Read Batak Karo 1 KRONIKA 13 Bible Online

1 KRONIKA 13 - Batak Karo bible

1 KRONIKA 13

¹Raja Daud runggu ras kerina peminpin pasuken si seribu kalak ras peminpin si seratus kalak.

²Kenca bage imomokenna man kerina bangsa Israel nina, “Adi payo iakapndu janah adi bage peraten TUHAN Dibatanta, sisuruhlah pertenahen man temanta si sada bangsa bage pe man imam-imam dingen man kalak Lewi si ringan i bas kutana, guna ngataken man bana gelah ras kita kerina pulung i jenda.

³Kenca bage laweslah kita ngelegi Peti Perpadanen Dibatanta si la iperdiateken sanga Saul jadi raja.”

⁴Payo iakap bangsa e kerina kai si ikataken Daud janah ersada arihna kerina guna ngelakokenca.

⁵Ipepulung Daud rayat Israel i bas kerina negeri e nari -- menaken i perbalengen Mesir i Selatan seh kempak Dalan ku Hamat i Utara guna maba Peti Perpadanen i Kiryat Jearim nari ku Jerusalem. [13†]

⁶E maka lawes Daud ras bangsa e ngelegi Peti Perpadanen Dibata ku kuta Baala, e me ku Kiryat Jearim i daerah Juda. Peti Perpadanen e maba gelar TUHAN si kundul i babo Kerubim. [14†]

⁷I bas rumah Abinadap nari iangkat kalak enda ndarat Peti Perpadanen e jenari itamakenna ku das gereta si mbaru. Ussa ras Ahio mabai gereta e,

⁸tapi Daud ras kerina bangsa Israel alu dem keriahen landek-landek asa gegehna guna muji Dibata dingenna rende ras make alat musik.

⁹Asum kalak enda seh i bas ingan pengeriken Kidon, i je tertuktuk lembu e, e maka idadaken Ussa tanna njemak Peti Perpadanen e.

¹⁰Merawa TUHAN man Ussa erkiteken idadapna Peti e, e maka ibunuhNa ia janah mate Ussa i adep-adepen Dibata,

¹¹e me sabapna ingan e igelari Peres Ussa seh wari enda. Nembeh Daud erkiteken itukul TUHAN Ussa alu pernembeh ate.

¹²Kenca bage mbiar Daud kempak Dibata jenari nina, “Uga ningku mabasa Peti Perpadanen e genduari?”

¹³E maka la ibaba Daud Peti Perpadanen e ku Jerusalem. Tapi itadingkenna i bas rumah Obet Edom -- penduduk asli kuta Gat.

¹⁴Telu bulan dekahna Peti Perpadanen e tading i je. E maka ipasu-pasu TUHAN keluarga Obet Edom ras kerina sikerajangenna. [15†]