Read Batak Karo 2 KRONIKA 15 Bible Online

2 KRONIKA 15 - Batak Karo bible

2 KRONIKA 15

¹Kesah Dibata reh ndahi Asaria anak Oded,

²jenari lawes ia njumpai Asa. Nina erlebuh, “O Raja Asa, bage pe kam kerina kalak Juda ras kalak Benyamin! Begiken! Adi kam ras TUHAN e maka Ia pe ras kam. Adi idaramindu Ia, ibereNa kam jumpa ras Ia, tapi adi itadingkenndu Ia, kam pe itadingkenNa.

³Sabap enggo ndekah Israel mggeluh alu la er-Dibata. La lit imam-imam si ngajarisa, dingen nggeluh alu la rundang-undang.

⁴Tapi tupung reh kiniseran, bangsa e mulihken kempak TUHAN, Dibata Israel. Idaramina TUHAN, dingen jumpa ia ras.

⁵I bas paksa e, la lit kalak si banci reh janah lawes alu aman, sabap i bas tep-tep negeri gujuh kerina.

⁶Bangsa ngelawan bangsa dingen kuta ngelawan kuta erkiteken Dibata mereken kiniseran dingen kearun man bangsa-bangsa e.

⁷Tapi kam arus megegeh dingen ola aru atendu. Lit nge upahndu ndahiken dahinndu.”

⁸Tupung ibegi Asa nubuat si ibelasken Asaria anak Oded, reh tetapna ukurna. Iambekkenna berhala-berhala si lit i negeri Juda ras Benyamin. Bage pe kerina berhala-berhala i bas kuta-kuta si enggo italukenna i deleng-deleng Eperaim. Batar-batar TUHAN si pajek i bas kesain Rumah Pertoton pe ipehulina.

⁹Nterem kalak Eperaim, Manase ras Simeon reh erpihak kempak Asa jenari tading ia kerina i bas kerajanna sabap enggo idahna maka TUHAN ngarak-ngarak Asa. Idilo Asa ia kerina ras kalak Juda, ras Benyamin.

¹⁰Pulung kerina i Jerusalem i bas bulan peteluken tahun pesepuluh limaken kenca Asa jadi raja.

¹¹I bas wari e ipersembahkenna persembahen man TUHAN. Persembahen si ipersembahkenna e, e me si ibabana mulih i bas peperangen nari. Buena persembahen 700 lembu dingen 7.000 biri-biri.

¹²Ibahanna perpadanen maka asa ukurna lit dingen asa gegehna tetap ia nembah man TUHAN Dibata nu nini-ninina.

¹³Kerina la si tading-tading subuk nguda ntah enggo metua, dilaki ntah diberu, ise si la nembah man TUHAN Dibata nu nini-ninina, la banci lang ibunuh.

¹⁴Alu sora si megang ersumpah ia i bas gelar TUHAN maka tetap atena ncikep perpadanen e, jenari ersurak dingen ngembus terompet.

¹⁵Meriah kal ukur kalak Juda kerina sabap enggo ibahanna perpadanen e alu bulat ukurna. Meriah kal ukurna kerina nembah man TUHAN, janah TUHAN pe ngalokenca dingen iberekenNa kedamen i negeri e.

¹⁶Ipengadi Asa nini tudungna Maaka jadi kemberahen, sabap ibahan Maaka sada gana-gana Dewi Asera si mehangke akap ngenenca. Patung e iripukken Asa seh getem e maka icilukna i Baluren Kidron.

¹⁷Aminna pe la kerina ikernepken Asa ingan-ingan nembah berhala i bas negeri e, tapi ia tetap erkemalangen man TUHAN kidekah ia nggeluh.

¹⁸Kerina barang si ipersembahkenna ras si ipersembahken bapana Abiya man Dibata itamakenna ku bas Rumah Pertoton, subuk barang-barang emas bage pe barang pirak.

¹⁹Seh tahun petelu puluh limaken pemerentahenna la lit jadi perang i negeri e.