Read Batak Karo 1 KRONIKA 28 Bible Online

1 KRONIKA 28 - Batak Karo bible

1 KRONIKA 28

¹Iperentahken Daud pulung kerina pegawai Israel i Jerusalem. Bage pe pegawai tep-tep suku, pegawai si ngurus dahin kerajan, peminpin terpuk, pengawas erta-erta ras asuh-asuhen raja ras anak-anakna, kerina pegawai kerajan, puanglima meliter, dingen kalak si penting -- pulung kerina i Jerusalem.

²Tedis Daud i lebe-lebe bangsa e jenari ngerana man bangsa e nina, “Begikenlah aku o bangsangku. Ateku majekken rumah tembok man ingan Peti Perpadanen, ingan ndeher man TUHAN Dibatanta. Enggo kubahan persikapen guna majekken rumah pertoton mpermuliaken Ia, [38†]

³tapi ilarangNa aku mbangunsa, sabap aku sekalak tentera dingen melala ngamburken dareh.

⁴TUHAN Dibata nu Israel milih aku ras kesusurenku jadi raja Israel seh asa lalap. IpilihNa Juda ngelitken peminpin dingen i bas Juda nari ipilihna keluarga bapangku. I bas kerina keluarga e enggo meriah ukurNa milih aku jenari njadiken aku raja man kerina bangsa Israel.

⁵IberekenNa man bangku nterem anak dilaki dingen i bas anak-anakku si nterem e nari ipilihNa Salomo jadi raja man kerina bangsa Israel, kerajan Dibata e.

⁶Nina TUHAN man bangku, ‘Anakndu si Salomo kap kalakna si majekken Rumah PertotonKu. Enggo Kupilih ia jadi anakKu janah Aku jadi bapana.

⁷Kubahan tetap kerajanna adi iteruskenna ngikutken alu metenget kerina undang-undangKu, ras perentah-perentahKu bagi si genduari e.’

⁸E maka genduari o rayatku, i adep-adepen Dibatanta dingen i lebe-lebe kerina bangsa Israel bangsa TUHAN enda, kukataken man bandu kerina: Tutuslah atendu ngikutken kerina si enggo iperentah TUHAN Dibatanta man bangsa, maka banci tetap kam empuna negeri si mejile enda janah banci itadingkenndu e man kesusurenndu rasa lalap.”

⁹Jenari nina man anakna Salomo, “O anakku, kukataken man bandu, tandailah Dibata bapandu dingen erdahinlah guna Ia alu bulat ukurndu janah tutus atendu. Itandai Dibata kerina perukuren ras sura-suranta. Adi idahindu Ia, ijumpaiNa kam. Ia si mbebasken kam rasa lalap.

¹⁰Arus ingetndu maka TUHAN enggo milih kam guna majekken Rumah Pertoton si badia e. Genduari bangun dage Rumah Pertoton e -- dingen bangunlah e tuhu-tuhu.”

¹¹Ibereken Daud man Salomo rencana guna kerina bangunen Rumah Pertoton e, guna majekken gudang-gudang ras kerina ruangen-ruangen si debanna, bage pe guna majekken Kamar si Badiana kal, e me ingan pengalemi dosa.

¹²Iberekenna ka pe rencana kerina si iukurkenna guna majekken kesain Rumah Pertoton ras kamar-kamar i sekelewetna bage pe guna majekken gudang-gudang ingan perkakas Rumah Pertoton ras persembahen-persembahen si iendesken man TUHAN.

¹³Ibahan Daud ka pe pembagin tugas imam ras kalak Lewi guna ndahiken dahinna i bas Rumah Pertoton ras ngurus kerina perkakasna.

¹⁴Iberekenna pirak ras emas asa cukupna guna ipake erbahan perkakas-perkakas e,

¹⁵guna erbahan kerina lampu ras nahe lampu,

¹⁶guna meja pirak ras meja emas ingan ngamparken roti si man persembahenken man Dibata.

¹⁷Ibereken Daud ka pe pelajaren asa kai buena emas tulen ipake guna erbahan garpu-garpu, guna erbahan mangkuk-mangkuk ras guna erbahan guci-guci, asa kai buena pirak ras emas guna erbahan piring-piring,

¹⁸dingen asa kai buena emas tulen ipake erbahan batar-batar ingan nutung simerim-merim ras asa kai buena emas murni ipake guna erbahan gereta ingan mahluk si erkabeng ngkimbangken kabengna i babo Peti Perpadanen TUHAN.

¹⁹Nina Raja Daud, “Kerina enda tersurat i bas tulisen rikutken perentah-perentah si ibereken TUHAN jine man bangku gelah kubahan.”

²⁰Nina Raja Daud man anakna Salomo, “Tetapkenlah ukurndu tutuslah. Benakenlah erdahin janah ola bere kai pe ngambati kam. TUHAN Dibata si kusembah Ia lah ras kam. La kam itadingkenNa, tapi tetap tading ras kam seh kam dung ndahiken Rumah PertotonNa.

²¹Imam-imam enda ras kalak Lewi enda enggo itetapken ndahiken tugas i bas Rumah Pertoton. Kalak si erdahin alu erbage-bage kebeluhen merincuh nampati kam, janah kerina rayat ras peminpin-peminpin lit i teruh perentahndu.”