Read Batak Karo 1 KRONIKA 10 Bible Online

1 KRONIKA 10 - Batak Karo bible

1 KRONIKA 10

¹Bangsa Pilisti erperang ngelawan bangsa Israel i Deleng Gilboa. Nterem bangsa Israel ibunuh i je, janah si debanna lompat, subuk Raja Saul ras anak-anakna si dilaki.

²Tapi itunduk bangsa Pilisti kalak enda, jenari ibunuhna telu anak Saul, e me Jonatan, Abinadap, ras Malkisua.

³Pertempuren tuhu-tuhu mesangat i sekelewet Saul, e maka kena panah musuh ia janah mekelek kal pengelukaina.

⁴Nina man anak perana si maba perkakas perangna, “Sintak pedangndu bunuh aku, gelah ola puas kal iakap bangsa Pilisti si la erdibata ah ngenehen kiniseranku.” Tapi mbiar kal anak perana e ngelakokenca. E maka ibuat Saul pedangna jenari itebakkenna man bana.

⁵Idah anak perana e Saul enggo mate, e maka itebakna ka bana alu pedangna jenari mate.

⁶E maka Saul ras teluna anakna dilaki, kerina mate ras-ras, jenari kerajanna pe masap.

⁷Kenca ibegi kalak Israel si ringan i Baluren Jesreel maka enggo kiamen tenterana, janah Saul ras teluna anakna enggo mate, itadingkenna kutana, jenari kiam ia. Kenca bage reh bangsa Pilisti iciatina kuta-kuta e.

⁸Pepagina, kenca perang e enggo ngadi, lawes bangsa Pilisti ngerampuki barang-barang mait-mait e. Idatca mait Saul ras anak-anakna terdang i Deleng Gilboa.

⁹Itampulna kerahung Saul, itangtangina paken perangna, jenari isuruhna suruh-suruhen mabasa kerina ku Pilisti, ngataken berita si mehuli man dewa-dewa ras rayatna.

¹⁰Itamakenna perkakas perang Saul i bas sada rumah janah takalna iolah-olahna i rumah pertoton dibata-dibatana Dagon.

¹¹Kenca ibegi kalak Jabes i daerah Gileat kai si enggo ilakoken bangsa Pilisti man Saul,

¹²lawes si mbisana ngelegi mait Saul ras teluna anakna, ibabana ku Jabes ikuburkenna i teruh batang kayu mbelin, jenari erpuasa pitu wari dekahna.

¹³Saul mate sabap la ia setia man TUHAN. La ipatuhina perentah TUHAN; icubakenna ndarami penampat alu nungkuni begu-begu kalak si enggo mate; [11†]

¹⁴la ia nungkun man TUHAN. E maka ibunuh TUHAN ia jenari iberekenNa kuasa kerajan man Daud anak Isai.