Read Batak Karo 1 KRONIKA 5 Bible Online

1 KRONIKA 5 - Batak Karo bible

1 KRONIKA 5

¹Enda me sinursur Ruben, anak Jakup sintua. Erkiteken enggo ia ersada kula ras gundik bapana, e maka ia kebenen hak anak sintua janah hakna e ibereken man Jusup. [5†]

²Amin bage gia suku Juda nge si jadi si megegehna, janah i bas suku enda nari me rusur si minpin suku-suku e kerina. [6†]

³Ruben anak Jakup sintua, lit empat kalak anakna dilaki, e me: Enoh, Palu, Hesron, Karmi.

⁴ [4-6] Enda me kesusuren Joel i bas kesusuren ku kesusuren: Semaya, Gok, Simei, Miha, Reaya, Baal, ras Beera. Raja Assur, Tiglat Pileser, itangkapna Beera peminpin suku Ruben, jenari ibuangna ku negeri si deban. [7†]

⁷I bas terombo keluarga enda terdaftar me gelar peminpin-peminpin terpuk i bas suku Ruben: Jeyel, Sakaria,

⁸ras Bela anak Asas janah kempu Sema i bas terpuk Joel nari. Terpuk enda ringan i Aroer, ras i daerah Utara seh ngayak Nebo ras Baal Meon.

⁹Melala kal rarasen asuh-asuhenna i taneh Gileat, e maka iinganina ingan e seh ku gurun pasir i Timur, si belangna seh ku Lau Eprat.

¹⁰I bas paksa pemerentahen Raja Saul, iserang suku Ruben kalak Hagri, ibunuhina i bas peperangen, jenari iinganina negeri e i bagin Timur Gileat.

¹¹Suku Gat ringan i Utara Ruben, i negeri Basan seh ku arah Timur Selaka.

¹²Joel me si manteki terpuk si terberitana, janah Sapam si manteki terpuk si peduaken si pentingna. Janai ras Sapat e me si manteki terpuk-terpuk si deban i Basan.

¹³Anggota-anggota si deban i bas suku e subuk i bas terpuk si pitu si tersena arah teruh enda: Mikael, Mesulam, Seba, Jorai, Jakan, Sia ras Eber.

¹⁴Kalak enda me kesusuren Abihail anak Huri, si terombona banci iikuti bagi tersena arah teruh enda: Abihail, Huri, Jaroa, Gileat, Mikael, Jesisai, Jahdo, Bus.

¹⁵Ahi, anak Abdiel, kempu si Guni, ia me peminpin terpuk-terpuk enda.

¹⁶Kalak enda ringan i daerah Basan ras i Gileat, i bas kuta-kuta si i je janah kerina mbalmbal negeri Saron. (

¹⁷Terombo enda isuratken i bas paksa pemerentahen Raja Jotam i Juda ras pemerentahen Raja Jerobeam i Israel.)

¹⁸I bas suku Ruben, Gat, ras Manase Timur, lit 44.760 tentera, si terlatih mehuli make ampang-ampang, pedang ras panah.

¹⁹Lawes ia erperang ngelawan bangsa Hagri i bas suku-suku Jetur, Napis, ras Nodap nari.

²⁰Ernalem ia man Dibata janah ertoto man Bana mindo penampat, e maka ialoi Dibata pemindonna, jenari ibahan Dibata maka menang ia ngelawan bangsa Hagri ras sekutuna.

²¹Ibuatna i bas musuh-musuhna nari 50.000 unta, 250.000 biri-biri ras 2.000 kelede, jenari itabanna 100.000 tabanen perang.

²²Nterem ibunuhna musuh, sabap perang e peraten Dibata kap. Jenari terus kalak enda ringan i daerah e seh ngayak paksa pembuangen.

²³Kalak Manase Timur tading i daerah Basan seh ku Baal Hermon i Utara, Senir, ras Deleng Hermon, janah kalak enda seh kal buena pertambahenna.

²⁴Enda me peminpin terpukna: Eper, Isi, Eliel, Asriel, Jeremia, Hodawia, ras Jahdiel. Kerina kalak enda tentera si mbisa, peminpin si terberita i bas terpukna.

²⁵Tapi bangsa e la setia man Dibata nini-ninina, janah nilah ia lako nembah man dibata-dibata bangsa-bangsa si enggo ipelawes Dibata i bas negeri e nari.

²⁶E maka ibahan Dibata maka Raja Pul i Assur nari (si igelari pe Tiglat Pileser) nerbu negeri kalak e. Ibuangna suku-suku Ruben, Gat ras Manase Timur janah itetapkenna ingan tading kalak enda i Halah, Habor, ras Hara i tepi Lau Gosan. [8†]