Read Batak Karo 1 KRONIKA 9 Bible Online

1 KRONIKA 9 - Batak Karo bible

1 KRONIKA 9

¹Kerina kalak Israel idaftarken rikutken keluargana, keterangen enda isuratken i bas Kitap Raja-raja Israel. Kalak Juda enggo ibuang ku Babil selaku ukumen erkiteken dosa-dosana.

²Kalak si pemena si mulih ku tanehna i bas kuta-kuta e me rayat biasa kalak Israel, imam-imam, kalak Lewi, ras kalak si erdahin i bas Rumah Pertoton. [10†]

³Kalak si i bas suku Juda, Benyamin, Eperaim, ras Manase lawes ringan i Jerusalem.

⁴ [4-6] Lit 690 keluarga i bas suku Juda nari si ringan i Jerusalem. Si jadi peminpin kesusuren Peres, anak Juda e me: Utai anak Amihut, kempu Omri. Nini-ninina si deban e me Imri ras Bani. Si jadi peminpin kesusuren Sela anak Juda, e me Asaya; ia me peminpin keluargana. Si jadi peminpin kesusuren Sera anak Juda, e me Jewel.

⁷ [7-8] Enda me anggota-anggota suku Benyamin si ringan i Jerusalem. Salu anak Mesulam; Mesulam e me anak Hodawia, e me anak Hasenua. Ibneya anak Jeroham si dilaki. Ela, anak Ussi, kempu Mikri. Mesulam anak Sepatia si dilaki; Sepatia e me anak Rehuel si dilaki: Rehuel e me anak Ibnija.

⁹Lit 956 keluarga anggota suku enda si ringan i jah. Kerina kalak si gelarna i das ndai e me kepala-kepala keluarga.

¹⁰ [10-12] Imam si tersena arah teruh enda ringan i Jerusalem: Jedaya, Joyarip, ras Jahin, Asaria anak Hilkia si dilaki (kepala pegawai i bas Rumah Pertoton); nini-ninina e me Mesulam, Sadok, Merayot ras Ahitup Adaya anak Jeroham; nini-ninina e me Pashur, ras Malkia Maasai anak Adiel; nini-ninina e me Jahsera, Mesulam, Mesilemit ras Imer.

¹³Imam si jadi kepala keluarga lit teremna 1.760 kalak. Kalak enda beluh kal ndahiken kerina dahin si ilakoken i bas Rumah Pertoton.

¹⁴ [14-16] Enda me suku Lewi si ringan i Jerusalem: Semaya anak Hassup; nini-ninina e me Asrikam ras Hasabia, i bas terpuk Merari nari. Bakbakar, Heres, ras Galal. Matania anak Miha; nini-ninina e me Sikri ras Asap. Obaja anak Semaya; nini-ninina e me Galal ras Jedutun. Berekia anak Asa, kempu Elkana, si ringan i bas daerah kekuasaan kuta Netopa.

¹⁷Enda me pengawal-pengawal Rumah Pertoton si ringan i Jerusalem: Salum, Akup, Talmon ras Ahiman. Salum e me peminpinna.

¹⁸Mulai i bas paksa e nari anggota-anggota terpuk kalak enda me si njaga pintu arah Timur dalan bengket ku Pintu Gerbang Raja. Ope denga si e kalak enda erjaga i bas gerbang perkemahen kalak Lewi.

¹⁹Salum, anak Kore, kempuna Ebiasap, radu ras senina-seninana anggota-anggota terpuk Korah, ertanggung jawab njagai dalan bengket ku bas Kemah Perjumpan, bali ras nini-ninina si ertugas i bas perkemahen TUHAN.

²⁰Pinehas anak Eleasar -- Dibatalah ras ia! -- enggo pernah jadi kepala kalak enda i bas sada paksa.

²¹Sakaria anak Meselemia pe sekalak pengawal i bas dalan bengket ku bas Kemah Perjumpan.

²²Kerina lit 212 kalak si ipilih selaku pengawal pintu ras pintu gerbang. Kalak enda icatat rikutken kuta-kuta inganna tading. Raja Daud ras Imam Samuel me si enggo namaken nini-nini kalak enda i bas inganna si penting e.

²³Kalak enda ras kesusurenna nerusken pengawalen i pintu gerbang Rumah Pertoton.

²⁴Lit sada pintu gerbang i bas tiap dampar: Utara, Selatan, Timur ras Barat, janah i bas tiap pintu gerbang lit sekalak kepala pengawalna.

²⁵Pengawal-pengawal enda isampati kade-kadena si ringan i kuta-kuta. Kalak enda arus pegancih-gancih ertugas jaga, janah sekali ertugas pitu wari dekahna.

²⁶Kepala pengawal si empat e me suku Lewi janah ia me si ertanggung jawab kerna pendahin anak buahna. Ia pe ertanggung jawab kerna kamar-kamar i bas Rumah Pertoton ras persedian barang-barang si isimpan i je.

²⁷Kalak enda ringan deherken Rumah Pertoton, sabap tugasna kap ngkawalisa janah nalangi pintu gerbang tiap erpagi-pagi.

²⁸Suku Lewi si deban ertanggung jawab kerna alat-alat si ipake sanga kebaktin. Asal ipake alat-alat e, ia si pepayosa subuk sanga ipedarat bage pe sanga iulihken.

²⁹Si debanna ertugas ngurus perkakas-perkakas si badia si deban, ngurus tepung, anggur, minak, kumenen, ras rempah-rempah.

³⁰Tapi si ertanggung jawab guna ngaduk rempah-rempah e me imam-imam.

³¹Sekalak ka kalak Lewi, Matitia gelarna, anak Salum sintua, i bas terpuk Korah nari, ia me si ertanggung jawab guna nikapken roti man persembahen.

³²Anggota-anggota terpuk Kohat si deban ertanggung jawab guna nikapken roti si badia guna Rumah Pertoton tiap wari Sabat.

³³Piga-piga keluarga kalak Lewi ertanggung jawab guna musik Rumah Pertoton. Kepala-kepala keluarga enda tading i bas gedung si jadi bagin Rumah Pertoton e, janah bebas ia i bas dahin-dahin si deban, sabab tiap paksa banci ia idilo suari ras berngi.

³⁴Kalak si tersena gelarna arah das ndai me kepala keluarga suku Lewi, rikutken kesusuren nini-ninina. Kalak enda me peminpin-peminpin si ringan i Jerusalem.

³⁵Jeyel manteki kuta Gibeon jenari ringan ia i je. Gelar ndeharana e me si Maaka.

³⁶Anakna sintua e me Abdon, janah anakna si deban dilaki e me: Sur, Kis, Baal, Ner, Nadap,

³⁷Gedor, Ahio, Sekaria ras Miklot,

³⁸bapa Simea. Kesusurenna ringan i Jerusalem ndeher ras keluarga-keluarga si deban anggota terpukna.

³⁹Ner e me bapa Kis, janah Kis e me bapa Saul. Saul mupus empat anakna dilaki, e me Jonatan, Malkisua, Abinadap ras Esbaal.

⁴⁰Jonatan e me bapa Meribaal. Meribaal e me bapa Miha.

⁴¹Miha mupus empat anakna dilaki; e me Piton, Melek, Tarea, ras Ahas.

⁴²Ahas e me bapa Jara, Jara e me bapa telu kalak anak dilaki: Alemet, Asmawet, ras Simri. Simri e me bapa Mosa.

⁴³Mosa e me bapa Binea; Binea e me bapa Repaya; Repaya e me bapa Eleasa, ras Eleasa e me bapa Asel.

⁴⁴Asel lit enem anakna dilaki: Asrikam, Boheru, Ismael, Searia, Obaja, ras Hanan.