Read Batak Karo 1 KRONIKA 23 Bible Online

1 KRONIKA 23 - Batak Karo bible

1 KRONIKA 23

¹Kenca Daud enggo metua kal, anakna Salomo ibahanna jadi raja Israel. [30†]

²Ipepulung Daud kerina peminpin Israel ras kerina imam bage pe kalak Lewi.

³Isensusna kerina dilaki suku Lewi umur telu puluh tahun ku das. Beliganna kerina lit 38.000 kalak.

⁴Iaturken raja 24.000 kalak ngaturken Rumah Pertoton, 6.000 kalak ncikep surat-surat penting ras si nimbang perkara.

⁵4.000 kalak jadi pengawal, 4.000 kalak muji TUHAN alu make alat-alat musik si enggo isikapken raja guna keperlun si e.

⁶Ibagi Daud suku Lewi jadi telu terpuk, sue ras terpuk-terpukna e me: Gerson, Kohat, ras Merari.

⁷Gerson mupus dua anak dilaki e me: Ladan, ras Simei.

⁸Ladan lit telu anakna dilaki e me: Jahiel, Setam ras Joel,

⁹si jadi kepala kesusuren terpuk Ladan. (Simei lit telu anakna dilaki e me: Elomet Hasiel ras Haran.)

¹⁰[10-11] Simei mupus empat anak dilaki. Menaken sintua nari ku si nguda e me: Jahat, Sina, Jeus ras Beria. Jeus ras Beria la lit tersena kesusurenna, e maka sada terpuk saja ngenca kalak enda ikira.

¹²Kohat mupus empat anak dilaki: Amram, Eshan, Hebron ras Ussiel.

¹³Anakna sintua Amram gelarna. Amram e bapa Harun ras Musa. (Harun ras kesusurenna itetapken seh asa lalap jadi si ngaturken barang-barang si badia, nutung si merim-merim i bas ingan persembahen man TUHAN, erdahin guna TUHAN, ras masu-masu jelma si nterem i bas gelar TUHAN. [31†]

¹⁴Tapi Musa kemahan Dibata e, anak-anakna bengket ku suku Lewi.)

¹⁵Musa lit dua anakna dilaki e me: Gersom ras Elieser.

¹⁶Si jadi peminpin i bas anak-anak Gersom e me Sebuel.

¹⁷Elieser sekalak ngenca anakna dilaki e me: Rehabia, tapi Rehabia nterem kesusurenna.

¹⁸Isar e me anak Kohat si peduaken dilaki. Isar mupus anak dilaki e me Selomit. Selomit jadi peminpin terpuk.

¹⁹Anak Kohat si peteluken dilaki e me Hebron. Hebron mupus empat anak dilaki e me: Jeria, Amaria, Jehasiel ras Jekameam.

²⁰Usiel e me anak Kohat si peempatken dilaki. Usiel mupus dua anak dilaki e me Miha ras Jisia.

²¹Merari mupus dua anak dilaki e me: Mahli ras Musi. Mahli pe dua anak dilaki e me: Eleasar ras Kis,

²²tapi Eleasar mate, la lit anakna dilaki, diberu ngenca lit. Anakna si diberu e erjabu ras anak-anak Kis.

²³Musi e me anak Merari si peduaken dilaki. Musi mupus telu anak dilaki e me: Mahli, Eder ras Jeremot.

²⁴Enda me kesusuren Lewi rikutken terpuk ras keluargana. Tep-tep kalak Lewi enggo isuratken rikutken gelarna. Tep-tep sinursur menaken umur dua puluh tahun ntah lebih, itetapken erdahin i bas Rumah Pertoton TUHAN.

²⁵Nina Daud, “TUHAN Dibata Israel enggo mereken man bangsaNa dame ras keamanen, janah Ia jine tetap ringan i Jerusalem rasa lalap.

²⁶E maka lanai perlu kalak Lewi maba Kemah Perjumpan TUHAN ras barang-barang si ipake i bas persembahen.” [32†]

²⁷I bas perentah Daud si perpudina maka kerina kalak Lewi isuratken erdahin kenca umurna dua puluh tahun ku das,

²⁸jenari tetap erdahin bagi si tersena enda: nampati kesusuren Harun i bas persembahen i bas Rumah Pertoton, pekena-kena kesain ras bilik-bilik Rumah Pertoton, njagai gelah badia tiap barang-barang si badia; [33†]

²⁹nikapken persembahen pangan man Dibata, nikapken tepung si ipergunaken guna persembahen-persembahen, nikapken cimpa si la tama ragi, persembahen si ipanggang, ras nikapken tepung si iaduk ras minak saitun dingen sukat-sukat ras timbangen;

³⁰janah ertoto ras muji TUHAN tiap erpagi-pagi ras karaben

³¹janah sanga persembahen man TUHAN itutung i bas wari Sabat, i bas wari Raya Bulan Mbaru ras wari-wari raya si deban. Ibahan peraturen si netapken teremna kalak Lewi guna ndahiken dahin enda i bas kerina paksa-paksa.

³²Kalak enda itetapken pekena-kena Kemah Perjumpan TUHAN ras Rumah Pertoton nampati senina-seninana kesusuren Harun i bas rumah persembahen.