Read Batak Karo 1 KRONIKA 26 Bible Online

1 KRONIKA 26 - Batak Karo bible

1 KRONIKA 26

¹Enda me kalak Lewi si itetapken erdahin jadi pengawal Rumah Pertoton. I bas terpuk Korah e me Meselemia anak si Kore, i bas keluarga Asap nari.

²Meselemia lit pitu anakna dilaki isuratken rikut umurna e me: Sekaria, Jediael, Sebadia, Jatniel,

³Elam, Johanan ras Elyoenai.

⁴Bage pe Obet Edom si ipasu-pasu Dibata alu mereken waluh anak dilaki; isuratken rikutken umurna e me: Semaya, Jehosabat, Joah, Sakar, Netanel, [35†]

⁵Amiel, Isakar, ras Peuletai.

⁶ [6-7] Anak Obet Edom sintua dilaki e me Semaya. Semaya mupus enem anakna dilaki e me: Otni, Repael, Obet, Elsabat, Elihu ras Semakia. Kalak enda jadi kalak penting i bas terpukna erkiteken kebeluhenna. Elihu ras Semakia duana lit bakatna khusus.

⁸Keluarga Obet Edom ngelitken enem puluh dua kalak, kerina kalak pentar i bas pendahin jadi pengawal Rumah Pertoton.

⁹Keluarga Meselemia ngelitken sepuluh waluh kalak, kalak pentar i bas dahin e.

¹⁰ [10-11] I bas terpuk Merari e me: Hosa; Hosa lit empat anakna dilaki e me Simri, Hilkia, Tehalia ras Sekaria. (Aminna pe Simei labo anak sintua tapi iangkat bapana ia jadi peminpin.) Kerina keluarga Hosa si jadi pengawal Rumah Pertoton lit sepuluh telu kalak.

¹²Pengawal Rumah Pertoton ibagi i bas terpuk-terpuk rikutken keluarga-keluarga. Jenari idahikenna dahinna bali ras kalak Lewi si deban.

¹³Guna meteh arah pintu gerbang si apai keluarga-keluarga e ertugas, ibahan tikam tanduk. Keluarga si apai la erpilihen.

¹⁴Arah tikam tanduk e Selemia jadi pengawal pintu gerbang arah Timur, ras anakna Sekaria, e me si usur mereken ajar si mehuli, jadi pengawal pintu gerbang si arah Utara.

¹⁵Obet Edom dat bagin pintu gerbang si arah Selatan janah anak-anakna dat bagin njaga gudang.

¹⁶Supim ras Hosa, dat bagin njaga pintu gerbang arah Barat ras pintu gerbang Salehet arah dalan ku das. Tugas njaga ibagi pegancih-gancih ergiliren.

¹⁷Arah Timur enem pengawal erjaga tiap wari; arah Utara empat pengawal, arah Selatan empat kalak. Empat pengawal njaga gudang-gudang tiap wari, dua pengawal tiap gudang.

¹⁸Deher papiliun arah Barat empat pengawal i bas dalan janah dua pengawal i bas papiliun e jine.

¹⁹Enda me tugas-tugas pendahin pengawal terpuk Korah ras terpuk Merari.

²⁰Senina sapih-sapih kalak Lewi jadi kepala perbendaharan Rumah Pertoton, ras gudang guna pemere si man sembahenken.

²¹Ladan anak Gerson si dilaki, jadi nini man piga-piga terpuk, atan pe nini man keluarga anakna Jehiel.

²²Lit dua nari anak Ladan si dilaki si deban e me Setam ras Joel. Setam ras Joel jadi kepala perbendaharan Rumah Pertoton ras gudang.

²³Kesusuren Amram, Ishar, Hebron ras Usiel pe itetapken tugasna.

²⁴Sebuel i bas terpuk Gersom anak Musa e me kepala pegawai si erdahin guna perbendaharan Rumah Pertoton.

²⁵Arah senina Gersom si Elieser Sebuel enggo erkade-kade Selomit. Elieser e me bapa Rehabia, bapa Jesia, bapa Joram, bapa Sikri, bapa Selomit.

²⁶Selomit ras anggota-anggota keluargana ertanggung jawab kerna pemere man Dibata si ipersembahken Raja Daud, bage pe ngurus kepala-kepala keluarga, peminpin-peminpin terpuk, ras puanglima-puanglima meliter.

²⁷Piga-piga barang rampasen perang ibaba kalak enda jenari iendeskenna e guna ipergunaken i bas Rumah Pertoton.

²⁸Selomit ras keluargana ertanggung jawab guna tiap kali si enggo iendesken guna ipergunaken i bas Rumah Pertoton, subuk pemere i bas Nabi Samuel nari i bas Raja Saul nari, i bas Raja Daud nari, i bas Abner anak si Ner nari, ras i bas Joap anak si Seruya.

²⁹I bas kesusuren Ishar nari Kenanaya ras anakna si dilaki tetap ndahiken tugas administrasi: muniken surat-surat ras mberesken perkara bangsa Israel.

³⁰I bas kesusuren Hebron nari e me: Hasabia ras 1.700 kalak keluarga, kerina kalak si beluh, itamaken jadi kepala administrasi agama, ras perkara-perkara rayat i Israel arah Barat Lau Jordan.

³¹Jeria e me peminpin kesusuren Hebron. I bas tahun peempat puluhken Daud jadi raja, ibahan penelidiken kerna kesusuren Hebron enda. Ijumpai maka lit tentera-tentera si terberita i bas keluarga enda si tading i Jaser i daerah Gileat.

³²Ipilih Raja Daud 2.700 kalak kepala keluarga si terberita i bas keluarga Jeria nari jenari itamakenna kalak enda jadi kepala pengurus kerina soal agama ras perkara rayat i Israel arah Timur Lau Jordan e me daerah Ruben, Gat, ras Manase Timur.