Read Batak Karo 2 KRONIKA 13 Bible Online

2 KRONIKA 13 - Batak Karo bible

2 KRONIKA 13

¹I bas tahun pesepuluh waluhken pemerentahen Raja Jerobeam i Israel, Abiya jadi raja i Juda,

²jenari erkuasa ia telu tahun i Jerusalem. Nandena Mikaya anak Uriel i kuta Gibea nari. Pecah me perang Abiya ras Jerobeam.

³Abiya lawes ku perang e alu 400.000 tentera dingen Jerobeam ngelawan ia alu 800.000 kalak tentera.

⁴Perang e jadi i Deleng Eperaim. Raja Abiya nangkih ku uruk Deleng Semaraim jenari erlebuh ia man Jerobeam ras man kalak Israel nina, “Begiken!

⁵La kin ietehndu maka TUHAN Dibata Israel enggo erbahan perpadanen si la terosari ras Daud maka Dibata mereken man Daud ras man kesusurenna ngerajai Israel rasa lalap?

⁶Tapi Jerobeam anak Nebat berontak ngelawan rajana, e me Salomo.

⁷Kedungenna ipepulungna sada gerombolen kalak gutul si la terpake jenari ipersadana gegehna ngelawan Rehabeam anak Salomo. Tapi Rehabeam ngudasa denga dingen kurang denga pengalamenna guna ngelawan kalak e.

⁸Genduari isurakendu ka atendu erperang ngelawan kerajan TUHAN si niberekenNa man kesusuren Daud? Nterem tenterandu janah lit i bas kam lembu emas si ibahan Jerobeam jadi dibatandu.

⁹Ipelawesndu imam-imam TUHAN, kesusuren Harun bage pe kalak Lewi. Jadi gancihna itangkuhkenndu imam-imam bali ras cara si ibahan bangsa si deban. Ise si maba sada lembu e ntah pitu biri-biri, banci ia ndatken penangkuhen jadi imam dibata-dibatandu si palsu.

¹⁰Tapi kami isembah kami TUHAN Dibata kami dingen la Ia itadingken kami. Imam-imam kesusuren Harun tetap ndahiken tugasna dingen kalak Lewi nampati ia.

¹¹Tiap erpagi-pagi ras tiap karaben ipersembahken imam-imam e man TUHAN persembahen si merim-merim ras asuh-asuhen si itutung kerinana. Ipersembahkenna roti i babo sada meja si bersih rikutken aturen agama janah tiap karaben isaganna lampu i babo nahe lampu emas. Ilakoken kami kai si iperentahken TUHAN tapi kam enggo itadingkenndu Ia.

¹²Dibata jine kap jadi peminpin kami, janah imam-imamNa genduari lit i jenda ncikep terompet dingen enggo sikap ngembussa guna ngelebuh kami erperang ngelawan kam. O bangsa Israel, ola ilawanndu TUHAN, Dibata nini-ninindu! Labo kam banci menang!”

¹³Tupung e isuruh Jerobeam sada bagin tenterana nggempangi tentera Juda i pudi nari, si lebihna ngalaken pasuken Juda i lebe nari.

¹⁴Ipernehen pasuken Juda kelewet dingen idahna maka pasuken Israel enggo ngkepung ia. E maka serko tentera Juda mindo penampat man TUHAN janah imam-imam e ngembus terompet.

¹⁵Surak tentera Juda alu megang sorana, jenari alu pinpinen Abiya erperang ia. Italuken Dibata Jerobeam ras tentera Israel.

¹⁶Lompat kalak Israel nadingken kalak Juda, ibahan Dibata maka menang kalak Juda.

¹⁷Mbelin kinitalun Israel ibahan Abiya ras tenterana. Lit 500.000 kalak tentera Israel si mbisana mate tupung si e.

¹⁸Alu bage kalak Juda enggo naluken Israel, sabap kalak Juda ernalem man TUHAN. Dibata nini-ninina.

¹⁹Iayak-ayak Abiya tentera Jerobeam jenari ikuasaina piga-piga kuta, e me: Betel, Jesana, ras Epron, bage pe kuta-kuta i sekelewet kuta-kuta e.

²⁰Tupung pemerentahen Abiya lanai pernah Jerobeam ndatken kuasana mulihi. Kedungenna ipekpek TUHAN si Jerobeam e maka mate ia.

²¹Tapi Abiya tetap ergegehna kuasana. Lit sepuluh empat kalak ndeharana dingen dua puluh dua kalak anakna dilaki dingen sepuluh enem anakna diberu.

²²Sejarah Abiya si debanna, kai si ikatakenna dingen kai si ibahanna, isuratken i bas Sejarah Nabi Iddo.