Read Batak Karo 2 RAJA-RAJA 5 Bible Online

2 RAJA-RAJA 5 - Batak Karo bible

2 RAJA-RAJA 5

¹Naaman puanglima tentera Siria tuhu-tuhu ipehaga ras isayangi raja Siria, erkiteken arah Naaman me TUHAN enggo mereken kemenangen man tentera Siria. Ia sekalak tentera si mbisa, tapi lit penakit kulitna. [7†]

²Sekali jadi asum iserangna negeri Israel, itaban kalak Siria sekalak diberu bangsa Israel si kitik denga, si dungna jadi suruh-suruhen ndehara Naaman.

³I bas sada wari nina anak diberu e man ndehara tuanna: “Lawes tuanku ndahi nabi si ringan i Samaria, tentu ipepalemna penakitna.”

⁴Kenca ibegi Naaman si enda, idahina raja jenari iturikenna man bana kai si ikataken diberu e.

⁵Nina raja, “To dahi raja Israel janah baba surat enda man bana.” E maka berkat Naaman, ibabana telu puluh ribu duit pirak, enem ribu duit emas, ras sepuluh pasang uis mejile.

⁶Surat si ibabana e bagenda katana, “Arah surat enda kupetandaken man bandu sekalak tenterangku, Naaman gelarna. Ngarap aku maka ipepalemndu penakitna.”

⁷Kenca ioge raja Israel surat e, icaingkenna bajuna perban biarna, janah nina, “Uga banci raja Siria ngarapken aku pepalem kalak enda? Iakapna kin aku Dibata si erkuasa kerna kegeluhen ras kematen? Enggo tangkas ndarami perubaten saja ngenca atena ras aku!”

⁸Kenca ibegi Nabi Elisa kai si enggo jadi, itenahkenna berita man raja nina, “Engkai maka aru atendu? Suruh dilaki e ndahi aku, gelah ietehna maka lit nabi i Israel!”

⁹E maka lawes me Naaman ras kudana ras gereta perangna, jenari ngadi ia i bas dalan bengket ku rumah Elisa.

¹⁰Isuruh Elisa sekalak suruh-suruhen ngatakenca man Naaman gelah ridi ia pitu kali i Lau Jordan, gelah malem penakitna.

¹¹Tapi lawes Naaman alu merawa-rawa nina, “Kuakap kin reh ia ndahi aku, kenca bage ertoto ia man TUHAN Dibatana, iapkenna tanna i babo dagingku si penakiten gelah aku malem!

¹²Tambah si e, ma ndauh ulin Lau Abana ras Parpar si i Damaskus asa lau belin si apai pe i Israel enda? Bancin aku malem adi i jah aku ridi!”

¹³Tapi reh suruh-suruhenna ndeheri ia nina man Naaman, “Tuan, adi isuruh nabi e min ndai kam ngelakoken sada-sada dahin si mesera, tentu enggo ilakokenndu e. Genduari ngkai maka la banci kam ridi saja gelah malem?”

¹⁴E maka nusur Naaman ku Lau Jordan, igedapkenna bana pitu kali i bas lau e, bagi si iperentahken Elisa, e maka enggo malem ia tuhu-tuhu. Jukutna jadi bersih ras sehat, desken jukut sekalak danak-danak.

¹⁵Kenca bage mulih ia ras kerina anak buahna ndahi Elisa. Jenari nina Naaman, “Genduari enggo kueteh maka la lit Dibata i bas kerina doni enda seakatan Dibata Israel, e maka tuan, ngarap aku gelah ialokenndu pemerengku enda.”

¹⁶Nina Elisa njabapsa, “Erkiteken TUHAN si nggeluh si kusembah, ersumpah aku maka la aku nggit ngaloken kai pe.” Meseksek pemindo Naaman: gelah ialoken Elisa pemerena e, tapi la ia nggit.

¹⁷Erkiteken si e nina Naaman, “Adi la kam nggit ngaloken pemerengku, bereken dage man bangku taneh asa si terbaba dua kelede, gelah banci kubaba mulih ku kutangku. Sabap mulai genduari nari lanai ateku mpersembahken persembahen gelehen tah persembahen tutungen man dibata si apai pe seakatan TUHAN.

¹⁸Dage ngarap aku maka ialemi TUHAN salahku adi kutemani pagi rajangku ersembah ku rumah persembahen Rimon, dibata Siria. Tek aku maka nggit TUHAN ngalemi salahku!”

¹⁹“Mulihlah alu dame,” nina Elisa. E maka mulih Naaman. Tapi langa denga pe ia ndauhsa lawes,

²⁰Gehasi, suruh-suruhen Elisa, rukur i bas ukurna, “Enggo ibere tuanku si Naaman lawes alu la nggalar kai pe! Si tuhuna patut kal ialoken tuanku kai si ibereken kalak Siria e man bana. Erkiteken TUHAN si nggeluh, kuayakilah ia, gelah dat aku sitik i bas ia nari.”

²¹E maka berkat me Gehasi ngayaki Naaman. Kenca iidah Naaman maka lit kalak si ngayaki ia, nusur ia i das gereta perangna nari njumpaisa, jenari nungkun ia nina, “Kai si kurang?”

²²“Labo kai pe,” nina Gehasi ngaloi. “Tapi isuruh tuanku ngataken man bandu maka e denga nge seh dua kalak nabi si lit i deleng Eperaim. E maka mindo tuanku bandu gelah iberekenndu telu ribu duit pirak ras dua pasang uis si mejile.”

²³“Mehuli, buatlah enem ribu duit pirak,” nina Naaman ngaloi. Meseksek ipindo Naaman kerna si e, jenari itamakenna duit pirak e ku bas tas, e maka iberekenna duit e dua tas, jenari dua pasang uis si mejile man dua kalak suruh-suruhenna, kenca bage isuruh Naaman ia duana lawes leben asa Gehasi.

²⁴Kenca seh i das uruk-uruk ingan Elisa tading ibuat Gehasi tas si dua e, iangkatna ku rumah. Kenca bage isuruhna suruh-suruhen Naaman ndai mulih.

²⁵Asum Gehasi mulih ku bas rumah e isungkun Elisa ia nina, “Ku ja kam ndai Gehasi?” “Labo kujapa pe,” nina Gehasi ngaloi.

²⁶Tapi nina Elisa, “Ukurku lit i jah ndai sanga Naaman nusur i datas gereta perangna nari ngalo-ngalo kam. Labo genduari paksana ngaloken duit ras uis, peken saitun ras peken anggur, biri-biri ras lembu, tah pe suruh-suruhen!

²⁷E maka genduari penakit Naaman miser man bandu, janah kam ras kerina kesusurenndu kena penakit Naaman e rasa lalap!” Kenca ndarat Gehasi enggo penakiten ia, jukutna mbentar bagi kapas.