Read Batak Karo 1 KRONIKA 29 Bible Online

1 KRONIKA 29 - Batak Karo bible

1 KRONIKA 29

¹Nina Raja Daud man kerina perpulungen e, “Anakku Salomo kalak si enggo ipilih Dibata. Tapi ia nguda denga, la lit pengalamenna. Sabap si man bahanen e la istana manusia tapi Rumah Pertoton man TUHAN Dibata. [39†]

²Asa gegehku enggo kulitken persedian guna Rumah Pertoton e. E me: emas, pirak, tembaga, besi, kayu, batu permata syokam, mutiara, batu mosaik dingen melala batu marmar.

³I datas ras i babo si e kerina, erkiteken keleng ateku man Rumah Pertoton Dibata, tambah si enggo kusikapken e kerina, kubereken pe erta ngku, e me emas ras pirak.

⁴Kubereken tole emas si mejilena lebih seratus ton ras pirak menam 240 ton guna hiasen dingding Rumah Pertoton e

⁵dingen man kerina si ibahan tukang-tukang. Genduari ise nari meriah ukurna mereken persembahen man TUHAN?”

⁶E maka meriah ukur kepala terpuk, pegawai suku, komendan meliter, ras pengurus erta kerajan mereken

⁷pemere enda guna dahin Rumah Pertoton e. Iberekenna 170 ton emas, 310 ton pirak, 620 ton tembaga, 3.400 ton besi.

⁸Ise si lit i bas ia batu-batu permata iberekenna e jadi erta Rumah Pertoton si iurus Jehiel kalak Lewi i bas terpuk Gerson nari.

⁹Bangsa emere man TUHAN alu ukur meriah dingen seh riahna iakapna mere e. Raja Daud pe lanai kin alang-alang riahna iakapna.

¹⁰I adep-adepen kerina perpulungen e ipuji Daud TUHAN nina, “TUHAN Dibata nu nini kami Jakup, terpujilah Kam asa lalap seh rasa lalap.

¹¹Kam kap si mbelin, Kam kap si terberita, Kam kap si mulia, Kam kap si mehulina dingen Kam kap si Mada Kuasa. Kerina langit ras doni Kam si madasa, Kam kap raja, pemerentah i babo kerinana. [40†]

¹²Kerina erta-erta ras kebayaken rehen i bas Kam nari nge; Kam merentah kerinana alu kuasa ras gegehNdu. Janah Kam ngasup erbahan kalak jadi si mbelin dingen erkuasa.

¹³Genduari O Dibata kami, ikataken kami bujur man baNdu dingen ipuji kami gelarNdu si Mulia!

¹⁴Sabap bangsangku ras aku tuhu-tuhu la ngasup mere man baNdu, sabap kerina ialoken kami i bas Kam nari nge, janah kami ngulihkenca ngenca man baNdu kai si enggo iberekenNdu man kami.

¹⁵IetehNdu maka ibentasi kami geluh kami, bagi kalak perlajang ras pertandang bali ras nini-nini kami. Wari-wari kami lepas bagi awih, dingen la lit pengarapen kami.

¹⁶O TUHAN Dibata kami, enggo ipepulung kami erta enda kerina guna majekken Rumah Pertoton guna kemulian gelarNdu si badia, tapi kerina e reh i bas Kam nari dingen Kam nge empuna kerina.

¹⁷Kueteh maka Kam si nguji pusuh peraten dingen meriah iakapNdu ras bangsa si ertutus ate. I bas pusuh peraten si bersih ras bujur, meriah ukurku merekenca enda kerina man baNdu, janah kuidah kuga bangsaNdu si enggo pulung i jenda alu meriah ukur maba persembahen-persembahen man baNdu.

¹⁸O TUHAN Dibata nu nini kami Abraham, Isak ras Jakup, jagailah kinipatuhen kalak enda rasa lalap maka tetap ukur bangsaNdu dingen jagailah ia lalap maka setia man baNdu.

¹⁹Bereken min man anakku Salomo enda kebulaten ukur ngikutken kerina si enggo iperentahkenNdu dingen majekken Rumah Pertoton si enggo kubahan persedian-persedianna enda.”

²⁰Kenca bage isuruh Daud bangsa e nina, “Pujilah TUHAN Dibatandu!” E maka kerina perpulungen e muji TUHAN, Dibata nu nini-ninina dingen erjimpuh ras mereken kemulian man TUHAN bage pe man raja.

²¹Pepagina igeleh kalak enda asuh-asuhen selaku persembahen si iendeskenna man TUHAN jenari ibereken man bangsa guna ipan. Tambahenna ipersembahken kalak enda seribu lembu, seribu bajar, seribu biri-biri si nguda denga; kerina e itutung kalak enda i babo batar-batar. Lau anggur pe ipersembahken kalak enda ka.

²²E maka i bas wari e meriah kal ukur kalak enda, man ras minem i adep-adepen TUHAN. Kenca bage, pedua kaliken imomokenna Salomo raja. I bas gelar TUHAN, itangkuhken Salomo jadi raja dingen Sadok jadi imam.

²³Alu bage Salomo nggantiken bapana Daud i bas kursi kinirajan si enggo itetapken TUHAN. Ia jadi raja si erkuasa janah kerina bangsa Israel ngikutken ia. [41†]

²⁴Kerina pegawai-pegawai ras tentera bage pe kerina anak-anak Daud si deban erpadan patuh man Salomo selaku raja.

²⁵TUHAN erbahanca maka kerina bangsa erkemalangen man Salomo dingen ibahanNa maka Salomo me si muliana asangken raja si deban si enggo merentah Israel.

²⁶Daud anak Isai merentah Israel

²⁷empat puluh tahun dekahna. Ia merentah i Hebron pitu tahun dingen telu puluh telu tahun i Jerusalem. [42†]

²⁸Ia mate kenca cawir metua, bayak ras ihamati, jenari anakna Salomo nggantiken ia jadi raja.

²⁹Sejarah Raja Daud bena-benana seh ku kedungenna isuratken i bas cataten telu nabi e me: Nabi Samuel, Natan ras Gat.

³⁰Cataten e nuriken kuga ia merentah, kuga gegehna, dingen kerina si jadi man bana, man Israel ras kerajan sekelewetna.