Read Batak Karo 1 KRONIKA 18 Bible Online

1 KRONIKA 18 - Batak Karo bible

1 KRONIKA 18

¹Lanai ndekahsa kenca si e iserang Raja Daud ka bangsa Pilisti janah italukenna bangsa e. Irebutna kuta Gat i bas kekuasan Pilisti nari bage pe kuta-kuta sekelewetna.

²Bangsa Moap pe italukenna. Bangsa e jadi jajahenna janah bangsa e nggalar pajak man Daud.

³Kenca si e, iserang Daud ka Hadadeser raja Soba i Siria deher daerah Hamat, sabap ate Hadadeser ngkuasai daerah arah ulu Lau Eprat.

⁴Itaban Daud seribu gereta kudana, pitu ribu pasuken si erkuda, ras dua puluh ribu pasuken si erdalan nahe. Ibuat Daud kuda cukup guna ngerintak seratus gereta perang janah lebihna ipengkarkenna kerina.

⁵Sanga bangsa Siria si ringan i Damaskus ngkirem tenterana nampati Raja Hadadeser, ilawan Daud janah ibunuhna dua puluh ribu kalak.

⁶Kenca bage ipajekken perkemahen tenterana i bas daerah e, janah kalak e enggo jadi jajahenna, e maka arus nggalar pajak man Daud. TUHAN erbahanca maka Daud menang ku japa pe ia erperang.

⁷Itaban Daud ampang-ampang emas si ibaba pegawai Hadadeser janah ibabana ku Jerusalem.

⁸Ibuatna melala tembaga i bas kuta Tibhat ras Kun nari. Duana kuta e ikuasai Hadadeser. (Dungna ipergunaken Salomo tembaga e erbahan tong, tiang-tiang ras perkakas si deban guna Rumah Pertoton.) [24†]

⁹Raja Toi i Hamat nari megi maka Daud enggo naluken kerina tentera Hadadeser.

¹⁰E maka isuruh Raja Toi anakna Joram peseh salamna man Raja Daud dingen ngataken mejuah-juah man bana kerna kemenangenna ngelawan Hadadeser si enggo usur erperang ngelawan Toi. Ibaba Joram pemere man Daud si ibahan i bas emas, pirak ras tembaga nari.

¹¹Kerina e ipersembahken Raja Daud guna ipake i bas kebaktin, rikut ras pirak ras emas si ibuatna i bas bangsa-bangsa si enggo italukenna e me bangsa Edom, Moap, Amon, Pilisti, ras Amalek.

¹²Abisai, nandena e me Seruya, ngelawan bangsa Edom i Baluren Sira janah ibunuhna 18.000 kalak bangsa Edom. [25†]

¹³Itamakenna tenterana i belang-belang Edom, janah rayat si i je jadi jajahen Daud. TUHAN erbahan Daud menang i japa pe ia erperang.

¹⁴Daud ngerajai kerina negeri Israel janah tetap mperdiateken kerina rayatna alu adil ras bujur.

¹⁵Joap senina Abisai, jadi puanglima tentera, Josapat anak Ahilut jadi bendahara;

¹⁶Si jadi imam e me Sadok anak Ahitup, ras Ahimelek anak Abiatar. Seraya jadi Sekretaris Negara;

¹⁷Benaya anak Joyada jadi kepala pengawal pribadi Daud. Janah anak Raja Daud ncikep pangkat si meganjang nampati dahin raja.