Read Batak Karo 2 KRONIKA 10 Bible Online

2 KRONIKA 10 - Batak Karo bible

2 KRONIKA 10

¹Lawes Rehabeam ku Sikem. I je enggo pulung kerina kalak Israel si arah Utara guna nangkuhken ia jadi raja.

²Tupung Jerobeam anak Nebat, lompat ku Mesir nelamatken bana i bas Salomo nari, megi kerna si enda, mulihken ia ku Israel.

³Itenahken suku Israel si arah Utara, jenari ras ia kerina ndahi Rehabeam nina,

⁴“Bapandu enggo ngampeken baban si mberat man kami. Adi ipenahangindu baban e dingen ibahanndu kami nggeluh tersenangen, kami jadi suruh-suruhenndu.”

⁵Nina Rehabeam njabapsa, “Bereken man bangku telu wari mpertimbangken pemindonndu e. Kenca bage reh kam mulihi.” E maka lawes rayat e.

⁶Isungkuni Raja Rehabeam kalak si enggo metua e me penasehat bapana Salomo nai. Nina nungkun, “Kai nasehatndu man bangku si man katankenku man rayat e?”

⁷Nina tua-tua e njabapsa, “Adi kam mehuli man rayat e dingen icubakenndu erbahan meriah iakapna alu mereken jabapen ate si mekuah, ia tetap jadi suruh-suruhenndu si setia.”

⁸Tapi ipersilahangna ajar kalak si enggo metua e. Lawes ia man kalak si nguda si sebekbek ras ia si genduari enggo jadi penasehatna.

⁹“Kai nasehatndu man bangku?” nina nungkunsa. “Uga ningku njabap rayat e? Pemindonna e me gelah ipenahangi babanna.”

¹⁰Nina penasehatna e njabapsa, “Bagenda nindu man bana, ‘Anak jaringku belinen asangken awak bapangku.’

¹¹Kataken man bana bagenda, ‘Itamaken bapangku baban si mberat, terberaten denga ka asang si e kutamaken man bandu. Iligasna kam salu purih, kuligas kam salu cambuk kuda!’ ”

¹²Kenca enggo telu wari, Jerobeam ras kerina rayat e ndahi Raja Rehabeam mulihi sue ras si enggo iperentahkenna man bana kerina.

¹³Ipersilahang raja e ajar kalak si enggo metua ndai, e maka kasar pengeranana man rayat e,

¹⁴sue ras ajar kalak si nguda denga. Nina Rehabeam, “Enggo itamaken bapangku baban si mberat i babondu tapi kubahan maka babanndu e beraten denga ka asa si e. Iligasna kam salu purih, aku kuligas kam salu cambuk kuda!”

¹⁵Kai si ibahan raja e, sue ras sura-sura TUHAN Dibata guna nggenepi kataNa si enggo ibelaskenNa kerna Jerobeam anak Nebat erkelang-kelangken nabi Ahiya i Silo nari. E me sabapna maka la diate raja pe man rayat e.

¹⁶Kenca ieteh jelma si nterem maka ia la ibegiken raja, isurakina raja nina, “Labo man kade kami Daud ras keluargana. Kai kin si enggo pernah ibahanna man banta? O kalak Israel, ota kita mulih! Pelepas Rehabeam pekena bana!” Dage berontak bangsa Israel. [35†]

¹⁷Alu bage kalak si ringan i daerah Juda nari ngenca ngakui Rehabeam jadi raja.

¹⁸Kenca bage isuruh Raja Rehabeam si Adoniram kepala kerja paksa lawes njumpai kalak Israel, tapi ibenterina alu batu seh mate. Nangkih Rehabeam ku das gereta kudana jenari lompat ia ku Jerusalem.

¹⁹Mulai paksa e kalak Israel si arah Utara tetap berontak ngelawan kesusuren Daud.