Read Batak Karo 1 KRONIKA 4 Bible Online

1 KRONIKA 4 - Batak Karo bible

1 KRONIKA 4

¹Enda me piga-piga kesusuren Juda: Peres, Hesron, Karmi, Hur, ras Sobal.

²Sobal bapa Reaya; Reaya bapa Jahat; Jahat bapa Ahumai ras Lahat, nini bangsa si ringan i Sora.

³ [3-4] Hur e me anak Kalep sintua i bas ndeharana Eprat, janah kesusurenna me si manteki kuta Betlehem. Hur mupus telu anak dilaki, e me: Etam, Penuel, ras Eser. Etam lit telu anakna dilaki: Jesreel, Isma, ras Idbas janah sekalak diberu gelarna Haselelponi. Penuel manteki kuta Gedor, janah Eser manteki kuta Husa.

⁵Ashur si manteki kuta Tekoa, lit dua ndeharana, e me: Hela, ras Naara.

⁶I bas ndeharana Naara lit i je empat kalak anakna dilaki, e me: Ahusam, Heper, Temeni, ras Hahastari.

⁷I bas ndeharana Hela i je lit telu kalak anakna dilaki, e me: Seret, Ishar, Etnan.

⁸Kos e me Anub ras Sobeba, janah ia me nini terpuk kesusuren Aharhel anak Harum si dilaki.

⁹Lit me sekalak dilaki, Jabes gelarna. Ia me si ihamati kalak kal i bas keluargana. Ibahan nandena gelarna Jabes sabap mesui kal iakapna mupussa.

¹⁰Tapi ertoto Jabes man Dibata Israel nina, “Pasu-pasu aku o Dibata, janah bereken bangku taneh mbelang. Temanilah aku, janah pedauhlah si jahat i bas aku nari si erbahanca ateku mesui.” E maka ibereken Dibata man bana kai si itotokenna.

¹¹Kalep senina Suha, lit sekalak anakna dilaki Mehir gelarna. Mehir e me bapa Eston;

¹²Eston lit telu kalak anakna dilaki e me: Betrapa, Paseah, ras Tehina. Tehina me si manteki kuta Nahas. Kesusuren kalak enda ringan i Reka.

¹³Kenas lit dua kalak anakna dilaki, e me: Otniel ras Seraya. Otniel pe lit ka dua kalak anakna dilaki, e me Hatat ras Meonotai.

¹⁴Meonotai e me bapa Opra. Seraya e me bapa Joap, si manteki kuta Baluren Tukang-tukang; pendudukna e me tukang-tukang si beluh.

¹⁵Kalep anak Jepune, lit telu kalak anakna dilaki: Iru, Ela ras Naam. Janah Ela me bapa Kenas.

¹⁶Jehalelel lit empat anakna dilaki, e me: Sip, Sipa, Tiria ras Asarel.

¹⁷ [17-18] Esrah lit empat anakna dilaki: Jeter, Meret, Eper, ras Jalon. Meret ngempoi Bitia, anak raja Mesir; i je lit sekalak anakna diberu, Miriam gelarna, ras dua kalak dilaki; e me Samai ras Isba. Isba manteki kuta Estemoa. Meret pe erjabu ka ras sekalak diberu suku Juda, janah i je lit telu kalak anakna dilaki: Jeret si manteki kuta Gedor: Heber si manteki kuta Soko; ras Jekutiel si manteki kuta Sanoa.

¹⁹Hodia ngempoi turang Naham. Kesusurenna me si manteki terpuk Garmi, si ringan i kuta Keila, ras terpuk Maakat, si ringan i kuta Estemoa.

²⁰Simon lit empat kalak anakna dilaki, e me: Amnon, Rina, Behanan, ras Tilon. Isi mupus dua kalak anak dilaki: Sohet ras Bensohet.

²¹Sela e me anak Juda. Kesusurenna e me i Er, si manteki kuta Leka; Laada si manteki kuta Maresa; terpuk tukang tenun uis lenen, si ringan i kuta Bet Asbea;

²²Jokim ras kalak si ringan i kuta Koseba; ras Joas ras Sarap, si ngempoi beru Moap jenari ringan ia i Betlehem. (Adat enda enggo seh kal tuana.)

²³Kalak enda tukang kudin, suruh-suruhen raja, janah ringan i kuta Netain ras Gedera.

²⁴Simeon mupus lima anak dilaki, e me: Nemuel, Jamin, Jarip, Sera ras Saul.

²⁵Anak Saul e me Salum, kempuna Mibsam gelarna. Misma e me anak Mibsam.

²⁶Jenari kesusuren Misma terus nusur kempak Hamuel, Sakur, ras Simei.

²⁷Simei lit sepuluh enem anakna dilaki, janah enem anakna diberu. Tapi kade-kadena la bage buena anakna, janah suku Simeon, la merih bagi kesusuren suku Juda.

²⁸Seh kempak jaman pemerentahen Raja Daud kesusuren Simeon ringan i kuta-kuta si tersena arah teruh enda: Berseba, Molada, Hasarsual, [4†]

²⁹Bilha, Esem, Tolad,

³⁰Betuil, Horma, Siklak,

³¹Bet Markobat, Hasarsusim, Betbiri ras Saaraim.

³²Kalak enda pe ringan i bas lima ingan si debanna, e me i Etam, Ain, Rimon, Token ras Asan,

³³ras kuta-kuta sekelewetna, seh ku Barat Daya i kuta Baalat. Enda me terombo si ibuniken tep-tep keluarga, rikut ras kuta-kuta inganna tading.

³⁴ [34-38] Kalak si tersena arah teruh enda, e me kepala terpuk kalak enda: Mesobab, Jamlek, Josa anak Amasia, Joel, Jehu (anak Josibia; Josiba anak Seraya; Seraya anak Asiel), Elyoenai, Jaakoba, Jesohaya, Asaya, Adiel, Jesimiel, Benaya, Sisa (anak Sipi; Sipi anak Alon, sada kesusuren i bas Jedaya, Simri ras Semaya). Erkiteken keluargana terus nterem,

³⁹merap ia kempak Barat, menam seh ku Gerar janah ipermakanina biri-birina arah Timur baluren ingan kuta e.

⁴⁰Jumpa kalak enda mbalmbal si mehuli ras mehumur i je. Mbalmbal e kendit dingen mbelang, dingen aman. Ope denga si e bangsa si ringan i je, e me bangsa Ham.

⁴¹Sanga pemerentahen Raja Hiskia i Juda, kalak si tersena gelarna arah das ndai lawes ku Gerar, jenari ikernepkenna kemah-kemah ras sapo bangsa si ringan i je. Ipelawesna bangsa e, jenari tetap ia tading i je sabap mbelang i je mbalmbal man ingan biri-birina.

⁴²Lima ratus kalak nari anggota suku Simeon lawes kempak Timur, ku Edom. Kalak enda ipinpin anak-anak Isi, e me: Pelatia, Nearia, Repaya, ras Usiel.

⁴³I jah ibunuhna bangsa Amalek si tading denga, janah mulai i bas paksa e nari ringan ia i je.