Read Batak Karo 2 RAJA-RAJA 4 Bible Online

2 RAJA-RAJA 4 - Batak Karo bible

2 RAJA-RAJA 4

¹I bas sada wari lit sekalak diberu balu-balu ndehara bekas anggota terpuk nabi-nabi ndahi Elisa nina, “Tuan, perbulangenku enggo mate. Bagi itehndu, ia sekalak si erkemalangen dingen mbiar man Dibata. Tapi genduari enggo reh dilaki inganna rutang nai ngelegi anakku si dilaki duana: ijadikenna atena anakku e jadi budakna man penggalar utang perbulangenku nai.”

²“Kai banci kubahan man bandu?” nina Elisa nungkun. “Turiken man bangku, kai si lit i bas rumahndu?” “Kai pe la lit, seakatan sada guci kitik-kitik isin minak saitun,” nina diberu balu-balu e.

³“To pinjam guci lume man teman-temanndu sada kuta asa si terpinjam kam,” nina Elisa nuruh diberu balu-balu e.

⁴Kenca bage lawes kam ras anakndu e ku rumahndu iruk pintu. Kenca bage si alu minak saitun si lit i bas guci si kitik-kitik e. Jenari piserken tiap guci si enggo dem.

⁵E maka lawes me diberu e ras anakna si dilaki ku bas rumahna, ierukna pintun, ibuatna guci kitik-kitik ingan minak saitun e, kenca bage iisina minak e ku bas guci e kerina sedang anakna merekenca man bana.

⁶Kenca kerina guci e enggo dem, isungkunna anakna ntah lit denga tole. “Lanai lit,” nina anak e. E maka ngadi minak saitun ndai maler.

⁷Kenca bage lawes ia mulihken ndahi Nabi Elisa, janah nina Elisa man bana, “Dayaken kerina minak saitun e, jenari galari kerina utangndu. Lebihna e kari cukup denga man bekalndu nggeluh ras anak-anakndu.”

⁸I bas sada wari lawes Elisa ku Sunem ingan tading sekalak diberu bayak. Diberu e nenahken ia man. Menaken ibas wari e nari, adi Elia ku Sunem i rumah diberu e ia rusur man.

⁹Nina diberu e man perbulangenna, “Tek aku maka dilaki si rusur reh ku jenda dilaki badia.

¹⁰Sibahanlah sada bilik kitik i babo tarum, jenari sitamaken i je sada ingan medem, sada meja, sada kursi, ras sada lampu, gelah adi reh kenca ia ndahi kita banci ia tading i je.”

¹¹I bas sada wari mulihken Elisa ku Sunem, e maka nangkih ia ku kamarna pekesahken.

¹²Jenari isuruh Elisa suruh-suruhenna Gehasi ndilo diberu e. Kenca reh,

¹³nina Elisa man Gehasi, “Sungkun diberu e kai si banci kubahan man bana mbalas kerina kelatihenna nikapken keperlunta. Tah perlu akapna aku lawes ndahi raja ntah puanglima tentera ncakapken kerna ia?” “Kerina keperlunku enggo cukup dat aku i tengah-tengah bangsangku,” nina diberu e njabapsa.

¹⁴E maka nungkun Elisa man Gehasi, “Kai dage si banci kubahan man bana?” Erjabap Gehasi, “La lit anakna dilaki; dah kam, perbulangenna pe enggo metua.”

¹⁵“Suruh ia ku jenda,” nina Elisa. Reh diberu e, janah tedis ia i bas pintun.

¹⁶Nina Elisa man bana, “Tahun si reh, i bas paksa si genduari e ka, enggo iangkipndu sekalak anakndu dilaki.” “Oh, ola bage Tuan,” nina diberu e. “Ola kam erguak bangku sabap kam sekalak suruh-suruhen Dibata!” [5†]

¹⁷Tapi, sue ras si ikataken Elisa, kira-kira i bas paksa e ka tahun si rehna, ipupusna sekalak anak dilaki.

¹⁸Piga-piga tahun kenca si e, tupung paksa peranin, sanga wari erpagi-pagi denga lawes anak ndai ndahi bapana si sangana i juma ras kalak rani.

¹⁹Rempet nderkuh ia ngelebuh bapana nina, “Andih mesui takalku, mesui takalku!” “Angkip, baba anak e ku nandena!” nina bapana man sekalak suruh-suruhen.

²⁰Iangkip suruh-suruhen ndai anak e mulihken ku nandena; iampu nandena ia seh ciger, i je mate anak e.

²¹E maka iangkip nandena anakna e ku kamar Elisa, iamparkenna i babo ingan medem jenari lawes ia, janahna nutupken pintun.

²²Kenca bage idilona perbulangenna, janah nina diberu e man bana, “Suruh ku jenda sekalak suruh-suruhen maba kelede. Perlu aku lawes ndahi nabi Elisa. Minter ka kari aku mulih ku jenda.”

²³“Man kadendu ndahi ia sendah?” nina perbulangenna nungkun. “Sendah la wari Sabat, Wari Raya Bulan Mbaru pe lang.” “Labo dalih,” nina ngaloi.

²⁴Kenca bage ipasangna pelana kelede e, iperentahkenna suruh-suruhenna nina, “Pekpeki kelede e gelah pedas erdalan la ngadi-ngadi adi langa kusuruh pengadisa.”

²⁵Bage me ia berkat lawes ku Deleng Karmel, i ja Elisa ringan. Ndauh denga pe enggo idah Elisa diberu e reh, e maka nina man suruh-suruhenna Gehasi, “Nehenlah, adah reh diberu i Sunem nari!

²⁶To pedasken dahi janah orati ntah mejuah-juah ia ras perbulangenna, bage pe anakna.” Man Gehasi ikatakenna mejuah-juah nge ia,

²⁷tapi kenca ia seh ku Elisa erjimpuh ia i lebe-lebena, jenari icikepina nahe Elisa. Itulak Gehasi atena diberu e, tapi nina Elisa, “Pelepaslah. La kin idahndu maka seh kal cedana atena? Janah langa sitik pe ikataken TUHAN man bangku kerna si e.”

²⁸Nina diberu e man Elisa, “Ma labo mbarenda kupindo anak dilaki man bandu? Ma kukataken pe ola bereken arapen man bangku?”

²⁹Erkusur Elisa, ngerana ia man Gehasi nina, “Pedasken! Buat cikenku, minter kam lawes. Adi kam jumpa kalak i tengah dalan ola kam ngadi mperkuankenca, bage pe adi iperkuanken kalak kam ola aloi. Pinter kam lawes ku rumah e, tamaken cikenku enda i babo anak e.”

³⁰Nina diberu e man Elisa, “Ersumpah aku man TUHAN si nggeluh ras man bandu, la aku nggit nadingken kam!” E maka berkat ia duana ras mulih.

³¹Gehasi namaken ciken Elisa i babo anak e, tapi la lit sora tah kai-kai pe si deban tandana anak e nggeluh. E maka mulihken ia njumpai Elisa, janah nina man Elisa, “La medak anak e.”

³²Kenca Elisa enggo seh, lawes ia sisada ku bas kamar e, iidahna anak e enggo mate ampar i babo ingan medem.

³³Itutupna pintun, e maka ertoto ia man TUHAN.

³⁴Kenca bage iamparkenna bana i babo anak e; itamakenna babahna, matana, ras tanna i babo babah, mata, ras tan anak e. Asum ia ampar i babo anak ndai, badan anak ndai enggo mulai melas. [6†]

³⁵Keke Elisa, erdalan ia mulih-ulih ku jah ku je i bas kamar e. Kenca bage mulihken ia ku ingan medem e, iamparkenna ka bana i babo anak ndai. E maka kebacihen anak ndai pitu kali, janah kenca bage imedakkenna matana.

³⁶Idilo Elisa minter Gehasi, isuruhna ndilo nande anak e. Kenca ia enggo reh nina Elisa man bana, “Enda angkip anakndu enda.”

³⁷Minter ia erjimpuh deherken nahe Elisa, ayona seh ku taneh; kenca bage iangkipna anakna ndai ndarat.

³⁸Sekali jadi asum lit kelihen i belang-belang negeri e, mulihken Elisa ku Gilgal. Tupung ia ngajari sada terpuk nabi-nabi, isuruhna suruh-suruhenna nanggerken gulenna tare kudin galang.

³⁹Sekalak i bas nabi-nabi e lawes ku juma ngelegi gule-gulen. Jumpa ia sada sinuan-sinuan si nggapa, jenari iputikkenna buahna si bagi tabu tempasna, ibuatna asa si terbabasa. Ibabana mulih, kenca bage igelatina jadi gulen; la itehna kai e situhuna.

⁴⁰Kenca bage ielaken me gulen ndai man pangan kalak e. Tapi kenca icecapna minter ia nderkuh man Elisa nina, “Lit kap enda ndai racunna!” La terpanca gulen e.

⁴¹Ipindo Elisa tepung sitik, itamakenna ku bas kudin e, kenca bage nina, “Bagiken tole gulen e man bana kerina.” Gulen ndai enggo mehuli.

⁴²Sekali ka jadi, reh me sekalak dilaki i Baal Salisa nari. Ibabana man Elisa dua puluh ngkibul roti si ibahan i bas tepung dawa si pemena iperani i bas tahun e, ras gandum si mbaru denga iperani. Salu si enda ndai isuruh Elisa suruh-suruhenna mere man terpuk nabi-nabi e.

⁴³Tapi erjabap suruh-suruhenna ndai. Nina, “Bias kin akapndu enda man seratus kalak?” Ngaloi Elisa nina, “Berekenlah man bana gelah ia man kerina, sabap enggo ikataken TUHAN kerina ia man janah lit denga kang ibana.”

⁴⁴Ielaken suruh-suruhen e pangan e, e maka man ia kerina. Kenca enggo elah lit denga iba sue ras si ikataken TUHAN.