Read Batak Karo 2 KRONIKA 12 Bible Online

2 KRONIKA 12 - Batak Karo bible

2 KRONIKA 12

¹Kenca ipeteguhi Rehabeam kuasana jadi raja, ia ras kerina rayatna minter nadingken Undang-undang TUHAN.

²I bas tahun si pelimaken pemerentahen Raja Rehabeam TUHAN ngukum bangsa Juda erkiteken bangsa e la setia man TUHAN. Raja Sisak i Mesir nari, merang Jerusalem

³alu 1.200 tentera si ergereta kuda, 60.000 tentera si ngersak kuda, dingen tentera si la terbeligai teremna subuk kalak Libia, kalak Suki ras kalak Sudan.

⁴Italukenna kuta-kuta Juda si erbenteng jenari iasakna seh ku Jerusalem.

⁵Nabi Semaya lawes ndahi Raja Rehabeam ras peminpin-peminpin kerajan Juda si enggo pulung i Jerusalem erkiteken serangen Sisak e. Nina Semaya man bana kerina, “Enda tenah TUHAN man bandu, ‘Enggo itadingkenndu Aku, e maka genduari Kutulak kam man Sisak.’ ”

⁶Igejap raja ras peminpin-peminpin e maka ia enggo erdosa, e maka nina, “Kai si ibahan TUHAN e bujur kap.”

⁷Kenca idah TUHAN kerna si enda, reh ka kata TUHAN man Semaya nina, “Erkiteken enggo igejapna dosana la Kukernepken bangsa e. Tapi tupung iserang Sisak la piga kalak si pulah. Pernembeh ateKu la kerina Kucurcurken ku kuta Jerusalem,

⁸tapi italuken Sisak ia, gelah ietehna nanamna kuga lainna adi ia jadi suruh-suruhenKu ras adi ia jadi suruh-suruhen raja doni enda. ”

⁹Reh Raja Sisak merang Jerusalem jenari irampasina erta-erta si lit i bas Rumah Pertoton ras i bas istana. Irampasina, ampang-ampang emas si ibahan Raja Salomo nai pe. [37†]

¹⁰Guna nggancih si e ibahan Rehabeam ampang-ampang tembaga, jenari isuruhna ikepkep kalak si njaga pintu gerbang istana.

¹¹Tiap lawes raja ku bas Rumah Pertoton, ipake penjaga e ampang-ampang ndai; kenca bage iulihkenna ku bas rumah jaga.

¹²Erkiteken raja erpengendes man TUHAN e maka la ia keri kal ikernepken rawa TUHAN, e maka negeri Juda pe enggo jadi mehuli.

¹³Rehabeam jadi raja i Jerusalem dingen ertambah-tambah kuasana. Sanga ia jadi raja umurna empat puluh sada tahun janah lit sepuluh pitu tahun dekahna ia merentah i Jerusalem, e me kuta si enggo ipilih TUHAN i bas daerah Israel nari jadi ingan ersembah man baNa. Nande Rehabeam e me si Naama i negeri Amon nari.

¹⁴Rehabeam ngelakoken si jahat, erkiteken la iusahakenna ndarami si ngena ate TUHAN.

¹⁵Perbahanen Rehabeam mula-mulana nari seh kedungenna bage pe laporen kerna keluargana isuratken i bas Sejarah Nabi Semaya dingen i bas Sejarah Nabi Iddo. Rehabeam la erngadi-ngadi erperang ras Jerobeam.

¹⁶Rehabeam mate jenari ikuburken i bas kuburen raja i Kuta Daud. E maka anakna Abiya nggantiken ia jadi raja.