Read Batak Karo 1 KRONIKA 21 Bible Online

1 KRONIKA 21 - Batak Karo bible

1 KRONIKA 21

¹Merincuh Iblis maba kiniseran man bangsa Israel. Erkiteken si e iajukna Daud erbahan sensus.

²Iperentahken Daud Joap ras peminpin-peminpin Israel nina, “Laweslah ku belang-belang Israel i bas ujung negeri ku ujung si deban jenari beligai rayat e, gelah kueteh beliganna.”

³Erjabap Joap nina, “Ntah mawen itambahi TUHAN beligan kalak Israel seratus kali nari asang si genduari! O Tuanku Raja, suruh-suruhenndu kap kalak e kerina. Engkai maka isensusndu atendu, janah e erbahanca kerina bangsa ersalah?”

⁴Tapi iusahaken raja maka Joap ngikutken perentahna. Lawes Joap ndalani kerina negeri Israel; kenca bage mulih ia ku Jerusalem.

⁵Ilaporkenna man Raja Daud asakai beliganna kalak si ngasup erperang, e me: 1.100.000 i Israel janah 470.000 i Juda.

⁶Perbahan la cocok iakap Joap perentah raja e, e maka la isensusna suku Lewi ras Benyamin.

⁷La meriah ukur Dibata kerna kai si enggo ilakoken, erkiteken si e iukumNa Israel.

⁸Nina Daud man Dibata, “Enggo mesangat dosa si kubahan alu erbahan sensus e! Alemi min dosangku. Motu kal perbahanenku e.”

⁹Kenca bage nina TUHAN man Gat, nabi si Daud,

¹⁰“To dahi Daud janah kataken man bana maka Kubereken man bana telu si man pilihenna. Kulakoken si apai si ipilihna.”

¹¹Lawes Gat ndahi Daud nurikenca man bana kai si enggo ikataken TUHAN nina, “Si apai si ipilihNdu?

¹²Telu tahun kelihen? Ntah telu bulan kami kiam i bas adep-adepen tentera musuh-musuhndu nari? Ntah telu wari dekahna TUHAN ngelawan kam alu pedangNa, make malekatNa maba kematen ku belang-belang taneh Israel? Apai jabapndu man TUHAN?”

¹³Erjabap Daud man Gat, “Aku i bas keadan sulit kal! Tapi la ateku manusia si ngukum aku. TUHAN jinelah si ngukum aku. Sabap Ia perkuah ate.

¹⁴Jenari ibereken TUHAN penakit sampar man bangsa Israel, e maka mate 70.000 kalak bangsa e.

¹⁵Kenca bage isuruhNa malekatNa ngkernepken Jerusalem, tapi iobahNa ukurNa, jenari nina man malekat e, “Ngadi! Enggo bias!” Malekat e sanga tedis i ingan pengeriken si Arauna kalak Jebusi.

¹⁶Idah Daud malekat e sanga tedis nahena la seh ku taneh, ncikep pedang, enggo ersikap ngkernepken Jerusalem. Kenca bage Daud ras peminpin-peminpin -- kerina make baju guni tanda ate ceda -- erjimpuh ayona seh ku taneh.

¹⁷Ertoto Daud nina, “O TUHAN Dibata, aku si sada nge si ersalah. Aku me kalakna si merentahken sensus. Kai kin si enggo ibahan rayat si musil enda? O TUHAN Dibatangku, akulah ukum ras keluargangku ola bangsaNdu.”

¹⁸Malekat TUHAN ngatakenca man Gat maka iperentahkenna Daud lawes gelah ipajekkenna sada batar-batar man TUHAN i bas ingan pengeriken Arauna.

¹⁹Ipatuhi Daud perentah TUHAN e maka lawes ia bagi si enggo ikataken Gat man bana.

²⁰I jah i bas ingan pengeriken Arauna ras empat anakna dilaki sanga ngerik gandum. Sanga idahna malekat e kiam ia empatna cebuni.

²¹Minter kenca idah Arauna Raja Daud reh, itadingkenna ingan pengeriken e jenari erjimpuh ayona seh ku taneh.

²²Nina Daud man Arauna, “Kutukur ingan pengerikenndu enda, gelah banci kubangun i jenda sada batar-batar man TUHAN, maka ngadi penakit sampar e. Kubereken man bandu asa ergana!”

²³“Buatlah, Tuanku Raja,” nina Arauna, “bahanlah kuga iakapndu mehuli.” I jenda lit piga-piga lembu man tutungen jadi persembahen i babo batar-batar. Janah enda pasangen gereta lembu ras kayu pengerik man rantingna, janah enda kubereken gandum jadi persembahen; kubereken e kerina man bandu.”

²⁴Tapi nina raja njabapsa, “Ola bage. Kugalari ateku asa ergana. La kubereken persembahen man TUHAN kai pe sikerajangenndu, si dat aku alu la nggalar.”

²⁵Jenari igalari Daud man Arauna enem ratus duit emas man tukur ingan pengeriken e.

²⁶Ibangunna i je sada batar-batar man TUHAN, jenari ipersembahkenna persembahen tutungen ras persembahen persadan. Ertoto Daud jenari ibegiken TUHAN pertotonna, alu mereken api i langit nari nutung persembahen-persembahen e i babo batar-batar.

²⁷Isuruh TUHAN malekat e nembungken pedangna janah patuh malekat man TUHAN.

²⁸Alu e idah Daud maka TUHAN enggo megiken pertotonna, e maka ipersembahkenna persembahen i babo batar-batar i bas ingan pengeriken Arauna e.

²⁹I bas paksa si e, Kemah Perjumpan TUHAN, si enggo ibahan Musa i taneh si mesawang ras batar-batar ingan nutung persembahen lit ingan persembahen i Gibeon;

³⁰tapi Daud la pang lawes ersembah man Dibata ku jah erkiteken mbiar ia pedang malekat TUHAN.