Read Batak Karo 1 KRONIKA 16 Bible Online

1 KRONIKA 16 - Batak Karo bible

1 KRONIKA 16

¹Ibaba kalak enda Peti Perpadanen e ku bas kemah si enggo isikapken Daud guna si e jenari iamparkenna i tengah-tengah kemah e. Kenca bage ipersembahkenna man Dibata persembahen tutungen ras persembahen persadan.

²Kenca Daud enggo dung mpersembahken persembahen-persembahen e, ipasu-pasuna bangsa e i bas gelar TUHAN,

³jenari ibagi-bagikenna pangan man kerina bangsa e. Man tiap kalak Israel, subuk dilaki bage pe diberu, iberekenna sepotong roti sepotong daging, janah piga-piga kue kismis.

⁴Itetapken Daud piga-piga kalak Lewi guna minpin kebaktin man TUHAN Dibata nu Israel, i lebe-lebe Peti Perpadanen alu ende-enden ras puji-pujin man baNa.

⁵Si itetapken jadi kepalana e me Asap, janah wakilna Sakaria, Jeyel, Semiramot, Jehiel, Mititiah, Eliap, Benaya, Obet Edom ras Jeyel e me si ngkuit kulcapi. Asap si malu ceracak,

⁶janah dua imam, e me Benaya ras Jahasiel, arus ngembus terompet alu teratur i bas paksa-paksa tertentu i lebe Peti Perpadanen.

⁷Mulai i bas paksa e nari me sipemenana Daud mereken tanggung jawab man Asap ras senina-seninana kalak Lewi lako ngendeken ende-enden pujin man TUHAN.

⁸Kataken bujur man TUHAN, erlebuhlah man baNa; turiken man bangsa-bangsa kai si enggo ibahanNa.

⁹Rendelah muji TUHAN; turiken perbahanen si mejin si enggo ilakokenNa

¹⁰Meriahlah ateta, sabap kita sikerajangenNa ermeriah ukurlah asa kai kalak si nembah Ia!

¹¹Ku TUHAN lah lawes mindo penampat janah sembahlah Ia asa lalap.

¹² [12-13] Kam sinursur Jakup, suruh-suruhen Dibata, kesusuren Israel, si ipilih Dibata ingetlah perbahanenNa si mejin ras keputusen-keputusen si ibahanNa.

¹⁴ TUHAN kap Dibatanta; man kerina doni kap perentah-perentahNa.

¹⁵Ola lupa perpadanen Dibata si ibahanna guna seh asa lalap.

¹⁶Perpadanen si ibahanNa ras Abraham, padan si ibahanNa man Isak. [18†]

¹⁷ TUHAN erbahan sada perpadanen ras Jakup, perpadanen si rasa lalap. [19†]

¹⁸Nina TUHAN, “Kubereken man bandu taneh Kanaan taneh e jadi sikerajangenndu.”

¹⁹Paksa si e bangsa Dibata langa nterem, lajang-lajang ia i negeri Kanaan.

²⁰Terpuk si kitik e miser-miser i bas sada negeri ku negeri si deban, i bas sada kerajan ku kerajan si deban.

²¹Tapi ise pe la ibere TUHAN nindih kalak enda; IkawaliNa kalak enda alu mpersingeti raja-raja nina, [20†]

²²“Ola sakiti suruh-suruhen pilihenKu; ola kuit nabi-nabingKu.”

²³Rendelah muji TUHAN, O kerina doni! Momoken tiap wari berita si mehuli maka Ia enggo nelamatken kita.

²⁴Momoken kemulianNa man bangsa-bangsa, perbahanenNa si mbelin man kerina bangsa-bangsa.

²⁵ TUHAN e me si mbelin janah arus ipehaga asa ganjangna; Ia arus ipehaga lebih asang kerina dibata-dibata si deban.

²⁶Dibata-dibata kerina bangsa si deban gana-gana ngenca, tapi TUHAN, Ia si njadiken langit kerina.

²⁷Kemulian ras kuasa ngkeleweti Ia, gegeh ras keriahen ndemi Rumah PertotonNa.

²⁸Pujilah TUHAN, o kerina bangsa i babo doni! Pujilah kemulianNa ras kinimbisanNa.

²⁹Pujilah gelar TUHAN si mulia; babalah persembahen, jenari ngadaplah man baNa ku bas Rumah PertotonNa. Sanga TUHAN ncicdahken baNa alu kemulianNa, erjimpuhlah i adep-adepenNa.

³⁰Nggirgirlah i adep-adepen TUHAN, o kerina doni! Doni itamaken i bas inganna alu paguh janah la banci ipiser.

³¹Meriahlah, o doni ras langit! Turiken man bangsa-bangsa maka TUHAN nge raja.

³²Ergeruhguhlah, o lawit ras kerina mahluk si lit i bas; meriahlah, o mbalmbal ras kerina si lit i je!

³³Batang-batang kayu i kerangen ersurak meriahlah i adep-adepen TUHAN sanga TUHAN reh merentah doni enda.

³⁴Kataken bujur man TUHAN, erkiteken kiniulinNa; keleng ateNa tetap rasa lalap. [21†]

³⁵Kataken man baNa, “Selamatken kami, o Dibata Si Engkelini kami; pepulung kami kerina, pulahi kami i bas bangsa-bangsa nari gelah banci kami ngataken bujur, jenari muji gelarNdu si badia.”

³⁶Pujilah TUHAN, Dibata nu Israel! Pujilah Ia genduari ras asa lalap! Kenca bage kerina perpulungen ngatakenca “Amin” jenari ipujina TUHAN.

³⁷Raja Daud netapken Asap ras senina-seninana kalak Lewi guna tetap ngurus kebaktin si ilakoken i bas ingan nimpan Peti Perpadanen e. Kalak ndai arus ngelakoken tugasna i je tep-tep wari.

³⁸Si nampatisa e me: Obet Edom ras enem puluh waluh kalak temanna sada terpuk. Si njaga pintu gerbang e me: Hosah ras Obet Edom.

³⁹Tapi Imam Sadok ras temanna sapih-sapih imam ngurus kebaktin man TUHAN i bas ingan persembahen i Gibeon.

⁴⁰Tiap pagi-pagi ras karaben kalak enda arus nutung persembahen-persembahen i babo batar-batar rikutken si isuratken i bas Undang-undang si ibereken TUHAN man Israel.

⁴¹Guna ngendesken ende-enden pujin man TUHAN erkiteken keleng ateNa si rasa lalap, khusus ipilih ras kalak enda Heman ras Jedutun ras kalak si deban.

⁴²Heman ras Jedutun pe ngurus terompet, ceracak ras alat-alat musik si deban si ipake sanga ngendeken ende-enden pujin man TUHAN. Anggota-anggota terpuk Jedutun ertugas njaga pintu-pintu gerbang.

⁴³Kenca bage mulih kerina kalak ndai ku rumahna, janah Daud pe mulih ku rumahna tading ras keluargana. [22†]