Read Batak Karo 2 RAJA-RAJA 7 Bible Online

2 RAJA-RAJA 7 - Batak Karo bible

2 RAJA-RAJA 7

¹Ngaloi Elisa, “Begikenlah kai si ikataken TUHAN! I bas paksa si genduari ka pagi banci itukurndu i Samaria telu kilo gandum si mejilena ntah pe enem kilo gandum si kurang ulina alu sada duit pirak.”

²Tapi nina ajudan raja man Elisa, “Labo tuhu; bicara minter pe ipesusur TUHAN udan, si e labo banci jadi!” “Iidahndu me si enda jadi, tapi ndigan pe lanai ipanndu pangan e,” nina Elisa erjabap.

³Lit empat kalak si penakit kulitna bahaya kal, sangana i darat pintu gerbang kuta Samaria nina sapih-sapih ia, “Kai gunana sitimai i jenda ngayak kita mate?

⁴Bengket ku bas kuta, e pe labo lit gunana, sabap mate kelihen kita i je. Tapi bicara sitimai pe i jenda mate kang kita. E maka otalah kita lawes ku ingan erkemah kalak Siria e; ma ibunuhna ngenca kita, tapi banci ka ipelepasna kita nggeluh.”

⁵E maka kenca enggo mulai gelap, lawes ia empatna ku ingan kalak Siria e erkemah. Tapi kenca seh la ise pe i je.

⁶Ibahan TUHAN maka tentera kalak Siria e megi tempa-tempa bagi sora kerehen tentera si nterem, rikut ras gereta perang. Iakap kalak Siria maka raja Israel enggo newa raja-raja ras tentera kalak Heti ras kalak Mesir guna merang ia.

⁷Erkiteken si e, i bas berngi e kiam kerina kalak Siria ngkelini geluhna: itadingkenna kemahna, kudana, ras keledena. Kemahna pe itadingkenna bage saja.

⁸Kenca si empat kalak ndai seh i duru ingan erkemah e, bengket ia ku sada kemah. Ipanganina ras inemina kai si lit i je, ibuatna pirak, emas ras uis si ijumpaina, e maka lawes ia munikenca. Kenca bage mulihken ia, ibengketina kemah si deban, janah bage ka nge perbahanna.

⁹Tapi dungna nina sapih-sapih ia, “La patut perbahanta enda! Lit i bas kita berita si mehuli, e maka la patut sisinikken saja. Adi sitimai ngayak pepagi maka sikataken, la banci lang kena ukum kita. Otalah kita lawes minter, gelah si kataken man pegawai raja!”

¹⁰E maka itadingken kalak ndai ingan erkemah tentera Siria e, mulihken ia ku Samaria. Ilebuhkenna penjaga-penjaga gerbang nina, “Ndai enggo kami ku ingan erkemah tentera Siria janah la lit ise pe idah ntah ibegi kami. Kerina kuda ras kelede tambat denga, janah kemah-kemah bali denga ras sanga itadingken kalak Siria e.”

¹¹Imomoken penjaga gerbang berita e, e maka iberitaken i bas istana raja.

¹²Tupung si e berngi denga, tapi ndarat raja i bas ingan medem nari nina man pegawaina, “Nta kuturiken man bandu rencana kalak Siria e. Ietehna maka kita kelihen i jenda, e maka itadingkenna inganna erkemah, jenari cebuni ia i mbalmbal. Iakapna sitadingken kuta guna ndarami pangan, kenca bage itangkapna kita geluh-geluhen janah ikuasaina kutanta.”

¹³Sekalak pegawai raja ngataken, “Kugapa pe kalak kuta enda nandangi bene nge kerina, bali ras kalak si enggo leben mate e. E maka sisuruhlah piga-piga kalak gelah sieteh kai kin si enggo jadi, ngersak kuda si lima si tading denga.”

¹⁴E maka ipilih kalak ndai piga-piga kalak dilaki. Isuruh raja ia lawes tare dua gereta perang nina, “To pepayo, ntah kai enggo jadi man tentera Siria e.”

¹⁵Lawes kalak ndai seh Lau Jordan, janah gedang-gedang dalan idahna uis ras perkakas si itadingken tentera Siria tupung ia kiam. Kenca bage mulihken kalak ndai ngelapor man raja.

¹⁶E maka kiamen ndarat kalak Samaria ngerampasi isi kemah tentera Siria. Erkiteken si e, sue ras si enggo ikataken TUHAN, telu kilo gandum si mejile ntah pe enem kilo gandum si kurang ulina, ergana sada duit pirak nge ngenca.

¹⁷Rembang tupung si ndai raja nugasken ajudanna njagai pintu gerbang kuta. Iperjaki jelma si nterem ia i je seh mate, sue ras si enggo leben ikataken Elisa asum raja njumpai ia.

¹⁸Nderbihna enggo ikataken Elisa man raja nina, “Genduari-genduari ka pagi, telu kilo gandum si mejilena ntah enem kilo gandum si kurang uli, ergana sada duit pirak ngenca.”

¹⁹Nina ajudan e ngaloisa, “Labo tuhu, labo banci jadi e aminna minter pe ipesusur TUHAN udan!” E maka erjabap Elisa, “Idahndu me si e jadi, tapi ndigan pe la ipanndu pangan e.”

²⁰Janah payo kal bage jadina man bana. Iperjaki jelma si nterem ia seh mate i pintu gerbang kuta e.