Read Batak Karo 1 KRONIKA 19 Bible Online

1 KRONIKA 19 - Batak Karo bible

1 KRONIKA 19

¹Lanai ndekahsa kenca si e mate Nahas raja Amon, janah anakna Hanun jadi raja.

²Nina Raja Daud, “Arus kucidahken kesetianku erteman man Hanun, bali ras si ilakoken bapana man bangku.” E maka isuruh Daud persuruhen encidahken maka ia pe ikut rate ceda. Kenca seh persuruhen e i Amon, janah ngadap man Raja Hanun,

³ngerana peminpin bangsa Amon man raja nina, “Iakapndu kin nghamati bapandu maka isuruh Daud persuruhen e encidahken maka ia pe ikut rate ceda ras kam? Lang! Isuruhna persuruhen e ku jenda jadi mata-mata mperdiateken negeri enda, gelah banci ikuasaina!”

⁴E maka itangkap Hanun persuruhen Daud ndai, icukurna janggutna, ikeretna uisna seh buta-butana jenari ipelawesna.

⁵La persuruhen e pang mulih perban melana akapna. Kenca ibegi Daud kai si jadi, itenahkenna kata maka persuruhen e tading lebe i Jeriho, janah ola mulih seh janggutna turah ka.

⁶Igejap Hanun ras bangsa Amon maka enggo ibahanna Daud jadi musuhna, e maka iberekenna 34.000 kilo pirak man Mesopotami Gugung, ras man negara Maaka ras Soba i Siria guna newa gereta kuda ras jelmana.

⁷Gereta kuda si 32.000 si isewana e ras tentera raja Maaka reh janah majekken kemahna deher Medeba. Bangsa Amon pe ndarat i belang-belang negerina nari jenari ersikap guna erperang.

⁸Kenca ieteh Daud kai si enggo jadi, iperentahkenna Joap ndarat ras kerina tentera.

⁹Bangsa Amon pe luar, janah muat ingan i lebe pintu gerbang kuta Raba, sedangken raja-raja si enggo reh nampati muat ingan i bas mbalmbal.

¹⁰Idah Joap maka pasuken musuh nandangi merang ia arah lebe ras arah pudi nari, e maka ipilihna tentera Israel si merawana, janah iaturna ingan tentera petala-tala ras bangsa Siria.

¹¹Si lebihna iberekenna i teruh pinpinen seninana Abisai, muat inganna guna ngelawan bangsa Amon.

¹²Nina Joap man seninana e, “Adi idahndu bangsa Siria naluken aku reh kam nampati aku, bage pe adi bangsa Amon naluken kam reh aku nampati kam.

¹³Jadilah megegeh, janah ola mbiar! Erperanglah kita asa gegehta guna bangsanta ras kuta-kuta Dibatanta. Janah peraten Dibatalah jadi.”

¹⁴Asum Joap ras tenterana maju erperang, kiamen bangsa Siria.

¹⁵Kenca idah bangsa Amon bangsa Siria kiam, bangsa Amon pe kiam dingen mundur ku bas kuta. Kenca bage mulih Joap ku Jerusalem.

¹⁶Igejap bangsa Siria maka ia enggo talu ibahan bangsa Israel, e maka ibabana pasukenna i negara Siria si i lepar Lau Eprat nari, ipinpin Sadok, puanglima tentera Raja Hadadeser i Soba nari.

¹⁷Kenca ibegi Daud kerna si e ipepulungna kerina tentera Israel, ikeparina Lau Jordan, jenari itamakenna tentera e petala-tala ras bangsa Siria. Pertempuren pe mulai

¹⁸e maka iasak kalak Israel tentera Siria mundur. Daud ras tenterana munuh 7.000 tentera Siria si ergereta kuda bage pe 40.000 tentera si erdalan nahe. Sobak puanglima tentera Siria pe ibunuhna.

¹⁹Kenca raja-raja si ijajah Hadadeser meteh maka ia enggo talu ibahan Israel, ibahanna perdamen ras Daud jenari jadi jajahen Daud ia kerina. Jenari lanai pernah nggit bangsa Siria nampati bangsa Amon.