Read Batak Karo 2 RAJA-RAJA 8 Bible Online

2 RAJA-RAJA 8 - Batak Karo bible

2 RAJA-RAJA 8

¹Pernah ikataken Elisa man diberu si anakna ipegeluh Elisa mulihken nina, “Ersikaplah, laweslah kam ras keluargandu ku ingan si deban, janah i je lah kam ringan, sabap pitu tahun dekahna ibahan TUHAN metahat muat nakan i negeri enda.” [9†]

²Iikutkenna kata Elisa, e maka lawes ia ras keluargana ku negeri kalak Pilisti. I jah me ia tading kidekah si pitu tahun e.

³Kenca lepas si pitu tahun e, mulihken ia ku Israel. E maka lawes ia njumpai raja guna mindo gelah rumahna ras tanehna iulihken man bana.

⁴Idapetina raja sangana ercakap-cakap ras Gehasi, suruh-suruhen Elisa. Merincuh raja metehsa kerna tanda-tanda kuasa ibahan Elisa.

⁵Tupung Gehasi sangana nuriken man raja kuga Elisa pegeluh kalak si enggo mate, i je me diberu e nehken pemindonna man raja. Nina Gehasi man raja, “O raja, enda me diberu ndai ras anakna si ipegeluh Elisa mulihken!”

⁶Isungkun raja diberu e, e maka iturikenna maka payo nge si ikataken Gehasi e. Erkiteken si e idilo raja sekalak pegawaina, isuruhna ngulihken kerina erta-ertana atan pe tukur ulih sinuan-sinuan i bas jumana kidekah pitu tahun itadingkenna.

⁷Sekali jadi lawes Elisa ku Damaskus. Tupung e Benhadat, raja Siria rembang sangana sakit. Sanga ituriken man raja maka Elisa enggo reh ku kuta e,

⁸ikatakenna man Hasael pegawaina nina, “Babalah pemere man nabi e, jenari suruh ia nungkun TUHAN gelah ieteh ntah kin malem denga aku ntah lang.”

⁹E maka idemi Hasael empat puluh unta alu barang-barang si mejilena si ibahan i Damaskus, jenari lawes ia ngadap Elisa. Kenca jumpa ras ia nina Hasael, “Anakndu Raja Benhadat enggo nuruh aku nungkun kam ntah kin malem denga ia i bas penakitna nari ntah lang.”

¹⁰Erjabap Elisa, “Enggo ipetangkas TUHAN man bangku maka ia mate, tapi katakenlah malem nge ia.”

¹¹Kenca bage ndekah Elisa natap ku lebe. I bas ayona teridah maka ngeri kal tempa iakapna. E maka rempet ia tangis.

¹²Erkiteken si e nungkun Hasael, “Engkai maka kam tangis, Bapa?” “Sabap kueteh perkara-perkara si ngeri si nandangi ilakokenndu man bangsa Israel,” nina Elisa ngaloi. “Benteng-bentengna isuluhindu, anak-anak perana si mehulina ibunuhindu, anak-anakna iperperkenndu seh mate, janah beltek diberu si sangana mehuli kulana iburtaskenndu.”

¹³“Tapi kuga banci jadi maka seh bage belinna kuasangku? Sabap aku labo kai kal pe!” “Enggo icidahken TUHAN man bangku maka kam me jadi raja Siria,” nina Elisa njabapsa. [10†]

¹⁴Kenca bage lawes Hasael mulih ndahi Benhadat. Minter isungkunina ia nina, “Uga nina Elisa?” “Ikatakenna man bangku maka la banci lang malem me kam,” nina Hasael ngaloi.

¹⁵Tapi pepagina ibuat Hasael selembut, igedapkenna ku lau, jenari itukupkenna ku ayo raja seh mate perban la banci erkesah. E maka jadi raja me Hasael nggantiken Benhadat.

¹⁶Kenca lima tahun Joram anak Ahap jadi raja i Israel, jadi raja ka Jehoram anak Josapat i Juda.

¹⁷Tupung e umurna telu puluh dua tahun; dekahna ia jadi raja lit waluh tahun.

¹⁸Ndeharana e me anak Ahap, janah bagi keluarga Ahap, Jehoram pe ngikut-ngikut lagu langkah si jahat raja-raja Israel si deban. Erdosa ia man TUHAN,

¹⁹tapi la ate TUHAN ngkernepken Juda, sabap enggo Ia erpadan man suruh-suruhenNa Daud maka kesusurenna tetap lalap erkuasa. [11†]

²⁰I bas paksa pemerentahen Raja Jehoram, berontak Edom ngelawan kerajan Juda, e maka daerah e jadi sada kerajan merdeka. [12†]

²¹Erkiteken si e berkat Jehoram ras kerina gereta perangna ku Sair. I je ikepung tentera Edom ia. Berngina, ia ras puanglima-puanglima gereta perangna pulah i bas kepungen tentera Edom nari, tapi tenterana enggo merap, mulih ku rumahna sekalak-sekalak.

²²Bage me kerna pemberontaken Edom mulai i bas paksa e nari enggo ia merdeka i bas Juda nari. I bas paksa e kuta Lipna pe berontak.

²³Kerina perbahanen si deban si ilakoken Jehoram isuratken i bas kitap Sejarah Raja-raja Juda.

²⁴Kenca Jehoram mate, ia ikuburken i bas kuburen raja-raja i Kuta Daud, janah anakna Ahasia nggantiken ia jadi raja.

²⁵Kenca sepuluh dua tahun Joram anak Ahap jadi raja i Israel, jadi raja ka Ahasia anak Jehoram i Juda.

²⁶Tupung e umurna dua puluh dua tahun; sada tahun dekahna ia jadi raja i Jerusalem. Nandena Atalia anak Raja Ahap kempu Omri raja Israel.

²⁷Erkiteken perjabun lit perkade-kaden Raja Ahasia ras Raja Ahap. Raja Ahasia erdosa man TUHAN, bali ras si ibahan keluarga Ahap.

²⁸Iikutken Raja Ahasia Raja Joram erperang ngelawan Raja Hasael i Siria nari. Pertempuren jadi i Ramot, daerah Gileat, janah Joram luka i je.

²⁹E maka mulih ia ku kuta Jesreel nambari luka-lukana. Ahasia reh ku je njumpai ia.