Kepala-kepala tentera ndai e me Ismael anak Netania, Johanan anak Kareah, Seraya anak Tanhumet, i kuta Netopa nari, ras Jesania i Maaka nari.

²⁴Nina Gedalya, “Labo kam perlu mbiar man pegawai-pegawai Babilon e. Ringanlah kam alu tenang i negeri enda, patuhlah man raja Babilon maka sikap sikerajangenndu.”

²⁵Tapi pitu bulan kenca si e, reh Ismael anak Natania kempu Elisama, anggota keluarga raja-raja, ku Mispa ras sepuluh kalak temanna; ibunuhna Gedalya. Kalak Israel ras kalak Babilon si ras ia i je pe ikut ibunuhna. [70†]

²⁶Kenca bage kerina kalak Israel si musil ras bayak, rikut ras kepala-kepala tentera, kerina lawes ku Mesir, erkiteken mbiar man kalak Babilon. [71†]

²⁷Kenca Ewil-Merduk jadi raja Babilon, i bas tahun e ka minter mehuli perbahanenna man Raja Joyakin i Juda nari, alu mulahi ia i bas penjara nari. Si enda jadi kenca Joyakin telu puluh enem tahun, sepuluh sada bulan, dua puluh dua wari dekahna ringan i bas pembuangen.

²⁸Mehuli kal perbahanen Ewil-Merduk, ipehaga ia lebih asangken raja-raja si deban si ibuang ras ia i Babilon.

²⁹E maka Joyakin lanai perlu make paken penjara, janah banci ia man i bas meja raja kidekah geluhna.

³⁰Tiap wari, asa dekah geluhna, ibereken man bana belanja si tetap guna nutupi keperlunna.