Read Batak Karo 2 KRONIKA 17 Bible Online

2 KRONIKA 17 - Batak Karo bible

2 KRONIKA 17

¹Josapat jadi raja nggantiken bapana Asa, e maka ipegegehina bana guna ngelawan Israel.

²Itamakenna tenterana i bas kuta-kuta Juda si lit bentengna, i bas kuta-kuta Juda ras i bas kuta-kuta daerah Eperaim si italuken bapana Asa.

³Ipasu-pasu TUHAN ia, erkiteken iikutkenna si mehuli si ibahan bapana, janah la ia nembah man Baal.

⁴Isembahna Dibata bapana, ipatuhina perentah Dibata, janah la ilakokenna bagi perbahanen raja-raja Israel.

⁵Nteguh ibahan Dibata kuasa Josapat i Juda, janah kerina kalak mereken persembahen man bana, e maka bayak dingen ihamati kal ia.

⁶Megah kal akapna i bas ia nembah man TUHAN, janah irontaskenna ingan nembah berhala ras gana-gana Dewi Asera si lit i Juda.

⁷I bas tahun peteluken ia jadi raja isuruhna piga-piga pegawaina ngajar i kuta-kuta Juda, e me: Benhail, Obaja, Sakaria, Natanael ras Mikaya.

⁸Ikut ras kalak enda siwah kalak Lewi dingen dua kalak imam. Kalak Lewi si siwah kalak e, e me: Semaya, Netania, Sebadia, Asahel, Semiramot, Jonatan, Adonia, Tobia ras Tobadonia. Imam si dua kalak e, e me: Elisama ras Jehoram.

⁹Ibaba kalak enda kitap Undang-undang TUHAN jenari lawes ia ku kerina kuta-kuta i Juda, ngajarken Undang-undang e man jelma si nterem.

¹⁰Ibahan TUHAN maka kerina kerajan si lit isekelewet Juda mbiar erperang ngelawan Raja Josapat.

¹¹Piga-piga kalak Pilisti maba melala pirak ras pemere si debanna man Josapat, janah piga-piga kalak Arab maba 7.700 biri-biri ras 7.700 kambing man bana.

¹²Bage me tambah dekahna reh belinna kuasa Josapat. I belang-belang Juda ipajekkenna benteng-benteng si lanai tanggung buena.

¹³Ipegun-gunna mbue bekal i kuta-kuta e. I Jerusalem itamakenna tentera si terberita,

¹⁴rikutken terpukna. Adna e me kepala tentera i bas terpuk Juda nari janah lit 300.000 kalak tentera i teruh perentahna.

¹⁵Wakil Adna e me Johanan; anak buahna lit 280.000 kalak,

¹⁶teruhen Johanan e me Amasia anak Sikri; anak buahna lit 200.000 kalak. (Amasia alu sukarela nembah dingen erdahin guna TUHAN.)

¹⁷Kepala tentera i bas terpuk Benyamin nari e me: Eliada; ia sekalak tentera si terberita Ia minpin 200.000 kalak tentera si make ampang-ampang ras panah.

¹⁸Wakilna e me Josabat; anak buahna lit 180.000 kalak, si cukup perlengkapenna guna erperang.

¹⁹Kalak enda me si erdahin guna raja i Jerusalem, seakatan tentera si itamaken raja i kuta-kuta si debanna si erbenteng i Juda.